ಇಂಟರ್ ನೆಟ್ ಎಕ್ಸ್ ಪ್ಲೋರರ್ 9 ಉಳಿಕೆ, ಬಳಕೆ!

By Mahesh

Published: Monday, March 21, 2011, 17:12 [IST]

ಸ್ಯಾನ್ ಫ್ರಾನ್ಸಿಸ್ಕೋ, ಮಾ.21: ಕಂಪ್ಯೂಟರ್ ಕ್ಷೇತ್ರದ ದಿಗ್ಗಜ ಮೈಕ್ರೋಸಾಫ್ಟ್ ಇತ್ತೀಚೆಗೆ ಬಿಡುಗಡೆ ಮಾಡಿದ ಜನಪ್ರಿಯ ವೆಬ್ ಬ್ರೌಸರ್ ಐಇ 9 ಗೆ ಉತ್ತಮ ಪ್ರತಿಕ್ರಿಯೆ ಸಿಕ್ಕಿದೆ. ಬಿಡುಗಡೆಗೊಂಡ ಮೇಲೆ ದಿನವೊಂರಲ್ಲೇ ಸುಮಾರು 2.3 ಮಿಲಿಯನ್ ಬಾರಿ ಡೌನ್ ಲೋಡ್ ಆಗಿದೆ ಎಂದು ಸಂಸ್ಥೆ ಹೇಳಿಕೊಂಡಿದೆ. ಆಸ್ಟಿನ್ ನಲ್ಲಿ ನಡೆದ ಸೌಥ್ ವೆಸ್ಟ್ (SXSW) ಹಬ್ಬದಲ್ಲಿ ಮಾ.15ರಂದು ಬಿಡುಗಡೆಯಾದ ಐಇ9, ವಿಂಡೋಸ್ ವಿಸ್ತಾ ಹಾಗೂ ವಿಂಡೋಸ್ 7 ಅಪರೇಟಿಂಗ್ ಸಿಸ್ಟಮ್ ನಲ್ಲಿ ಮಾತ್ರ ಕಾರ್ಯ ನಿರ್ವಹಿಸುತ್ತದೆ ಎಂಬುದು ಗಮನಾರ್ಹ.

ವಿಂಡೋಸ್ ನ ಹಳೆ ಆವೃತ್ತಿ ಆಪರೇಟಿಂಗ್ ಸಿಸ್ಟಮ್ XP, 2K, 98 ಮುಂತಾದಗಳನ್ನು ಒಳಗೊಂಡ ಕಂಪ್ಯೂಟರ್ ನಲ್ಲಿ ಐಇ9 ಕಾರ್ಯ ನಿರ್ವಹಿಸುವುದಿಲ್ಲ. ಕಳೆದ ಸೆಪ್ಟೆಂಬರ್ ನಲ್ಲಿ ಐಇ9 ಬೀಟಾ ಆವೃತ್ತಿ ಬಿಡುಗಡೆಗೊಂಡಿದ್ದಾಗಲೂ ಒಂದೇ ದಿನದಲ್ಲಿ ಸುಮಾರು 2 ಮಿಲಿಯನ್ ಬಾರಿ ಡೌನ್ ಲೋಡ್ ಆಗಿತ್ತು. ಈಗ ಸಂಪೂರ್ಣ ಆವೃತ್ತಿ ಬಿಡುಗಡೆಯಾಗಿದ್ದು, HTML 5 ಹಾಗೂ CSS 3 ಸೌಲಭ್ಯ ಒದಗಿಸಬಲ್ಲದಾಗಿದೆ. [ಸಂಪೂರ್ಣ ವಿಶ್ಲೇಷಣೆಗೆ ನೋಡಿ]

ಏನಾದರೂ, ಇಂಟರ್ ನೆಟ್ ಎಕ್ಸ್ ಪ್ಲೋರರ್ ಗೆ ಕಷ್ಟ ಕಷ್ಟ. ಗೂಗಲ್, ಮೋಝಿಲ್ಲಾಗೆ ಪ್ರತಿಸ್ಪರ್ಧೆ ಒಡ್ಡಲು ಸಾಧ್ಯವಾಗದೆ ಹೆಣಗಾಡುತ್ತಿರುವ ಮೈಕ್ರೋಸಾಫ್ಟ್ ಹತ್ತು ಹಲವು ಸೌಲಭ್ಯಗಳನ್ನು ಗ್ರಾಹಕರಿಗೆ ಒದಗಿಸುವ ಮೂಲಕ ಮಾರುಕಟ್ಟೆ ಹಿಡಿತ ಸಾಧಿಸಲು ಯೋಜಿಸಿದೆ. ಮಾ.22ರಂದು ಫೈರ್ ಫಾಕ್ಸ್ ನ 4ನೆ ಆವೃತ್ತಿ ಬ್ರೌಸರ್ ಬಿಡುಗಡೆಗೊಳ್ಳುವ ಸಾಧ್ಯತೆಯಿದೆ. ಗೂಗಲ್ ಕೂಡಾ ಕ್ರೋಮ್ 10 ಹಾಗೂ 11 ಬಿಡುಗಡೆ ಮಾಡಲು ಸಿದ್ಧವಾಗಿದೆ.

ಸ್ಪೀಡ್ ಹಾಗೂ ಸೆಕ್ಯುರಿಟಿ ಎಂಬ ಮಂತ್ರವನ್ನು ಈ ಬಾರಿ ಮೈಕ್ರೋಸಾಫ್ಟ್ ಜಪಿಸುತ್ತಿದ್ದು, ಗ್ರಾಹಕ ಸ್ನೇಹಿ ಬ್ರೌಸರ್ ಗಳು, ಓಪನ್ ಸೋರ್ಸ್ ಬ್ರೌಸರ್ ಗಳ ಈ ಕಾಲದಲ್ಲಿ ಗ್ರಾಹಕರ ವಿಶ್ವಾಸವನ್ನು ಉಳಿಸಿಕೊಳ್ಳಲು ಒಳ್ಳೆ ಪ್ರಯತ್ನಪಟ್ಟಿದೆ. ಆದರೆ, ಕೇವಲ ಎರಡು ಆಪರೇಟಿಂಗ್ ಸಿಸ್ಟಮ್ ಗಳಲ್ಲಿ ಮಾತ್ರ ಲಭ್ಯವಿರುವುದು ಕೊಂಚ ಹೊಡೆತ ನೀಡಲಿದೆ.

Published On March 21, 2011