ಪಾಕ್ ಜಾಹೀರಾತಿನಲ್ಲಿ ಭಾರತದ ನೌಕಾ ಚಿತ್ರ

ಇಸ್ಲಾಮಾಬಾದ್, ಮಾ. 9‌: ಹಲವು ರಾಷ್ಟ್ರಗಳು ಸಮರಾಭ್ಯಾಸ ನಡೆಸುವ ಕಾರ್ಯಕ್ರಮಕ್ಕೆ ಸಂಬಂಧಿಸಿದಂತೆ ಪಾಕ್ ಸರ್ಕಾರ ಮಾಧ್ಯಮಗಳಿಗೆ ನೀಡಿದ್ದ ಜಾಹೀರಾತಿನಲ್ಲಿ ಭಾರತೀಯ ಯುದ್ಧನೌಕೆಯ ಚಿತ್ರ ಕಾಣಿಸಿಕೊಂಡಿದೆ. ಅರೇಬಿಯನ್‌ ಸಮುದ್ರದಲ್ಲಿ ನಡೆಯಲಿರುವ ಸಮರಾಭ್ಯಾಸದಲ್ಲಿ 39ಕ್ಕೂ ಹೆಚ್ಚು ರಾಷ್ಟ್ರಗಳು ಪಾಲ್ಗೊಳ್ಳುತ್ತಿವೆ ಆದರೆ, ಭಾರತೀಯ ನೌಕಾ ಪಡೆ ಪಾಲ್ಗೊಳ್ಳುತ್ತಿಲ್ಲ. ಆದರೂ, ಜಾಹೀರಾತಿನಲ್ಲಿ ಭಾರತದ ಯುದ್ಧನೌಕೆ ಕಾಣಿಸಿಕೊಂಡಿರುವುದು ಹಲವು ಪ್ರಶ್ನೆಗಳ ಅಲೆ ಎಬ್ಬಿಸಿದೆ.

ಅಮಾನ್‌-11 ಎಂಬ ಹೆಸರಿನಲ್ಲಿ ಸಮರಾಭ್ಯಾಸ ಕುರಿತು 'ದಿ ನೇಶನ್‌' ಹಾಗೂ 'ನವಾ-ಇ-ವಕ್‌' ನಿಯತಕಾಲಿಕೆಯಲ್ಲಿ ಪ್ರಕಟಗೊಂಡ ಒಂದು ಪುಟದ ಜಾಹೀರಾತಿನಲ್ಲಿ ಭಾರತೀಯ ನೌಕಾ ಪಡೆಯ ದಿಲ್ಲಿ, ಗೋದಾವರಿ ಹಾಗೂ ತಲ್ವಾರ್‌ ಕ್ಲಾಸ್‌ ಯುದ್ಧನೌಕೆಗಳ ಚಿತ್ರವನ್ನು ಬಳಸಲಾಗಿದೆ. ಜಾಹೀರಾತಿನಲ್ಲಿ 'ಶಾಂತಿಗಾಗಿ ಜತೆಯಾಗಿದ್ದೇವೆ' ಶೀರ್ಷಿಕೆಯನ್ನು ನೀಡಲಾಗಿದ್ದು, ಅಮೆರಿಕದ ಯುದ್ಧನೌಕೆಯ ಚಿತ್ರವೂ ಜೊತೆಗಿದೆ.

ಸುಮಾರು 39 ರಾಷ್ಟ್ರಗಳ ಪ್ರತಿನಿಧಿಗಳನ್ನು ಒಳಗೊಂಡ ಬೃಹತ್‌ ಜಂಟಿ ಸಮರಾಭ್ಯಾಸ ಅರೇಬಿಯನ್‌ ಸಮುದ್ರದಲ್ಲಿ ನಡೆಯಲಿದೆ. ಉಪಖಂಡದಲ್ಲಿ ಶಾಂತಿ ಸ್ಥಾಪಿಸುವ ಉದ್ದೇಶದಿಂದ ಯುದ್ಧನೌಕೆಗಳು, ಯುದ್ಧವಿಮಾನಗಳು, ವಿಶೇಷ ಪಡೆಗಳು ಈ ಸಮರಾಭ್ಯಾಸದಲ್ಲಿ ಪಾಲ್ಗೊಳ್ಳುತ್ತಿದೆ. ಆದರೆ, ಪಾಕಿಸ್ತಾನ ಇದುವರೆಗೆ ಭಾರತವನ್ನು ಆಹ್ವಾನಿಸಿಲ್ಲ.

ಪಾಕ್ ಜಾಹೀರಾತು ಎಡವಟ್ಟುಗಳು : ಭಾರತ ಹಾಗೂ ಪಾಕಿಸ್ತಾನಗಳ ಸರ್ಕಾರಿ ಸಂಸ್ಥೆಗಳ ಜಾಹೀರಾತಿನಲ್ಲಿ ಈ ರೀತಿ ಎದುರಾಳಿ ರಾಷ್ಟ್ರಗಳ ನೌಕೆ, ಯುದ್ಧವಿಮಾನ ಹಾಗೂ ಇತರ ಪ್ರಮುಖ ಚರಾಸ್ತಿಗಳನ್ನು ತೋರಿಸಿ ಮುಜುಗರಕ್ಕೀಡಾಗಿರುವುದು ಇದೇ ಮೊದಲಲ್ಲ. ಪಾಕಿಸ್ತಾನದ ಪಂಜಾಬ್ ಪ್ರಾಂತ್ಯದ ಪೊಲೀಸ್ ಪಡೆ ಜಾಹೀರಾತಿನಲ್ಲಿ ಭಾರತದ ಪಂಜಾಬ್ ಪೊಲೀಸರ ಚಿಹ್ನೆಯನ್ನು ಬಳಲಾಗಿತ್ತು. ಭಾರತ ಸರ್ಕಾರದ ಜಾಹೀರಾತಿನಲ್ಲಿ ಒಮ್ಮೆ ಪ್ರಧಾನಿ ಮನಮೋಹನ್ ಸಿಂಗ್, ಕಪಿಲ್ ದೇವ್ ಜೊತೆ ಪಾಕ್ ವಾಯುಪಡೆ ಮುಖ್ಯಸ್ಥ ತನ್ವೀರ್ ಅಹಮದ್ ಭಾವಚಿತ್ರ ಸೇರಿಸಿ ಪ್ರಕಟಿಸಲಾಗಿತ್ತು.

English summary

The Pakistan Navy has apparently put a picture from an Indo-US Naval Exercise in its print advertisement. The Pakistan Navy's advertisement is about Aman-11, an exercise being hosted by Pakistan and involving naval representatives from 39 countries.