ಪಬ್ ಬಾರ್‌ಗಳ ಕಿಕ್ ಇಳಿಸಿದ ಆರ್ಥಿಕ ಹಿಂಜರಿತ

ಬೆಂಗಳೂರು, ಜ. 5 : ಮುಗ್ಗರಿಸಿರುವ ಜಾಗತಿಕ ಆರ್ಥಿಕ ಪರಿಸ್ಥಿತಿಯಿಂದಾಗಿ ಕೆಲಸ ಕಳೆದುಕೊಳ್ಳುವಿಕೆ, ಸಂಬಳದಲ್ಲಿ ಕಡಿತ, ಕಂಪನಿಗಳ ಮುಚ್ಚುವಿಕೆಯಂಥ ಪ್ರತ್ಯಕ್ಷ ದುಷ್ಪರಿಣಾಮ ಉಂಟಾಗಿದ್ದರೆ ಪರೋಕ್ಷವಾಗಿ ಕುಡಿತದಿಂದ ಸರ್ವನಾಶವಾಗುತ್ತಿದ್ದ ಕುಟಂಬಗಳಿಗೆ ಮಾನಸಿಕ ನೆಮ್ಮದಿಯನ್ನು ತಂದಿದೆ.

ಆರ್ಥಿಕ ಸಂಕಷ್ಟದಿಂದಾಗಿ ಕುಡುಕರು ಎಚ್ಚೆತ್ತಿರುವುದರಿಂದ ಬೆಂಗಳೂರಿನ ಬಾರ್ ಮತ್ತು ಪಬ್ ಮಾಲಿಕರು ಬಾಯಿಬಡಿದುಕೊಳ್ಳುತ್ತಿದ್ದಾರೆ. ಕಳೆದ ಮೂರು ತಿಂಗಳಲ್ಲಿ ಮದ್ಯ ಮಾರಾಟದ ಪ್ರಮಾಣ ಶೇ.40ಕ್ಕೂ ಹೆಚ್ಚು ಕಡಿಮೆಯಾಗಿದೆ. ಸಾಯಂಕಾಲವಾದರೆ ಗಿಜುಗುಡುತ್ತಿದ್ದ ಬಾರ್ ಗಳು ಬಿಕೋ ಎನ್ನುತ್ತಿವೆ. ಕುಡಿಯಲೇಬೇಕೆನ್ನುವವರು ಕೂಡ ಕಡಿಮೆ ಬೆಲೆಯ ಸಾರಾಯಿಗೆ ಮೊರೆ ಹೋಗುತ್ತಿದ್ದಾರೆ.

ಬೆಂಗಳೂರಿನಲ್ಲೇ ಅನೇಕ ಸಾಫ್ಟ್ ವೇರ್ ಕಂಪನಿಗಳು ಕಣ್ಣುಮುಚ್ಚಿವೆ. ಸಾವಿರಾರು ತಂತ್ರಜ್ಞರು ಕೆಲಸ ಕಳೆದುಕೊಂಡಿದ್ದಾರೆ. ಕೆಲಸದಲ್ಲಿ ಇದ್ದವರಿಗೂ ಸಂಬಳ ಹೆಚ್ಚು ಮಾಡಿಲ್ಲ. ಈ ವಿಪರೀತ ಪರಿಸ್ಥಿತಿಯನ್ನು ಎದುರಿಸಲು 'ಬೀರ್'ಬಲ್ಲರು ಬಾರ್ ನತ್ತ ತಲೆ ಹಾಕುತ್ತಿಲ್ಲ. ಮಾನಸಿಕ ಕ್ಲೇಶ ಕಳೆದುಕೊಳ್ಳಲು ಬಾರ್ ಗೆ ಎಡತಾಕುತ್ತಿದ್ದ ಜನ ಕಿಸೆ ಖಾಲಿಯಾದ್ದರಿಂದ ಬೇರೆ ದಾರಿಯಿಲ್ಲದೆ ಮನೆಯತ್ತ ಕಾಲು ಹಾಕುತ್ತಿದ್ದಾರೆ.

"ಇಂಥ ಕೆಟ್ಟ ಪರಿಸ್ಥಿತಿಯನ್ನು ನಾವು ಎಂದೂ ಎದುರಿಸಿರಲಿಲ್ಲ. ಸಾರಾಯಿ ಅಂಗಡಿ, ಬಾರ್ ಮತ್ತು ಪಬ್ ಗಳಲ್ಲಿ ಮಾರಾಟ ತೀವ್ರವಾಗಿ ಇಳಿಮುಖವಾಗಿದೆ. ನಿಯಮಿತವಾಗಿ ಬರುತ್ತಿದ್ದ ಗಿರಾಕಿಗಳೂ ಹೆಚ್ಚು ವೆಚ್ಚ ಮಾಡುತ್ತಿಲ್ಲ. ಹೊಸವರ್ಷಾಚರಣೆಯಂದು ಕೂಡ ಮದ್ಯ ಮಾರಾಟದ ಪ್ರಮಾಣ ಕಳೆದ ವರ್ಷದಷ್ಟಿರಲಿಲ್ಲ." ಎಂದು ಬೆಂಗಳೂರು ಬಾರ್ ಮಾಲಿಕರ ಸಂಘದ ಅಧ್ಯಕ್ಷ ಆಶಿಶ್ ಕೋಠಾರಿ ಅಳಲು ತೋಡಿಕೊಂಡಿದ್ದಾರೆ.

(ದಟ್ಸ್ ಕನ್ನಡ ವಾರ್ತೆ)