ಬೆಳೆ ರಕ್ಷಿಸಲು ಕಾವೇರಿ ಹರಿಸಿರಿ;ಧರ್ಮಸಿಂಗ್‌ಗೆ ತಮಿಳ್ನಾಡು ನಿಯೋಗ ಮೊರೆ

ಬೆಳೆ ರಕ್ಷಿಸಲು ಕಾವೇರಿ ಹರಿಸಿರಿ;ಧರ್ಮಸಿಂಗ್‌ಗೆ ತಮಿಳ್ನಾಡು ನಿಯೋಗ ಮೊರೆ
ರಾಜ್ಯ ಸರ್ಕಾರದ ನಿಲುವು ಅಚಲ - ವಿಧಾನಮಂಡಲದಲ್ಲಿ ಖರ್ಗೆ

ಕುರುವೈ ಬೆಳೆಗಳನ್ನು ರಕ್ಷಿಸಲು ಅನುಕೂಲವಾಗುವಂತೆ ಕಾವೇರಿ ನೀರನ್ನು ತಕ್ಷಣವೇ ಬಿಡುಗಡೆ ಮಾಡುವಂತೆತಮಿಳುನಾಡಿನ ನಿಯೋಗವೊಂದು ಮುಖ್ಯಮಂತ್ರಿ ಧರ್ಮಸಿಂಗ್‌ ಅವರನ್ನು ಬುಧವಾರ ಒತ್ತಾಯಿಸಿತು.

ಲೋಕೋಪಯೋಗಿ ಸಚಿವ ಒ.ಪನ್ನೀರ್‌ಸೆಲ್ವಂ ನೇತೃತ್ವದ ತಮಿಳುನಾಡಿನ ನಿಯೋಗ ಜೂ.16ರ ಬುಧವಾರ ಬೆಳಗ್ಗೆ ಮುಖ್ಯಮಂತ್ರಿ ಧರ್ಮಸಿಂಗ್‌ ಅವರನ್ನು ಭೇಟಿ ಮಾಡಿ ನೀರುಬಿಡುವಂತೆ ಮನವಿ ಮಾಡಿತು. ಈ ಕುರಿತು ತಮಿಳುನಾಡಿನ ಮುಖ್ಯಮಂತ್ರಿ ಜಯಲಲಿತಾ ಅವರು ಬರೆದಿರುವ ಅಧಿಕೃತ ಮನವಿ ಪತ್ರವನ್ನು ನಿಯೋಗ ಧರ್ಮಸಿಂಗ್‌ರಿಗೆ ಹಸ್ತಾಂತರಿಸಿತು.

ಧರ್ಮಸಿಂಗ್‌ರ ಭೇಟಿಯ ನಂತರ ಸುದ್ದಿಗಾರರೊಂದಿಗೆ ಮಾತನಾಡಿದ ಪನ್ನೀರ್‌ಸೆಲ್ವಂ, ಮುಖ್ಯಮಂತ್ರಿಗಳೊಂದಿಗಿನ ಭೇಟಿ ಹಾಗೂ ಮಾತುಕತೆ ಸೌಹಾರ್ದಯುತವಾಗಿತ್ತು . ತಮಿಳುನಾಡಿನ ಮನವಿಯನ್ನು ಪರಿಶೀಲಿಸುವುದಾಗಿ ಧರ್ಮಸಿಂಗ್‌ ಆಶ್ವಾಸನೆ ನೀಡಿದ್ದಾರೆ ಎಂದರು.

ಈ ನಡುವೆ, ತಮಿಳುನಾಡಿಗೆ ನೀರು ಬಿಡುಗಡೆ ಮಾಡುವ ವಿಷಯದಲ್ಲಿ ರಾಜ್ಯ ಸರ್ಕಾರದ ನಿಲುವು ಅಚಲವಾಗಿದೆ ಎಂದು ಜಲ ಸಂಪನ್ಮೂಲ ಸಚಿವ ಮಲ್ಲಿಕಾರ್ಜುನ ಖರ್ಗೆ ಬುಧವಾರ ವಿಧಾನಮಂಡಲದಲ್ಲಿ ಸ್ಪಷ್ಟಪಡಿಸಿದ್ದಾರೆ. ರಾಜ್ಯದ ರೈತರ ಹಿತಾಸಕ್ತಿಯನ್ನು ರಕ್ಷಿಸುವ ಉದ್ದೇಶದಿಂದ ತಮಿಳುನಾಡಿಗೆ ತೊಟ್ಟು ನೀರೂ ಬಿಡುವುದಿಲ್ಲ ಎಂದು ಮುಖ್ಯಮಂತ್ರಿ ಧರ್ಮಸಿಂಗ್‌ ಈ ಮುನ್ನ ಹೇಳಿದ್ದರು.

(ಪಿಟಿಐ)

ಮುಖಪುಟ / ಕಾವೇರಿ