ಮಹಿಳಾ ಪೊಲೀಸ್‌ ಬೆಂಗಾವಲಲ್ಲಿ ರೌಡಿ ತನ್ವೀರ್‌ ಅಹ್ಮದ್‌ ಪೆರೇಡ್‌

ಮಹಿಳಾ ಪೊಲೀಸ್‌ ಬೆಂಗಾವಲಲ್ಲಿ ರೌಡಿ ತನ್ವೀರ್‌ ಅಹ್ಮದ್‌ ಪೆರೇಡ್‌
ಶಿವಾಜಿನಗರದ ಭೂಗತ ಲೋಕಕ್ಕೆ ಪೊಲೀಸರಿಂದ ಭಾರೀ ಪೆಟ್ಟು

ಕುಖ್ಯಾತ ರೌಡಿ ತನ್ವೀರ್‌ ಅಹ್ಮದ್‌ನನ್ನು ಬೆಂಗಳೂರು ನಗರ ಪೊಲೀಸರು ಸೋಮವಾರ (ಮೇ10) ಶಿವಾಜಿನಗರದ ರಸ್ತೆಗಳಲ್ಲಿ ಕಾಲ್ನಡಿಗೆಯ ಪೆರೇಡ್‌ ನಡೆಸಿದರು.

ಮಹಿಳಾ ಪೊಲೀಸರ ಬೆಂಗಾವಲಲ್ಲಿ ತನ್ವೀರ್‌ ಅಹ್ಮದ್‌ ತಲೆ ತಗ್ಗಿಸಿಕೊಂಡು ರಸ್ತೆಗಳಲ್ಲಿ ನಡೆಯುತ್ತಿದ್ದ . ಭಯ, ಅವಮಾನ, ಮೂದಲಿಕೆಗಳಿಂದ ಆತ ಕುಗ್ಗಿಹೋಗಿದ್ದ . ರಸ್ತೆಯಿಕ್ಕೆಲಗಳಲ್ಲೂ ತನ್ವೀರ್‌ನನ್ನು ನೋಡಲು ನೆರೆದಿದ್ದ ಜನರು, ಆತನ ಕುರಿತು ತಮಾಷೆ, ವ್ಯಂಗ್ಯದ ಮಾತಾಡುತ್ತಿದ್ದರು. ಬಂಧನಕ್ಕೂ ಮುನ್ನ ತನ್ವೀರ್‌ ಕುರಿತು ಇದೇ ಜನ ಭಯಭೀತರಾಗಿದ್ದರು.

ಜನರಲ್ಲಿ ಧೈರ್ಯ-ಜಾಗೃತಿ ಹೆಚ್ಚಿಸುವುದು ಹಾಗೂ ಬೆಂಗಳೂರಿನ ಭೂಗತ ಲೋಕಕ್ಕೆ ಎಚ್ಚರಿಕೆ ನೀಡುವುದು ಈ ಪೆರೇಡ್‌ನ ಉದ್ದೇಶ ಎನ್ನಲಾಗಿದೆ. ಆದರೆ, ತನಿಖೆಗಾಗಿ ತನ್ವೀರ್‌ನನ್ನು ನಡೆಸಲಾಯಿತು. ಉತ್ತಮ ರಸ್ತೆಗಳು ಇಲ್ಲದ ಕಾರಣ ಆತನನ್ನು ಕಾಲ್ನಡಿಗೆಯಲ್ಲಿ ಕರೆದೊಯ್ಯುವುದು ಅನಿವಾರ್ಯವಾಯಿತು ಎಂದು ಪೊಲೀಸ್‌ ಮೂಲಗಳು ತಿಳಿಸಿವೆ.

ಬಿ.ಕೆ.ಶಿವರಾಂ ನೇತೃತ್ವದ ಪೊಲೀಸ್‌ ಅಧಿಕಾರಿಗಳ ತಂಡ ಮೇ8ರ ಶನಿವಾರ ರಾತ್ರಿ ತನ್ವೀರ್‌ನನ್ನು ಬಂಧಿಸಿತ್ತು . ಮೇ 17ರವರೆಗೆ ತನ್ವೀರ್‌ನನ್ನು ಎಂಟನೇ ಹೆಚ್ಚುವರಿ ಮುಖ್ಯ ಮೆಟ್ರೊಪಾಲಿಟನ್‌ ಮ್ಯಾಜಿಸ್ಟ್ರೇಟ್‌ ಪೊಲೀಸ್‌ ವಶಕ್ಕೆ ಒಪ್ಪಿಸಿದೆ.

ತನ್ವೀರ್‌ನ ಇತರ ಸಹಚರರ ಬಂಧನಕ್ಕೆ ಪೊಲೀಸರು ವ್ಯಾಪಕ ಜಾಲ ಬೀಸಿದ್ದಾರೆ.

(ಇನ್ಫೋ ವಾರ್ತೆ)

ಮುಖಪುಟ / ವಾರ್ತೆಗಳು