90ರ ಕನಸಲ್ಲಿ ಕನ್ನಂಬಾಡಿ : ರಾಜ್ಯದ ಜಲಾಶಯಗಳಲ್ಲಿ ಗಂಗಾವತರಣ

90ರ ಕನಸಲ್ಲಿ ಕನ್ನಂಬಾಡಿ : ರಾಜ್ಯದ ಜಲಾಶಯಗಳಲ್ಲಿ ಗಂಗಾವತರಣ
ಜೀವ ತುಂಬಿಕೊಂಡ ಜಲಪಾತಗಳು, ನದಿಗಳಲ್ಲಿ ಸೊಕ್ಕು

ತಮಿಳುನಾಡಿಗೆ ಕಾವೇರಿಯಿಂದ ತೊಟ್ಟು ನೀರನ್ನೂ ಬಿಡಲು ಸಾಧ್ಯವಿಲ್ಲ ಎಂದು ಧರ್ಮಸಿಂಗ್‌ ಪಡೆ ಗುಡುಗುತ್ತಿರುವಂತೆಯೇ, ಕಾವೇರಿ ಜಲಾನಯನ ಪ್ರದೇಶದಲ್ಲಿ ಉತ್ತಮ ಮಳೆಯಾಗುತ್ತಿದೆ. ಕನ್ನಂಬಾಡಿಯ ಒಳ ಹರಿವು ಕೂಡ ಹೆಚ್ಚುತ್ತಿದೆ.

ಜೂನ್‌ 14ರ ಸೋಮವಾರ ಕೃಷ್ಣರಾಜ ಸಾಗರ ಜಲಾಶಯದ ಒಳ ಹರಿವು 11,044 ಕ್ಯುಸೆಕ್ಸ್‌ಗಳಷ್ಟಿತ್ತು . ಇದು 2004ರಲ್ಲಿ ದಾಖಲಾದ ಗರಿಷ್ಠ ಮಟ್ಟದ ಒಳಹರಿವು. ಮಳೆಯ ಪ್ರಮಾಣ ಇದೇರೀತಿ ಮುಂದುವರೆದಲ್ಲಿ ಜಲಾಶಯದ ನೀರಿನ ಮಟ್ಟ ಶೀಘ್ರದಲ್ಲೇ 90 ಅಡಿ ಮುಟ್ಟುವ ನಿರೀಕ್ಷೆಯಿದೆ.

ಪ್ರಸ್ತುತ ಕೆಆರ್‌ಎಸ್‌ನಲ್ಲಿ 86 ಅಡಿ ನೀರಿನ ಸಂಗ್ರಹವಿದ್ದು , ಕಳೆದ ವರ್ಷ ಇದೇ ಅವಧಿಯಲ್ಲಿ ಜಲಾಶಯದಲ್ಲಿ 68 ಅಡಿ ನೀರಿನ ಸಂಗ್ರಹವಿತ್ತು . ಜಲಾಶಯದ ಗರಿಷ್ಠ ಜಲ ಸಂಗ್ರಹ ಮಟ್ಟ 124.8 ಅಡಿ. ಈ ಬಾರಿ ಉತ್ತಮ ಮುಂಗಾರಿನ ನಿರೀಕ್ಷೆಯಿದ್ದು , ಜಲಾಶಯ ಭರ್ತಿಯಾಗಬಹುದೆಂದು ಸ್ಥಳೀಯ ಆಡಳಿತ ನಿರೀಕ್ಷಿಸಿದೆ.

ಹೆಗ್ಗಡದೇವನ ಕೋಟೆ ಆಸುಪಾಸಿನಲ್ಲೂ ಒಳ್ಳೆಯ ಮಳೆಯಾಗುತ್ತಿದ್ದು , ಕಬಿನಿ ಜಲಾಶಯದ ಒಳ ಹರಿವು ಕೂಡ ಸುಧಾರಿಸಿದೆ.

ಕೊಡಗು, ಹಾಸನ, ಚಿಕ್ಕಮಗಳೂರು, ಶಿವಮೊಗ್ಗ ಮುಂತಾದೆಡೆಗಳಲ್ಲಿ ಕೂಡ ಭಾರೀ ಮಳೆ ಸುರಿಯುತ್ತಿದ್ದು , ಜಲಮೂಲಗಳಲ್ಲಿ ಉತ್ಸಾಹ ಕಾಣಿಸಿಕೊಂಡಿದೆ. ಜಲಪಾತಗಳು ಭೋರ್ಗರೆಯುತ್ತಿದ್ದು , ನದಿಗಳಲ್ಲಿ ಉಕ್ಕು ಕಾಣಿಸಿಕೊಂಡಿದೆ. ನೂರಾರು ಮರಗಳು ಉರುಳಿಬಿದ್ದು ಕೆಲವೆಡೆ ಸಂಚಾರಕ್ಕೆ ಅಡಚಣೆ ಉಂಟಾಗಿದೆ. ವಿದ್ಯುತ್‌ ಪೂರೈಕೆಗೂ ಧಕ್ಕೆ ಉಂಟಾಗಿದೆ.

(ಇನ್ಫೋ ವಾರ್ತೆ)

ಮುಖಪುಟ / ವಾರ್ತೆಗಳು