ಐಐಎಂಬಿ ಶುಲ್ಕ 11 ಲಕ್ಷ ರುಪಾಯಿಗೆ ಏರಿಕೆ

ಬೆಂಗಳೂರು, ಏ. 3 : ದಿ ಇಂಡಿಯನ್ ಇನ್ಸ್ ಸ್ಟಿಟ್ಯೂಟ್ ಆಪ್ ಮ್ಯಾನೇಜ್ ಮೆಂಟ್ (ಐಐಎಂಬಿ) 2009-10 ನೇ ಶೈಕ್ಷಣಿಕ ವರ್ಷದಿಂದ ಸ್ನಾತಕೋತ್ತರ ಪದವಿಯ ಶುಲ್ಕವನ್ನು 9.5 ಲಕ್ಷದಿಂದ 11 ಲಕ್ಷಕ್ಕೆ ರುಪಾಯಿಗೆ ಹೆಚ್ಚಸಲಾಗಿದೆ. ಪ್ರವೇಶ ಮಿತಿಯನ್ನು 275 ರಿಂದ 350ಕ್ಕೆ ಏರಿಸಲಾಗಿದೆ.

ಐಐಎಂಬಿ ಪಿಜಿ ಕೋರ್ಸ್ ಗೆ ಪ್ರವೇಶ ಪಡೆಯುವ ವಿದ್ಯಾರ್ಥಿಗಳು ಮೊದಲ ವರ್ಷ 5.25 ಲಕ್ಷ ರುಪಾಯಿ ಹಾಗೂ ಎರಡನೇ ವರ್ಷ 5.75 ಲಕ್ಷ ರುಪಾಯಿಯನ್ನು ಪಾವತಿಸಬೇಕಾಗುತ್ತದೆ. ಈ ಮೊದಲು ಸ್ನಾತಕೋತ್ತರ ಪದವಿ ಕೋರ್ಸ್ ಗೆ 9.5 ಲಕ್ಷ ರುಪಾಯಿ ನಿಗದಿಪಡಿಸಲಾಗಿತ್ತು. ಮೊದಲ ವರ್ಷ 4.5 ಲಕ್ಷ ರುಪಾಯಿ ಹಾಗೂ ಎರಡನೇ ವರ್ಷ 5 ಲಕ್ಷ ರುಪಾಯಿ ಪಾವತಿಸಬೇಕಾಗಿತ್ತು. ಆದರೆ, ಈ ಬಾರಿ ಶುಲ್ಕ ಪರಿಷ್ಕರಿಸಲು ಐಐಎಂಬಿ ಆಡಳಿತ ಮಂಡಳಿ ಸಭೆ ನಿರ್ಣಯ ಕೈಗೊಂಡಿದೆ ಎಂದು ಐಐಎಂಬಿ ನಿರ್ದೇಶಕ ಪಂಕಜ್ ಚಂದ್ರ ತಿಳಿಸಿದರು

ಆರನೇ ವೇತನ ಆಯೋಗದ ಪ್ರಕಾರ ಬೋಧಕ ವರ್ಗದ ವೇತನ ಮತ್ತು ಪಿಂಚಣಿಯಲ್ಲಿ ಹೆಚ್ಚಳವಾಗಿದೆ. ಅಲ್ಲದೇ ಹಿಂದುಳಿದ ವರ್ಗಗಳ ಕೋಟಾದಲ್ಲಿ ಪ್ರವೇಶ ಪಡೆಯುವ ವಿದ್ಯಾರ್ಥಿಗಳಿಗೆ ಮೂಲಭೂತ ಸೌಕರ್ಯಗಳನ್ನು ಕಲ್ಪಿಸಬೇಕಿದೆ. ಈ ಕಾರಣದಿಂದ ಶುಲ್ಕ ಹೆಚ್ಚಿಸುವ ತೀರ್ಮಾನ ಕೈಗೊಳ್ಳಲಾಗಿದೆ ಎಂದು ಪಂಕಜ್ ಚಂದ್ರ ಹೇಳಿದರು.

(ದಟ್ಸ್ ಕನ್ನಡ ವಾರ್ತೆ)