ಭಾರತೀಯ ಕಾರ್ಪೊರೇಟ್ ಇತಿಹಾಸದಲ್ಲೇ ಹೊಸ ದಾಖಲೆ: FY26 ರಲ್ಲಿ ಬರೋಬ್ಬರಿ 1.53 ಲಕ್ಷ ಕೋಟಿ ರೂ. ಹೂಡಿಕೆ ಮಾಡಿದ ಅದಾನಿ ಸಮೂಹ

ಭಾರತದ ಪ್ರಮುಖ ಮೂಲಸೌಕರ್ಯ ದೈತ್ಯ ಅದಾನಿ ಸಮೂಹವು 2026 ರ ಹಣಕಾಸು ವರ್ಷದಲ್ಲಿ ಹೊಸ ಇತಿಹಾಸ ಸೃಷ್ಟಿಸಿದೆ. ದೇಶದ ಯಾವುದೇ ಕಾರ್ಪೊರೇಟ್ ಸಂಸ್ಥೆಯೂ ಮಾಡದ ಮಟ್ಟದಲ್ಲಿ, ಬರೋಬ್ಬರಿ 1,52,967 ಕೋಟಿ ರೂಪಾಯಿಗಳ ವಾರ್ಷಿಕ ಬಂಡವಾಳ ಹೂಡಿಕೆಯನ್ನು ಮಾಡುವ ಮೂಲಕ ಅದಾನಿ ಗ್ರೂಪ್ ತನ್ನ ಮೂಲಸೌಕರ್ಯ, ಇಂಧನ, ಸಾರಿಗೆ ಮತ್ತು ಯುಟಿಲಿಟಿ ಉದ್ಯಮಗಳನ್ನು ಅಭೂತಪೂರ್ವ ವೇಗದಲ್ಲಿ ವಿಸ್ತರಿಸಿದೆ.

ಮಂಗಳವಾರ ಬಿಡುಗಡೆಯಾದ ಕಂಪನಿಯ FY26 ರ ಹಣಕಾಸು ವರದಿಯ ಪ್ರಕಾರ, ಸಮೂಹವು ತನ್ನ ಸಾರ್ವಕಾಲಿಕ ಗರಿಷ್ಠ ವಾರ್ಷಿಕ ಇಬಿಐಟಿಡಿಎ (EBITDA - ಕಾರ್ಯನಿರ್ವಹಣಾ ಲಾಭ) ಗಳಿಸಿದೆ. ಇದು ವಾರ್ಷಿಕವಾಗಿ ಶೇಕಡಾ 5.6 ರಷ್ಟು ಬೆಳವಣಿಗೆಯೊಂದಿಗೆ 94,834 ಕೋಟಿ ರೂಪಾಯಿಗಳಿಗೆ ತಲುಪಿದೆ.

ಮೂಲಸೌಕರ್ಯಕ್ಕೆ ಸಿಂಹಪಾಲು

ಚಾಲ್ತಿ ವರ್ಷದಲ್ಲಿ ಅದಾನಿ ಗ್ರೂಪ್ ಮಾಡಿದ ಒಟ್ಟು ಹೂಡಿಕೆಯಲ್ಲಿ ಶೇಕಡಾ 80 ರಷ್ಟು ಪಾಲು ಇಂಧನ, ಯುಟಿಲಿಟಿ ಹಾಗೂ ಸಾರಿಗೆ ಮತ್ತು ಲಾಜಿಸ್ಟಿಕ್ಸ್‌ನಂತಹ ಪ್ರಮುಖ ಮೂಲಸೌಕರ್ಯ ವಲಯಗಳಿಗೆ ಸಂದಿದೆ. ಇದರೊಂದಿಗೆ ಸಮೂಹದ ಒಟ್ಟು ಆಸ್ತಿ ಮೌಲ್ಯವು 7,85,098 ಕೋಟಿ ರೂಪಾಯಿಗಳಿಗೆ ಏರಿಕೆಯಾಗಿದೆ. ಇದು ಭಾರತದ ಹೆಚ್ಚುತ್ತಿರುವ ಮೂಲಸೌಕರ್ಯ ಅಗತ್ಯತೆಗಳಿಗೆ ಅನುಗುಣವಾಗಿ ಕಂಪನಿಯು ಹೂಡಿಕೆಯನ್ನು ತೀವ್ರಗೊಳಿಸಿರುವುದನ್ನು ತೋರಿಸುತ್ತದೆ.

