ಸಂಕಟ ಬಂದಾಗ ವೆಂಕಟರಮಣ: ಮತ್ತೆ ಕಮಲಧಾರಿಯಾದ ಅಡ್ವಾಣಿ !

ಸಂಕಟ ಬಂದಾಗ ವೆಂಕಟರಮಣ: ಮತ್ತೆ ಕಮಲಧಾರಿಯಾದ ಅಡ್ವಾಣಿ !
ಕಂಗೆಡದಿರಿ, ಕಷ್ಟದ ದಿನಗಳು ದೀರ್ಘವೇನೂ ಅಲ್ಲ- ವಾಜಪೇಯಿ

ಲೋಕಸಭೆ ಮತ್ತು ಮಹಾರಾಷ್ಟ್ರ ವಿಧಾನ ಸಭಾ ಚುನಾವಣೆ ನಂತರ ಬಿಜೆಪಿಗೆ ಚೈತನ್ಯ ತುಂಬಲು ಅಡ್ವಾಣಿ ಬಂದಿದ್ದಾರೆ. ಪಕ್ಷದ ನೂತನ ಅಧ್ಯಕ್ಷರಾಗಿ ಎಲ್‌.ಕೆ. ಅಡ್ವಾಣಿ ಬುಧವಾರ ಅಧಿಕೃತವಾಗಿ ಅಧಿಕಾರ ವಹಿಸಿಕೊಂಡರು. ಇದರೊಂದಿಗೆ ಸಂಕಷ್ಟ ಬಂದಾಗಲೆಲ್ಲ ವೆಂಕಟರಮಣ ಎನ್ನುವಂತೆ, ಬಿಜೆಪಿ ಕಷ್ಟದ ಹೊತ್ತಿನಲ್ಲಿ ಮತ್ತೆ ಅಡ್ವಾಣಿ ಅವರಿಗೇ ಮೊರೆ ಹೋದಂತಾಗಿದೆ.

ಬಿಜೆಪಿ ರಾಷ್ಟ್ರೀಯ ಮಂಡಳಿ ಸಭೆಯಲ್ಲಿ ಮಾತನಾಡಿದ ಅಡ್ವಾಣಿ, ಬಿಜೆಪಿ ತನ್ನ ಸಿದ್ಧಾಂತದಿಂದ ಹಿಂದೆ ಸರಿಯುವ ಮಾತೇ ಇಲ್ಲ. ಚುನಾವಣೆಯ ಬೆಲೆ ತೆತ್ತಾದರೂ ರಾಮಮಂದಿರ ನಿರ್ಮಾಣ ಖಚಿತ. ಮಂದಿರ ನಿರ್ಮಾಣದ ಬಗೆಗೆ ತಳೆದ ನಿಧಾನಗತಿ ಧೋರಣೆ ಚುನಾವಣೆಗಳಲ್ಲಿ ಬಿಜೆಪಿ ಸೋಲಿಗೆ ಕಾರಣವಾಯಿತು. ಸ್ವಾತಂತ್ರ್ಯನಂತರ ದೇಶದಲ್ಲಿ ಆಯೋಧ್ಯೆ ಚಳವಳಿ ಸಮರ್ಥವಾಗಿ ಹೊರಹೊಮ್ಮಿದೆ ಎಂದರು.

ಸಭೆಯಲ್ಲಿ ಮಾತನಾಡಿದ ಮಾಜಿ ಪ್ರಧಾನಿ ಅಟಲ್‌ ಬಿಹಾರಿ ವಾಜಪೇಯಿ- ಕತ್ತಲು ಕಡೆಯವರೆಗೆ ಉಳಿಯುವುದಿಲ್ಲ. ಕಾರ್ಯಕರ್ತರು ಹೊಸ ಉತ್ಸಾಹದಿಂದ ಹೋರಾಟ ಆರಂಭಿಸಬೇಕು ಎಂದರು.

(ಇನ್ಫೋ ವಾರ್ತೆ)

ಮುಖಪುಟ / ವಾರ್ತೆಗಳು