ಮಲೇಶಿಯಾದಲ್ಲೂ ನಿತ್ಯಾನಂದನ 'ಲೀಲೆ'?

ಬೆಂಗಳೂರು, ಏ. 10 : ರಂಜಿತಾ ಜೊತೆ ರಾಸಲೀಲೆಯಾಡಿ ವಿಡಿಯೋದಲ್ಲಿ ಸಿಕ್ಕಿಬಿದ್ದ ಬಿಡದಿ ಧ್ಯಾನಪೀಠಂದ ಸ್ವಾಮಿ ನಿತ್ಯಾನಂದ ಎಲ್ಲಿದ್ದಾನೆ ಎಂಬ ಮಾಹಿತಿ ತನಿಖೆಯಲ್ಲಿ ತೊಡಗಿರುವ ಪೊಲೀಸರಿಗೂ ತಿಳಿದಿಲ್ಲ. ಇಂದು ಬರುವೆ ಅಂದು ಬರುವೆ ಅಗತ್ಯ ಬಿದ್ದರೆ ಶರಣಾಗುವೆ ಎಂದೆಲ್ಲ ರೈಲು ಬಿಡುತ್ತಿರುವ ನಿತ್ಯಾನಂದ ತನ್ನ ನಗುಮೊಗವನ್ನು ಆಗಾಗ ಬಿಡುಗಡೆ ಮಾಡಿದ ವಿಡಿಯೋಗಳಲ್ಲಿ ಮಾತ್ರ ತೋರಿಸುತ್ತಿದ್ದಾನೆ.

ಈ ನಡುವೆ, ನಿತ್ಯಾನಂದನನ್ನು ಬೆನ್ನತ್ತಿರುವ ತನಿಖಾ ತಂಡ ವಿದೇಶಗಳಲ್ಲಿಯೂ 'ಲೀಲೆ' ತೋರಿಸಿರುವ ಬಗ್ಗೆ ಸಾಕ್ಷ್ಯ ಹುಡುಕಲು ಮಲೇಶಿಯಾಗೆ ಅಧಿಕಾರಿಗಳನ್ನು ಕಳಿಸಲು ಯೋಚಿಸುತ್ತಿದೆ. ಈಗಾಗಲೆ ತಿಳಿದಿರುವಂತೆ ಅನೇಕ ರಾಷ್ಟ್ರಗಳಲ್ಲಿ ನಿತ್ಯಾನಂದ ಆಶ್ರಮ ಹೊಂದಿದ್ದಾನೆ. ಅಲ್ಲಿಯೂ ಲೈಂಗಿಕ ಹಗರಣ ನಡೆದಿರಬಹುದಾ ಎಂಬುದು ಪೊಲೀಸರ ಅನುಮಾನ.

ಈ ಕುರಿತಂತೆ ನಂಬಲರ್ಹವಾದ ಮಾಹಿತಿ ದೊರೆತರೆ ತನಿಖಾಧಿಕಾರಿಗಳನ್ನು ಮಲೇಶಿಯಾಗೆ ಕಳುಹಿಸಲಾಗುವುದು ಎಂದು ಬೆಂಗಳೂರು ಸಿಐಡಿ ಸುಪರಿಂಟೆಂಡೆಂಟ್ ಆಫ್ ಪೊಲೀಸ್ ಕೆಎನ್ ಯೋಗಪ್ಪ ತಿಳಿಸಿದ್ದಾರೆ.

ಸಿಐಡಿಗೆ ಈಗಾಗಲೆ 6 ವಿಭಿನ್ನ ಮಹಿಳೆಯರೊಂದಿಗೆ ಸ್ವಾಮಿ ನಿತ್ಯಾನಂದ ಸರಸವಾಡಿರುವ 30 ವಿಡಿಯೋ ಟೇಪುಗಳನ್ನು ಸಿಐಡಿಗೆ ದೊರೆತಿವೆ. ಆದರೆ, ಅವುಗಳ ಸತ್ಯಾಸತ್ಯತೆಯ ಬಗ್ಗೆ ಪರಾಮರ್ಶಿಸಬೇಕಾಗಿದೆ ಎಂದು ಅವರು ಹೇಳಿದ್ದಾರೆ. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸುಮಾರು 29 ಜನರನ್ನು ವಿಚಾರಿಸಲಾಗಿದೆ.