ಕಂಪನಿಯ ಒಟ್ಟು ಇಬಿಐಟಿಡಿಎಗೆ ಮೂಲಸೌಕರ್ಯ ವ್ಯವಹಾರಗಳೇ ಶೇಕಡಾ 87 ರಷ್ಟು ಕೊಡುಗೆ ನೀಡಿವೆ. ಅದಾನಿ ಪೋರ್ಟ್ಸ್ ಮತ್ತು ಎಸ್‌ಇಜಡ್ ನೇತೃತ್ವದ ಸಾರಿಗೆ ವಲಯವು ಶೇಕಡಾ 23.2 ರಷ್ಟು ಭರ್ಜರಿ ಬೆಳವಣಿಗೆಯೊಂದಿಗೆ 25,228 ಕೋಟಿ ರೂ. ಇಬಿಐಟಿಡಿಎ ದಾಖಲಿಸಿದೆ. ಇನ್ನುಳಿದಂತೆ ಯುಟಿಲಿಟಿ ವ್ಯವಹಾರವು ಶೇಕಡಾ 4.6 ರಷ್ಟು ಪ್ರಗತಿ ಕಂಡು 45,377 ಕೋಟಿ ರೂ. ತಲುಪಿದೆ.

ಕಾರ್ಯಾರಂಭ ಮಾಡಿದ ಪ್ರಮುಖ ಯೋಜನೆಗಳು

ಹಣಕಾಸು ವರ್ಷ 2026 ರಲ್ಲಿ ಅದಾನಿ ಸಮೂಹವು ಹಲವು ಆಯಕಟ್ಟಿನ ಯೋಜನೆಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದೆ. ಇದರಲ್ಲಿ 5.1 ಗಿಗಾವ್ಯಾಟ್ (GW) ನವೀಕರಿಸಬಹುದಾದ ಇಂಧನ ಸಾಮರ್ಥ್ಯ ಮತ್ತು 1.38 GWh ಬ್ಯಾಟರಿ ಎನರ್ಜಿ ಸ್ಟೋರೇಜ್ ಸಿಸ್ಟಮ್ಸ್ ಸೇರಿವೆ. ಸಾರಿಗೆ ವಲಯದಲ್ಲಿ ಬಹುನಿರೀಕ್ಷಿತ ನವಿ ಮುಂಬೈ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣ, ಗುವಾಹಟಿ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಹೊಸ ಟರ್ಮಿನಲ್ ಮತ್ತು ಗಂಗಾ ಎಕ್ಸ್‌ಪ್ರೆಸ್‌ವೇ ಕಾರ್ಯಾಚರಣೆಯನ್ನು ಆರಂಭಿಸಿವೆ. ಇದರೊಂದಿಗೆ ಕೈಗಾರಿಕಾ ವಿಸ್ತರಣೆಯ ಭಾಗವಾಗಿ ತಾಮ್ರದ ಸ್ಮೆಲ್ಟರ್ ಯೋಜನೆಯನ್ನೂ ಕಂಪನಿಯು ಆರಂಭಿಸಿದೆ.

