ಯುಬಿಎಸ್ ಬ್ಯಾಂಕ್ : 9 ಸಾವಿರ ಮಂದಿಗೆ ಪಿಂಕ್ ಸ್ಲಿಪ್

ಸ್ವಿಜರ್ ಲ್ಯಾಂಡ್, ಏ. 15 : ಜಾಗತಿಕ ಮಾರುಕಟ್ಟೆಯಲ್ಲಿ ಉಂಟಾಗಿರುವ ಆರ್ಥಿಕ ಬಿಕ್ಕಟ್ಟು ಇನ್ನೂ ಮುಂದುವರೆದಿದ್ದು, ಸ್ವಿಜರ್ ಲ್ಯಾಂಡ್ ನ ಬಹುದೊಡ್ಡ ಬ್ಯಾಂಕ್ ಎನಿಸಿರುವ ಯುಬಿಎಸ್ ಬ್ಯಾಂಕ್ ನ 9000 ಉದ್ಯೋಗಿಗಳಿಗೆ ಪಿಂಕ್ ಸ್ಲಿಪ್ ನೀಡಲು ಮುಂದಾಗಿದೆ. ಜುರಿಚ್ ನಲ್ಲಿ ನಡೆದ ಬ್ಯಾಂಕ್ ನ ವಾರ್ಷಿಕ ಸಭೆಯಲ್ಲಿ ಯುಬಿಸಿ ಬ್ಯಾಂಕ್ ಮುಖ್ಯ ಕಾರ್ಯ ನಿರ್ವಾಹಕ ಗ್ರುಬೆಲ್ ಓಸ್ವಾಲ್ಡ್ ತಿಳಿಸಿದರು.

ಜಾಗತಿಕ ಆರ್ಥಿಕ ಬಿಕ್ಕಟ್ಟು ಉಂಟಾಗಿ 10 ತಿಂಗಳು ಕಳೆಯುತ್ತಾ ಬಂದಿದೆ. ಬ್ಯಾಂಕ್ ಗೆ ಅಪಾರ ಪ್ರಮಾಣದ ನಷ್ಟವೂ ಉಂಟಾಗಿದೆ. ಇಷ್ಟಾದರೂ ಕೂಡಾ ಬ್ಯಾಂಕ್ ನ ಉದ್ಯೋಗಿಗಳಿಗೆ ಪಿಂಕ್ ಸ್ಲಿಪ್ ಎಂದೂ ಚಿಂತನೆ ನಡೆಸಿರಲಿಲ್ಲ. ಆದರೆ, ಇತ್ತೀಚೆಗೆ ಬ್ಯಾಂಕ್ ಗೆ ಭಾರಿ ನಷ್ಟ ಉಂಟಾಗುತ್ತಿದ್ದು, ಅನಿವಾರ್ಯವಾಗಿ ಈ ಕ್ರಮ ಕೈಗೊಳ್ಳಬೇಕಾಗಿದೆ. ಬ್ಯಾಂಕ್ ನ ಒಟ್ಟು ನಷ್ಟ 17 ಬಿಲಿಯನ್ ಡಾಲರ್ ಆಗಿದೆ. ವೃತ್ತಿಪರತೆ ತೋರಿಸಲು ವೈಪಲ್ಯ ಕಂಡಿರುವ ಉದ್ಯೋಗಿಗಳಿಗೆ ಮುಂದಿನ ದಿನಗಳಲ್ಲಿ ಉದ್ಯೋಗ ಭದ್ರತೆ ನೀಡಲು ಸಾಧ್ಯವಿಲ್ಲ ಎಂದು ಗ್ರುಬೆಲ್ ವಿವರಿಸಿದರು.

ಯುಬಿಎಸ್ ಬ್ಯಾಂಕ್ ನಲ್ಲಿ ಒಟ್ಟು 76,200 ಉದ್ಯೋಗಿಗಳು ಕೆಲಸ ಮಾಡುತ್ತಿದ್ದರು. ಈಗಾಗಲೇ 2000 ಮಂದಿಯನ್ನು ಮನೆಗೆ ಕಳಿಹಿಸಿರುವ ಯುಬಿಎಸ್, ಇದೀಗ ಮತ್ತೆ 9000 ಉದ್ಯೋಗಿಗಳಿಗೆ ಪಿಂಕ್ ಸ್ಲಿಪ್ ನೀಡುವುದಾಗಿ ಹೇಳಿದೆ.

(ದಟ್ಸ್ ಕನ್ನಡ ವಾರ್ತೆ)