ಐಎಎಸ್ ಪರೀಕ್ಷೆ: ಮಹಿಳಾ ಅಭ್ಯರ್ಥಿಗಳಿಗೆ ಶುಲ್ಕ ಇಲ್ಲ

ಬೆಂಗೂರು, ಫೆ.28: ಮಹಿಳೆಯರೇ, ಭಾರತೀಯ ಆಡಳಿತ ಸೇವೆಯಲ್ಲಿ (ಐಎಎಸ್) ತೊಡಗಿಸಿಕೊಳ್ಳುವ ಆಲೋಚನೆ ನಿಮಗಿದೆಯೇ? ಹಾಗಾದರೆ ನಿಮಗೊಂದು ಸಂತಸದ ಸುದ್ದಿ ಇಲ್ಲಿದೆ. ಏನೆಂದರೆ ಕೇಂದ್ರ ಲೋಕಸೇವಾ ಆಯೋಗವು ಮಹಿಳಾ ಅಭ್ಯರ್ಥಿಗಳು ಇನ್ನು ಮುಂದೆ ಯಾವುದೇ ರೀತಿಯ ಪರೀಕ್ಷಾ ಶುಲ್ಕ ಕಟ್ಟುವುದು ಬೇಡವೆಂದು ತಿಳಿಸಿದೆ.

ಉನ್ನತ ಹುದ್ದೆಗಳಿಗೆ ಮಹಿಳೆಯರನ್ನು ಆಕರ್ಷಿಸಲು ಪ್ರಸಕ್ತ ಸಾಲಿನಿಂದಲೇ ಪರೀಕ್ಷಾ ಶುಲ್ಕದಲ್ಲಿ ರಿಯಾಯಿತಿ ನೀಡಲಾಗಿದೆ. ಇದುವರೆಗೆ ಪರಿಶಿಷ್ಟರು ಮತ್ತು ಅಂಗವಿಕಲ ಅಭ್ಯರ್ಥಿಗಳಿಗೆ ಮಾತ್ರ ಈ ಶುಲ್ಕ ರಿಯಾಯಿತಿ ಕಲ್ಪಿಸಲಾಗಿದೆ. ಇದೀಗ ಎಲ್ಲ ವರ್ಗದ ಮಹಿಳಾ ಅಭ್ಯರ್ಥಿಗಳಿಗೂ ಈ ರಿಯಾಯಿತಿ ದೊರೆತಿದೆ.

ಯುಪಿಎಸ್‌ಸಿ, ಭಾರತೀಯ ಆಡಳಿತ ಸೇವೆ ನೇಮಕಾತಿ ಪೂರ್ವಭಾವಿ (ಪ್ರಿಲಿಮಿನರಿ) ಪರೀಕ್ಷೆಯ 2011ರ ವೇಳಾಪಟ್ಟಿಯನ್ನು ಇತ್ತೀಚೆಗೆ ಪ್ರಕಟಿಸಿದೆ. ಪೂರ್ವಭಾವಿ ಪರೀಕ್ಷೆಯು ಇದೇ ಜೂನ್ 12ರಂದು ನಡೆಯಲಿದೆ. ಇನ್ನು ಮುಖ್ಯ ಪರೀಕ್ಷೆಗಳು ಅಕ್ಟೋಬರ್ 29ರಿಂದ ಆರಂಭಗೊಳ್ಳುತ್ತವೆ. 880 ಹುದ್ದೆಗಳ ನೇಮಕಕ್ಕೆ ಪ್ರಕಟಣೆ ಹೊರಡಿಸಲಾಗಿದ್ದು, ಈ ಸಂಖ್ಯೆ ಅಧಿಕಗೊಳ್ಳುವ ನಿರೀಕ್ಷೆಯಿದೆ. ಅರ್ಜಿ ಸಲ್ಲಿಸಲು ಕೊನೆಯ ದಿನಾಂಕ 2011ರ ಮಾರ್ಚ್ 20.

ಈ ಮಧ್ಯೆ, ಪೂರ್ವಭಾವಿ ಪರೀಕ್ಷೆಯ ಎರಡು ಪ್ರಶ್ನೆಪತ್ರಿಕೆಗಳ ವಿವರ ಹೀಗಿದೆ: ಪತ್ರಿಕೆ 1- ಸಾಮಾನ್ಯ ಅಧ್ಯಯನ ಪರೀಕ್ಷೆ (200 ಅಂಕ)- ಅವಧಿ 2 ಗಂಟೆ. ಪತ್ರಿಕೆ 2- ಸಿವಿಲ್ ಸರ್ವಿಸಸ್ ಅಪ್ಟಿಟ್ಯೂಡ್ ಟೆಸ್ಟ್ - 200 ಅಂಕ- ಅವಧಿ 2 ಗಂಟೆ. ಹೆಚ್ಚಿನ ವಿವರಕ್ಕೆ ಈ ತಾಣಕ್ಕೆ ಭೇಟಿ ನೀಡಿ: www.upsc.gov.in, www.upscportal.com

English summary

For Union Public Service Commission Recruitment 2010, a new Application Fee structure announced. The only change is No fee for women candidates of any community. As usual No fee for SC / ST candidates. Physically handicapped persons are also exempted from payment of fee. However OBC candidates are required to pay the full prescribed fee.