ಬಲಿಷ್ಠ ಬ್ಯಾಲೆನ್ಸ್ ಶೀಟ್ ಮತ್ತು ಕಡಿಮೆ ಸಾಲದ ವೆಚ್ಚ

ದಾಖಲೆಯ ಬಂಡವಾಳ ಹೂಡಿಕೆಯ ನಡುವೆಯೂ ಅದಾನಿ ಸಮೂಹವು ಕಟ್ಟುನಿಟ್ಟಾದ ಹಣಕಾಸು ಶಿಸ್ತನ್ನು ಕಾಯ್ದುಕೊಂಡಿದೆ. ಕಂಪನಿಯ ನಿವ್ವಳ ಸಾಲ ಮತ್ತು ಇಬಿಐಟಿಡಿಎ ಅನುಪಾತವು 3.3 ಪಟ್ಟು ಇದ್ದು, ಇದು ಕಂಪನಿ ನಿಗದಿಪಡಿಸಿಕೊಂಡಿದ್ದ 3.5 ರ ಮಿತಿಗಿಂತ ಕೆಳಗಿದೆ. ಪ್ರಸ್ತುತ ಸಮೂಹದ ಬಳಿ 55,852 ಕೋಟಿ ರೂಪಾಯಿ ನಗದು ಮೀಸಲು ಇದ್ದು, ಇದು ಮುಂದಿನ 17 ತಿಂಗಳ ಸಾಲ ಮರುಪಾವತಿಯ ಜವಾಬ್ದಾರಿಗಳನ್ನು ಸುಲಭವಾಗಿ ನಿಭಾಯಿಸಲು ಸಾಕಾಗುತ್ತದೆ. ಕ್ರೆಡಿಟ್ ರೇಟಿಂಗ್‌ಗಳ ಸುಧಾರಣೆಯಿಂದಾಗಿ ಕಂಪನಿಯ ಸಾಲದ ವೆಚ್ಚವು 2024 ರಲ್ಲಿದ್ದ ಶೇಕಡಾ 9 ರಿಂದ 2026 ರಲ್ಲಿ ಶೇಕಡಾ 7.8 ಕ್ಕೆ ಇಳಿಕೆಯಾಗಿದೆ.

ವಿವಿಧ ಕಂಪನಿಗಳ ಸಾಧನೆ

ಅದಾನಿ ಗ್ರೀನ್ ಎನರ್ಜಿ ಇಬಿಐಟಿಡಿಎ ಶೇಕಡಾ 14.6 ರಷ್ಟು ಹೆಚ್ಚಳವಾಗಿ 12,075 ಕೋಟಿ ರೂ. ತಲುಪಿದ್ದರೆ, ಅದಾನಿ ಎನರ್ಜಿ ಸೊಲ್ಯೂಷನ್ಸ್ ಶೇಕಡಾ 12.6 ರಷ್ಟು ವೃದ್ಧಿಯೊಂದಿಗೆ 8,726 ಕೋಟಿ ರೂ. ಗಳಿಸಿದೆ. ಇನ್ನು ಅದಾನಿ ಪವರ್ 23,321 ಕೋಟಿ ರೂ., ಅದಾನಿ ಸಿಮೆಂಟ್ 7,586 ಕೋಟಿ ರೂ. ಹಾಗೂ ಇನ್‌ಕ್ಯುಬೇಟರ್ ವ್ಯವಹಾರವಾದ ಅದಾನಿ ಎಂಟರ್‌ಪ್ರೈಸಸ್ 16,643 ಕೋಟಿ ರೂ. ಇಬಿಐಟಿಡಿಎ ದಾಖಲಿಸಿದೆ.

ಒಟ್ಟಾರೆಯಾಗಿ, FY26 ರಲ್ಲಿ ಅದಾನಿ ಸಮೂಹವು ಕೈಗೊಂಡಿರುವ ಈ ಬೃಹತ್ ಹೂಡಿಕೆಯು ಭಾರತದ ದೀರ್ಘಾವಧಿಯ ಆರ್ಥಿಕ ಬೆಳವಣಿಗೆಯ ಮೇಲಿಟ್ಟಿರುವ ನಂಬಿಕೆಯನ್ನು ಪ್ರತಿಬಿಂಬಿಸುತ್ತದೆ.

English summary

Adani Portfolio has reported a record-breaking capital expenditure of Rs 1.53 lakh crore for FY26, marking the highest investment by any Indian corporate house.