ಆಟೋರಿಕ್ಷಾ ಪ್ರಯಾಣಿಕರನ್ನು ವಂಚಿಸಿದರೆ ಕ್ರಮ

ಬೆಂಗಳೂರು, ಫೆ.7: ಆಟೋರಿಕ್ಷಾಗಳಲ್ಲಿ ಮೀಟರ್ ಟ್ಯಾಂಪರ್ ಮಾಡುವ ಮೂಲಕ ನಿಗದಿತ ದರಕ್ಕಿಂತ ಹೆಚ್ಚಿನ ದರ ವಸೂಲಿ ಮಾಡಿ ಸಾರ್ವಜನಿಕ ಪ್ರಯಾಣಿಕರನ್ನು ವಂಚಿಸುತ್ತಿರುವ ಪ್ರಕರಣಗಳ ಸಂಖ್ಯೆ ಅಧಿಕವಾಗುತ್ತಿದೆ. ಈ ಬಗ್ಗೆ ಅಧಿಕ ಸಂಖ್ಯೆಯ ದೂರುಗಳು ದೂರವಾಣಿ ಮತ್ತು ಇ-ಮೇಲ್ ಮೂಲಕ ಸಾರಿಗೆ ಇಲಾಖೆಯ ಗಮನಕ್ಕೂ ಬಂದಿವೆ.

ಇದಲ್ಲದೆ, ಡಿಜಿಟಲ್ ಫೇರ್ ಮೀಟರ್ ಗಳನ್ನೂ ಸಹ ಟ್ಯಾಂಪರ್ ಮಾಡುತ್ತಿರುವ ಬಗ್ಗೆ ಎಲೆಕ್ಟ್ರಾನಿಕ್ ಮಾಧ್ಯಮಗಳಲ್ಲಿ ಒಂದು ವರದಿಯು ಪ್ರಸಾರವಾಗಿರುತ್ತದೆ. ಈ ಹಿನ್ನೆಲೆಯಲ್ಲಿ, ಸಾರಿಗೆ ಇಲಾಖೆ ಮತ್ತು ಕಾನೂನು ಮಾಪನ ಶಾಸ್ತ್ರ ಇಲಾಖೆಯ ಅಧಿಕಾರಿಗಳ ಸಹಯೋಗದೊಂದಿಗೆ ಇಂತಹ ಆಟೋರಿಕ್ಷಾಗಳ ಪರಿಶೀಲನೆಗಾಗಿ ಜಂಟಿ ತಪಾಸಣಾ ಕಾರ್ಯವನ್ನು ನಡೆಸಲಾಗುವುದು.

ಯಾವುದೇ ಆಟೋರಿಕ್ಷಾ ಮೀಟರ್ ಟ್ಯಾಂಪರ್ ಮಾಡಿರುವುದು ಕಂಡುಬಂದಲ್ಲಿ, ಅಂತಹ ಆಟೋರಿಕ್ಷಾ ಹೊಂದಿರುವ ರಹದಾರಿಯನ್ನು ಅಮಾನತ್ತು/ ರದ್ದುಪಡಿಸುವ ಕ್ರಮ ವಹಿಸುವುದಲ್ಲದೆ, ಚಾಲಕರು ಮತ್ತು ಮಾಲೀಕರ ವಿರುದ್ಧ ಭಾರತೀಯ ದಂಡ ಸಂಹಿತೆ (ಐ.ಪಿ.ಸಿ.)ಪ್ರಕಾರ ಕ್ರಿಮಿನಲ್ ಮೊಕದ್ದಮೆಯನ್ನೂ ಸಹ ದಾಖಲಿಸಲಾಗುವುದೆಂದು ಸಾರಿಗೆ ಆಯುಕ್ತರ ಕಛೇರಿ ಪ್ರಕಟಣೆ ತಿಳಿಸಿದೆ.

ಕಿರಿಕ್ ಮಾಡೋ ಆಟೋ ಚಾಲಕರನ್ನು ಸುಮ್ಮನೇ ಬಿಡಬೇಡಿ!