ಪಾಕಿಗಳಿಗೆ ಯುಎಸ್ ನೆರವು;ಎಚ್ಚರಿಕೆಯಲ್ಲಿ ಭಾರತ

ನವದೆಹಲಿ, ಜು.26:ಅಮೆರಿಕ ಇತ್ತೀಚೆಗೆ ಪಾಕಿಸ್ತಾನಕ್ಕೆ ಭಯೋತ್ಪಾದಕರನ್ನು ಮಟ್ಟ ಹಾಕಲು ನೀಡುತ್ತಿರುವ ನೆರವನ್ನು ಭಾರತದ ವಿರುದ್ದ ದುರ್ಬಳಕೆ ಮಾಡಿಕೊಳ್ಳುವ ಸಾಧ್ಯತೆ ಇದೆ ಎಂದು ಸರ್ಕಾರ ಹೇಳಿದ್ದು ದೇಶದ ಪ್ರತಿ ಇಂಚು ನೆಲವನ್ನು ರಕ್ಷಿಸಲು ಭದ್ರತಾ ಪಡೆಗಳಿಗೆ ಎಲ್ಲಾ ರೀತಿಯ ನೆರವನ್ನು ಒದಗಿಸುವುದಾಗಿ ಹೇಳಿದೆ.

ನವದೆಹಲಿಯಲ್ಲಿ ಕಾರ್ಗಿಲ್ ಯದ್ಧದ 11ನೇ ವರ್ಷಾಚರಣೆಯಾದ 'ವಿಜಯ್ ದಿವಸ್ 'ಆಚರಣೆಯಲ್ಲಿ ಅಮರ್ ಜವಾನ್ ಜ್ಯೋತಿಗೆ ಪುಷ್ಪ ಗುಚ್ಚ ಅರ್ಪಿಸಿ ಸುದ್ದಿಗಾರರೊಂದಿಗೆ ಮಾತನಾಡುತಿದ್ದ ರಕ್ಷಣಾ ಸಚಿವ ಎಕೆ ಆಂಟನಿ ಈ ವಿಷಯ ತಿಳಿಸಿದರು.

ಕಳೆದ ವಾರ ಅಮೆರಿಕದ ಭದ್ರತಾ ಸಲಹೆಗಾರ ಜೇಮ್ಸ್ ಜೋನ್ಸ್ ಹಾಗೂ ನೌಕಾ ಸೇನೆ ಯ ಮುಖ್ಯಸ್ಥ ಮೈಕ್ ಮುಲ್ಲೆನ್ ಅವರೊಂದಿಗೆ ನಡೆದ ಮಾತುಕತೆಯ ಸಂದರ್ಭದಲ್ಲೂ ಭಾರತದ ಕಳವಳವನ್ನು ತಿಳಿಸಲಾಗಿದೆ ಎಂದು ಅವರು ಹೇಳಿದರು.

ಅಮೆರಿಕ, ಪಾಕಿಸ್ತಾನಕ್ಕೆ ವಾರ್ಷಿಕವಾಗಿ ಬಿಲಿಯನ್ ಗಟ್ಟಲೆ ಮೌಲ್ಯದ ಯುದ್ಧೋಪಕರಣಗಳನ್ನು ಸರಬರಾಜು ಮಾಡುತ್ತಿದ್ದು ಭಯೋತ್ಪಾದಕರ ವಿರುದ್ಧ ಹೋರಾಟಕ್ಕೆ ಬೇಕಾದದ್ದಕ್ಕಿಂತ ಹೆಚ್ಚಿದೆ ಎಂದು ಅವರು ಹೇಳಿದರು.