ಹೆಗ್ಡೆ ಮಾಡಿದ್ದು ಒಂಚೂರು ಇಷ್ಟ ಆಗ್ಲಿಲ್ಲ: ಯಡಿಯೂರಪ್ಪ

By Mahesh

Published: Sunday, July 24, 2011, 15:55 [IST]

ಬೆಂಗಳೂರು, ಜು 24: ಅಕ್ರಮ ಗಣಿಗಾರಿಕೆ ಕುರಿತ ವರದಿ ಸರ್ಕಾರಕ್ಕೆ ಸಲ್ಲಿಸುವ ಮೊದಲು ಪತ್ರಿಕಾಗೋಷ್ಠಿ ನಡೆಸಿ, ಹೇಳಿಕೆ ನೀಡುತ್ತಿರುವ ಲೋಕಾಯುಕ್ತರ ಕ್ರಮ ನನಗೆ ಒಂದಿಷ್ಟು ಸರಿ ಕಾಣುತ್ತಿಲ್ಲ. ಈ ವಿಚಾರದಲ್ಲಿ ಪ್ರಧಾನಿ ಮನಮೋಹನ್ ಸಿಂಗ್ ಮಧ್ಯಪ್ರವೇಶಿಸಿ ಗೊಂದಲ ಬಗೆ ಹರಿಸಬೇಕು ಎಂದು ಮುಖ್ಯಮಂತ್ರಿ ಬಿಎಸ್ ಯಡಿಯೂರಪ್ಪ ಹೇಳಿದ್ದಾರೆ.

ಮಾರಿಷಸ್ ನಿಂದ ನೇರವಾಗಿ ನಾಳೆ(ಜು.25) ಬೆಳಗ್ಗೆ ದೆಹಲಿಗೆ ತೆರಳಿರುವ ಯಡಿಯೂರಪ್ಪ ಪಕ್ಷದ ವರಿಷ್ಠರೊಡನೆ ಚರ್ಚೆ ನಡೆಸಲಿದ್ದಾರೆ. ಸಂಜೆ ಬೆಂಗಳೂರಿಗೆ ಆಗಮಿಸಿ, ವಿಧಾನಸೌಧದಲ್ಲಿ ಪತ್ರಿಕಾಗೋಷ್ಠಿ ನಡೆಸಲಿದ್ದಾರೆ.

ಲೋಕಾಯುಕ್ತರ ಸುದ್ದಿಗೋಷ್ಠಿ, ವರದಿ ಸೋರಿಕೆ, ಕಣ್ಣೀರಧಾರೆ ಬಗ್ಗೆ ಖಾಸಗಿ ಸುದ್ದಿ ವಾಹಿನಿಯೊಂದಿಗೆ ಮಾತನಾಡಿದ ಯಡಿಯೂರಪ್ಪ, ರಾಜ್ಯದಲ್ಲಿ ರಾಜಕೀಯ ಅಶಾಂತಿ ಉಂಟು ಮಾಡುವುದು ಲೋಕಾಯುಕ್ತ ಸಂತೋಷ್ ಹೆಗ್ಡೆ ಅಂಥವರಿಗೆ ಶೋಭಿಸುವುದಿಲ್ಲ.

ವರದಿ ಸಾರ್ವಜನಿಕವಾಗುವ ಮೊದಲೇ ಚರ್ಚೆಗೆ ಈಡುಮಾಡಿದ್ದಾರೆ. ವರದಿ ಸರ್ಕಾರದ ಮುಂದೆ ಬಂದ ನಂತರ ಸದನದಲ್ಲಿ ಆ ಬಗ್ಗೆ ಚರ್ಚಿಸುವುದು ಸೂಕ್ತ ಹಾಗೂ ಸಮಂಜಸ. ಆದರೆ, ಲೋಕಾಯುಕ್ತರು ಅನುಸರಿಸುತ್ತಿರುವ ಕ್ರಮ ಸರಿಯಲ್ಲ ಎಂದು ಯಡಿಯೂರಪ್ಪ ಹೇಳಿದ್ದಾರೆ.

Published On July 24, 2011