ಮೊದಲ ಹಂತದ 124 ಕ್ಷೇತ್ರಗಳಲ್ಲಿ ಮತದಾನ

ನವದೆಹಲಿ, ಏ. 16 : ಹದಿನೈದನೇ ಲೋಕಸಭೆ ಚುನಾವಣೆಯ ಮೊದಲ ಹಂತದ ಮತದಾನ ಇಂದು ಆರಂಭವಾಗಿದೆ. 15 ರಾಜ್ಯ ಮತ್ತು ಎರಡು ಕೇಂದ್ರಾಡಳಿತ ಪ್ರದೇಶಗಳ 124 ಕ್ಷೇತ್ರಗಳಲ್ಲಿ ಮತದಾನ ಶುರುವಾಗಿದೆ. 1715 ಮಂದಿ ಸ್ಪರ್ಧಿಸುತ್ತಿದ್ದಾರೆ. ಇವರಲ್ಲಿ 122 ಮಂದಿ ಮಹಿಳಾ ಹುರಿಯಾಳುಗಳಿದ್ದಾರೆ.

1,85,552 ಮತದಾನ ಕೇಂದ್ರಗಳನ್ನು ಸಿದ್ಧಪಡಿಸಲಾಗಿದೆ. 9 ಲಕ್ಷ ಮಂದಿ ಮತಗಟ್ಟೆ ಅಧಿಕಾರಿಗಳು ಕಾರ್ಯನಿರ್ವಹಿಸುತ್ತಿದ್ದಾರೆ. ಸುಮಾರು 3 ಲಕ್ಷ ಮತಯಂತ್ರಗಳನ್ನು ಬಳಸಲಾಗುತ್ತಿದೆ. 23 ಸಾವಿರ ಗ್ರಾಮಗಳನ್ನು ಸೂಕ್ಷ್ಮ ಮತಗಟ್ಟೆ ಎಂದು ಗುರುತಿಸಲಾಗಿದೆ. ಮೊದಲ ಹಂತದ ಚುನಾವಣೆಯಲ್ಲಿ ಕೇಂದ್ರ ರೈಲ್ವೆ ಸಚಿವ ಲಾಲು ಪ್ರಸಾದ್ ಯಾದವ್, ಮನೋಹರ ಜೋಶಿ, ಶಶಿ ತರೂರ್, ರೇಣುಕಾ ಚೌಧರಿ, ನಟಿ ವಿಜಯ್ ಶಾಂತಿ ಅವರ ಭವಿಷ್ಯವನ್ನು ಇಂದು ಮತದಾರರು ಬರೆಯಲಿದ್ದಾರೆ.

ಕೇರಳ -20, ಛತ್ತೀಸ್ ಗಢ್-11, ಮೇಘಾಲಯ-2, ಬಿಹಾರ-13, ಉತ್ತರ ಪ್ರದೇಶ-16, ಮಹಾರಾಷ್ಟ್ರ-13, ಆಂಧ್ರಪ್ರದೇಶ-22, ಜಾರ್ಖಂಡ್-6, ಒರಿಸ್ಸಾ-10, ಅಸ್ಸಾಂ-3, ಅರುಣಾಚಲ ಪ್ರದೇಶ-2, ಮಣಿಪುರ-1, ಜಮ್ಮು ಕಾಶ್ಮೀರ-1, ಮಿಜೋರಾಂ ಹಾಗೂ ನಾಗಾಲ್ಯಾಂಡ್ ತಲಾ 1 ಸ್ಥಾನಗಳಿಗೆ ಮತದಾನ ನಡೆಯಲಿದೆ. ಕೇಂದ್ರಾಡಳಿತ ಪ್ರದೇಶಗಳಾದ ಲಕ್ಷದ್ವೀಪ ಮತ್ತು ಅಂಡಮಾನ್ ದ್ವೀಪದಲ್ಲಿ ತಲಾ 1 ಸ್ಥಾನಗಳಿಗೆ ಗುರುವಾರವೇ ಮತದಾನ ನಡೆಯಲಿದೆ. ಲೋಕಸಭೆ ಜೊತೆಗೆ ಆಂಧ್ರಪ್ರದೇಶ 154 ಹಾಗೂ ಒರಿಸ್ಸಾದ 70 ವಿಧಾನಸಭೆ ಕ್ಷೇತ್ರಗಳಲ್ಲಿ ಮತದಾನ ನಡೆಯಲಿದೆ. ನಕ್ಸಲ್ ಭೀತಿ ಎದುರಿಸುತ್ತಿರುವ ರಾಜ್ಯಗಳಿಗೆ ಬಾರಿ ಬಂದೋಬಸ್ತ್ ನಿಯೋಜಿಸಲಾಗಿದೆ.

(ದಟ್ಸ್ ಕನ್ನಡ ವಾರ್ತೆ)