ವಿಮಾನ ಪ್ರಯಾಣ ದರ ಇನ್ನಷ್ಟು ದುಬಾರಿ

ನವದೆಹಲಿ, ಜೂ.16: ಅಂತಾರಾಷ್ಟ್ರೀಯ ತೈಲ ಮಾರುಕಟ್ಟೆಯಲ್ಲಿ ವಿಮಾನ ಇಂಧನ ದರ (ಎಟಿಎಫ್)ದಲ್ಲಿ ತೀವ್ರ ಏರಿಕೆ ಕಂಡ ಹಿನ್ನೆಲೆಯಲ್ಲಿ ಸರ್ಕಾರಿ ಸ್ವಾಮ್ಯದ ತೈಲ ಕಂಪನಿಗಳು ಮಂಗಳವಾರ ತಡರಾತ್ರಿಯಿಂದಲೇ ಜಾರಿಗೆ ಬರುವಂತೆ ವಿಮಾನದ ಇಂಧನ ಬೆಲೆಯನ್ನು ಶೇ .1.7 ರಷ್ಟು ಏರಿಕೆ ಮಾಡಿವೆ.

ಇದರಿಂದಾಗಿ ವಿಮಾನ ಪ್ರಯಾಣ ದರ ಏರಿಕೆಯಾಗುವುದು ಖಚಿತವಾಗಿದೆ. ದೇಶಿಯ ಹಾಗೂ ಅಂತಾರಾಷ್ಟ್ರೀಯ ವಿಮಾನ ದರದಲ್ಲಿ ಭಾರಿ ಏರಿಕೆಯಾಗಲಿದೆ.

ಪ್ರತೀ ಕಿಲೋ ಲೀಟರ್‌ಗೆ 688 ರೂಪಾಯಿ ಏರಿಕೆಯಾಗಿ, 40,192 ರೂಪಾಯಿ ತಲುಪಲಿದೆ ಎಂದು ಇಂಡಿಯನ್ ಆಯಿಲ್ ಕಾರ್ಪೋರೇಷನ್ ಪ್ರಕಟಣೆ ಹೊರಡಿಸಿದೆ. ಕಳೆದ ನಾಲ್ಕು ತಿಂಗಳ ಹಿಂದಷ್ಟೇ ಶೇ.7.17 ರಷ್ಟು ಇಳಿಕೆ ಕಂಡಿದ್ದ ಎಟಿಎಫ್ ದರ ನಂತರ ಇದೇ ಮೊದಲ ಬಾರಿಗೆ ಗರಿಷ್ಠ ಏರಿಕೆ ದಾಖಲಿಸಿದೆ.

ಮುಂಬೈ ನಲ್ಲಿ ಮಂಗಳವಾರದಿಂದ ಅನ್ವಯವಾಗುವಂತೆಯೇ ಎಟಿಎಫ್ ದರದಲ್ಲಿ 717 ರುಪಾಯಿಗಳಷ್ಟು ಏರಿಕೆಯಾಗಿ 41,469 ರುಪಾಯಿ ತಲುಪಲಿದೆ.