ಅಮೆರಿಕಾದಲ್ಲಿ ರೀಡರ್ಸ್ ಡೈಜಸ್ಟ್ ದಿವಾಳಿ

ಬೆಂಗಳೂರು, ಆ. 18 : ಕೋಟ್ಯಂತರ ಓದುಗರ ಅಚ್ಚುಮೆಚ್ಚಿನ ಮಾಸ ಪತ್ರಿಕೆ ರೀಡರ್ಸ್ ಡೈಜಸ್ಟ್ ದಿವಾಳಿಯ ಅಂಚಿಗೆ ಬಂದು ನಿಂತಿದೆ. ಪ್ರಪಂಚದ ಅತಿ ಹೆಚ್ಚು ಪ್ರಸಾರವುಳ್ಳ ಪತ್ರಿಕೆಯ ಖ್ಯಾತಿಯ ಡೈಜೆಸ್ಟ್, ಅಮೆರಿಕಾದಲ್ಲಿ ದಿವಾಳಿ ಘೋಷಿಸಲು ನಿರ್ಧರಿಸಿದೆ. ಆದರೆ, ಭಾರತ ಸೇರಿದಂತೆ ಇನ್ನಿತರ ಹತ್ತಾರು ದೇಶಗಳಲ್ಲಿ ತನ್ನ ಪ್ರಕಟಣೆಯನ್ನು ಹಾಗೆಯೇ ಉಳಿಸಿಕೊಳ್ಳುವುದಾಗಿ ಹೇಳಿಕೊಂಡಿದೆ.

ತನ್ನ ಸಾಲದ ಹೊರೆಯ ಪ್ರಮಾಣವನ್ನು ಶೇಕಡಾ 75 ರಷ್ಟು ಉಳಿಸುವ ಉದ್ದೇಶದಿಂದ ರೀಡರ್ಸ್ ಡೈಜಸ್ಟ್ ಅಸೋಸಿಯೇಷನ್ ದಿವಾಳಿ ಪಡೆಯಲು ಅಮೆರಿಕಾದಲ್ಲಿ ಮುಂದಾಗಿದ್ದು, ಈ ಹೆಜ್ಜೆಯಿಂದ ಆರ್ಥಿಕ ಸ್ಥಿತಿಗತಿಯನ್ನು ಅಷ್ಟರಮಟ್ಟಿಗೆ ಸುಧಾರಿಸಿಕೊಳ್ಳುವ ಸನ್ನಾಹ ವ್ಯಕ್ತ ಪಡಿಸಿದೆ. ರೀಡರ್ಸ್ ಡೈಜಸ್ಟ್ ಅಸೋಸಿಯೇಷನ್ ( RDA ) ಒಂದು ಪ್ರಖ್ಯಾತ ಪ್ರಕಟಣಾ ಸಂಸ್ಥೆಯಾಗಿದ್ದು 44 ದೇಶಗಳಲ್ಲಿ ತನ್ನ ಕಚೇರಿ ಹೊಂದಿದೆ. ಡೈಜೆಸ್ಟ್ ಮಳಿಗೆಗಳ ಮೂಲಕ ಕಂಪನಿಯು ಪುಸ್ತಕ, ಮ್ಯಾಗಜೀನ್, ಮ್ಯೂಸಿಕ್ ಮತ್ತು ವಿಡಿಯೋಗಳ ಮಾರಾಟ ಮಾಡುತ್ತಿದೆ. ಒಟ್ಟಾರೆ 78 ದೇಶಗಳಲ್ಲಿ ಪತ್ರಿಕೆ ಪ್ರಸಾರ ಹೊಂದಿದ್ದು 130 ದಶಲಕ್ಷ ಗ್ರಾಹಕ ಬಲ ಹೊಂದಿದೆ.

ರೀಡರ್ಸ್ ಡೈಜಸ್ಟ್ ಮಾಸಪತ್ರಿಕೆ ಸೇರಿದಂತೆ ಕಂಪನಿ ಒಟ್ಟು 94 ಪ್ರಕಟಣೆಗಳನ್ನು ಹೊರತರುತ್ತದೆ. ವರ್ಷವೊಂದಕ್ಕೆ ಸುಮಾರು 40 ದಶಲಕ್ಷ ಪುಸ್ತಕ, ಪುರವಣಿ, ವಿಡಿಯೋ ಮಾರಾಟ ಆಗುತ್ತದೆ. ಈಗ ತನಗೆ ಸಾಲ ಕೊಟ್ಟವರ ಬಳಿ ಕಂಪನಿಯು ಒಂದು ಒಡಂಬಡಿಕೆ ಮಾಡಿಕೊಂಡಿದೆ. ಆ ಪ್ರಕಾರ 2.2 ಬಿಲಿಯನ್ ಡಾಲರ್ ಸಾಲದ ಹೊರೆಯನ್ನು 550 ದಶಲಕ್ಷ ಡಾಲರುಗಳಿಗೆ ಇಳಿಸುವ ಚಿಂತನೆ ಮಾಡಿದೆ. ಎಂಥ ಪತ್ರಿಕೆಗೆ ಎಂಥ ದುರ್ಗತಿ ಬಂತಪ್ಪಾ, ಅದೂ ಅಮೆರಿಕಾದಲ್ಲಿ! Lifes like that.

(ಏಜೆನ್ಸೀಸ್)