ಭಾರತದ ಹಿರಿಯಜ್ಜ ಹಬೀಬ್ ಮಿಂಯಾ ಇನ್ನಿಲ್ಲ

ಜೈಪುರ, ಆ. 19 : ರಾಜಸ್ಥಾನದ ಜೈಪುರದಲ್ಲಿ ಬದುಕಿ ಬಾಳಿದ ಭಾರತದ ಅತಿಹೆಚ್ಚು ವಯೋವೃದ್ಧ ಹಬೀಬ್ (138) ಮಂಗಳವಾರ ಇಲ್ಲಿ ನಿಧನರಾದರು. ಅವರು ಜೈಪುರ ಅರಮನೆಯ ವಾದ್ಯವೃಂದದಲ್ಲಿ ತುತ್ತೂರಿ ನುಡಿಸುತ್ತಿದ್ದರು.

ಕೇವಲ ಭಾರತವಲ್ಲ, ಹಬೀಬ್ ಅವರು ಪ್ರಪಂಚದ ಅತ್ಯಂತ ಹಿರಿಯ ಜೀವಿ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದ್ದರು. ಆದರೆ, ದಾಖಲೆಗಳ ಪ್ರಕಾರ ಹಬೀಬ್ ಅವರ ಅಧಿಕೃತ ವಯಸ್ಸು ಗಿನ್ನಿಸ್ ದಾಖಲೆಗೆ ಅವಶ್ಯವಾಗಿದ್ದ ವಯಸ್ಸಿಗಿಂತ 8 ವರ್ಷ ಕಡಿಮೆ ಇತ್ತು. ಇದೇ ಕಾರಣದಿಂದಾಗಿ ಗಿನ್ನಿಸ್ ಸಂಸ್ಥೆ ಅವರ ಹೆಸರನ್ನು ದಾಖಲು ಮಾಡಿರಲಿಲ್ಲ.

ಹಬೀಬ್ ಅವರ ಜನ್ಮನಾಮ ರಹೀಂ ಖಾನ್ ಎಂದಿತ್ತು. ಅವರ ಬಳಿಯಿದ್ದ ದಾಖಲೆಗಳಲ್ಲಿ ಜನನ ದಿನಾಂಕ ಮೇ 20, 1870 ಎಂದು ನಮೂದಾಗಿತ್ತು. ಆದರೆ, ಅವರ ನಿವೃತ್ತಿ ವೇತನ ದಾಖಲೆಗಳಲ್ಲಿ ಇಸವಿ 20 ಮೇ 1878 ಎಂದು ದಾಖಲಾಗಿತ್ತು. ಸೋಮವಾರ ರಾತ್ರಿ ಅವರ ಆರೋಗ್ಯ ಹಳಿತಪ್ಪಿತು. ಜೈಪುರದ ಎಸ್ಎಂಎಸ್ ಆಸ್ಪತೆಗೆ ಅವರನ್ನು ದಾಖಲು ಮಾಡಲಾಗಿತ್ತು. ಆದರೂ ಅವರು ಬದುಕಿ ಉಳಿಯಲಾಗಲಿಲ್ಲ. ಭರತ ಖಂಡದ ಹಿರಿಯಜ್ಜನ ಆತ್ಮಕ್ಕೆ ಶಾಂತಿ ದೊರಕಲಿ.

ಹಬೀಬ್ ಯಾವ ಪರಿ ಸೂಕ್ಷ್ಮ ಮನಸ್ಸಿನ ಮತ್ತು ಭಾವುಕ ಜೀವಿಯಾಗಿದ್ದರೆಂದರೆ, ಮೇ 13ರಂದು ಜೈಪುರದಲ್ಲಿ ಸರಣಿ ಬಾಂಬ್ ಸ್ಫೋಟದಲ್ಲಿ 60ಕ್ಕೂ ಹೆಚ್ಚು ಜನ ಸಾವನ್ನಪ್ಪಿದ ಹಿನ್ನೆಲೆಯಲ್ಲಿ ತಮ್ಮ ಜನ್ಮದಿನವನ್ನು ಆಚರಿಸಿಕೊಳ್ಳಲಿಲ್ಲ. ಕೆಲ ಸ್ವಯಂಸೇವೆ ಸಂಸ್ಥೆಗಳು ಮೇ 20ರಂದು ಅವರ ಜನ್ಮದಿನವನ್ನು ಆಚರಿಸಲು ಮುಂದೆ ಬಂದರೂ ಅವರು ಖಡಾಖಂಡಿತವಾಗಿ ನಿರಾಕರಿಸಿದರು. ಈ ಸಂದರ್ಭದಲ್ಲಿ ಹಬೀಬ್, "ನನ್ನ ಜೀವಮಾನದಲ್ಲಿ ಈ ಗುಲಾಬಿ ನಗರಿಯಲ್ಲಿ ಇಂಥ ಭಯಾನಕ ಘಟನೆಯನ್ನು ಯಾವತ್ತೂ ನೋಡಿಲ್ಲ. ಜೀವಹಾನಿಯಿಂದ ಅತೀವ ನೋವಾಗಿದೆ" ಎಂದು ಕಂಬನಿ ಮಿಡಿದಿದ್ದರು.

(ಯುಎನ್ಐ)