ಬೆಳಗಾವಿ ಬಳಿ ಮೂರು ಸಜೀವ ಬಾಂಬ್ ಪತ್ತೆ

ಬೆಳಗಾವಿ, ಫೆ.20:ಹುಕ್ಕೇರಿ ತಾಲೂಕಿನ ಭೈರಾಪುರ ಗ್ರಾಮದ ಸಣ್ಣ ನೀರಾವರಿ ಇಲಾಖೆಗೆ ಸೇರಿದ ಕೆರೆಯಲ್ಲಿ ಮೂರು ಸಜೀವ ಶಕ್ತಿಶಾಲಿ ಬಾಂಬ್ ಗಳು ಪತ್ತೆಯಾಗಿವೆ.ಸಂಕೇಶ್ವರ ಪೊಲೀಸ್ ಠಾಣೆಯಿಂದ ಭೈರಾಪುರ 6 ಕಿ.ಮೀ. ದೂರದಲ್ಲಿದೆ.

ಬಾಂಬ್ ಗಳನ್ನು ಕಂಡ ದನಗಾಹಿ ಹುಡುಗರು ಸಂಕೇಶ್ವರ ಪೊಲೀಸ್ ಠಾಣೆಗೆ ಸುದ್ದಿ ಮುಟ್ಟಿಸಿದರು. ಕೂಡಲೆ ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಇವು ಸಜೀವ ಬಾಂಬ್ ಗಳೆಂದು ಖಚಿತಪಡಿಸಿದ್ದಾರೆ. ಎರಡು ವರ್ಷದ ಹಿಂದೆಯೇ ಈ ಬಾಂಬ್ ಗಳನ್ನು ಕೆರೆಗೆ ಎಸೆಯಲಾಗಿದೆ. ಕೆರೆಯ ನೀರು ಬತ್ತಿದ್ದರಿಂದ ಈ ಬಾಂಬ್ ಗಳು ಕಾಣಿಸಿಕೊಂಡಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಭೈರಾಪುರ ಗ್ರಾಮದಲ್ಲಿ ಸುಮಾರು 50 ಜನ ಸೈನಿಕರಿದ್ದು ರಜೆಯಿಂದ ಮರಳುವಾಗ ಈ ಬಾಂಬ್ ಗಳನ್ನು ಕೆರೆಗೆ ಎಸೆದಿರಬಹುದು ಎಂದು ಸಂಕೇಶ್ವರ ಪೊಲೀಸರು ಶಂಕಿಸಿದ್ದಾರೆ.

(ದಟ್ಸ್ ಕನ್ನಡ ವಾರ್ತೆ)