ಅಧಿಕಾರ ರಾಜಕಾರಣ: ಪ್ರಗತಿಗಾಗಿ ಪ್ರಗತಿಪರರ ಕಾಂಗ್ರೆಸ್‌ವಲಸೆ

ಅಧಿಕಾರ ರಾಜಕಾರಣ: ಪ್ರಗತಿಗಾಗಿ ಪ್ರಗತಿಪರರ ಕಾಂಗ್ರೆಸ್‌ವಲಸೆ
ಏಕಾಂಗಿಯಾದ ತಟಸ್ಥ ನಾಣಯ್ಯ, ಖಾಲಿಮನೆಯಲ್ಲಿ ಬೊಮ್ಮಾಯಿ-ಸೋಮಶೇಖರ್‌

ವಿಧಾನ ಪರಿಷತ್ತಿನ ಮಾಜಿ ಸಭಾಪತಿ ಬಿ.ಎಲ್‌.ಶಂಕರ್‌ ಹಾಗೂ ಪ್ರಗತಿಪರ ಜನತಾದಳದ 11 ಶಾಸಕರು ಶಿವರಾತ್ರಿಯಂದು (ಫೆ.18) ಕಾಂಗ್ರೆಸ್‌ಗೆ ಸಾಮೂಹಿಕ ವಲಸೆ ಹೋಗುವುದರೊಂದಿಗೆ, ಹೆಗಡೆ ಅವರ ಕೂಸು ಪ್ರಗತಿಪರ ಜನತಾದಳ ಹೆಚ್ಚೂಕಡಿಮೆ ಖಾಲಿ ಮನೆಯಾಯಿತು.

ಕಾಂಗ್ರೆಸ್‌ ಅಧ್ಯಕ್ಷೆ ಸೋನಿಯಾಗಾಂಧಿ, ಕೆಪಿಸಿಸಿ ಅಧ್ಯಕ್ಷ ಜನಾರ್ಧನ ಪೂಜಾರಿ ಹಾಗೂ ಮುಖ್ಯಮಂತ್ರಿ ಎಸ್ಸೆಂ.ಕೃಷ್ಣ ವಲಸೆ ಹಕ್ಕಿಗಳನ್ನು ಸಂಭ್ರಮದಿಂದ ಸ್ವಾಗತಿಸಿದರು. ನವದೆಹಲಿಯ ಎಐಸಿಸಿ ಕಾರ್ಯಾಲಯದಲ್ಲಿ ಈ ಪಕ್ಷಾಂತರದ ಕಾರ್ಯಕ್ರಮ ಫೆ.18ರ ಬುಧವಾರ ನಡೆಯಿತು.

ಪ್ರಗತಿಪರ ಜನತಾದಳದ ಮುಖಂಡರು ಕಾಂಗ್ರೆಸ್‌ಗೆ ಸೇರಿದ ಕುರಿತು ಹರ್ಷ ವ್ಯಕ್ತಪಡಿಸಿದ ಮುಖ್ಯಮಂತ್ರಿ ಎಸ್ಸೆಂ.ಕೃಷ್ಣ , ಈ ನಾಯಕರು ಯಾವುದೇ ಷರತ್ತಿಲ್ಲದೆ ಕಾಂಗ್ರೆಸ್‌ಗೆ ಸೇರ್ಪಡೆ ಹೊಂದಿದ್ದಾರೆ ಎಂದರು.

ಕಾಂಗ್ರೆಸ್‌ ಸೇರಿದವರ ಪಟ್ಟಿ ಇಂತಿದೆ :

ವಿಧಾನ ಪರಿಷತ್ತಿನ ಮಾಜಿ ಸಭಾಪತಿ ಬಿ.ಎಲ್‌.ಶಂಕರ್‌, ಮಂಡ್ಯದ ಜಿ.ಮಾದೇಗೌಡರ ಪುತ್ರ ಮಧು ಮಾದೇಗೌಡ, ಶಾಸಕರಾದ ಚೌಡರೆಡ್ಡಿ , ಕೃಷ್ಣ ಭೈರೇಗೌಡ, ಕೆ.ಶ್ರೀನಿವಾಸ ಗೌಡ, ಶಿವಶಂಕರ ರೆಡ್ಡಿ , ಎ.ಬಿ.ಪಾಟೀಲ್‌, ಉಮೇಶ್‌ ಕತ್ತಿ , ಶಿವಾನಂದ ಮಹಾಂತೇಶ್‌ ಕೌಜಲಗಿ, ಎಸ್‌.ಸಿ.ಮಾಳಗಿ, ಹಂಪನಗೌಡ ಬಾದರ್ಲಿ, ಕೆ.ಬಿ.ಮಲ್ಲಿಕಾರ್ಜುನ ಮತ್ತು ಚಂದ್ರಪ್ಪ .

ಇದೇ ಸಂದರ್ಭದಲ್ಲಿ ನಿವೃತ್ತ ಡಿಜಿಪಿ ಎಲ್‌.ರೇವಣಸಿದ್ಧಯ್ಯ, ಪ್ರಗತಿಪರ ಜನತಾದಳದ ಪ್ರಧಾನ ಕಾರ್ಯದರ್ಶಿ ಬಸವರಾಜ ರಾಯರೆಡ್ಡಿ ಕಾಂಗ್ರೆಸ್‌ಗೆ ಸೇರ್ಪಡೆ ಹೊಂದಿದರು.

ಕಾಂಗ್ರೆಸ್‌ ಸೇರುವ ನಿರೀಕ್ಷೆಯಿದ್ದ ಪ್ರಗತಿಪರದ ರಮೇಶ್‌ಕುಮಾರ್‌ ತಮ್ಮ ಅಭಿಮಾನಿಗಳ ವಿರೋಧ ಹಾಗೂ ಶ್ರೀನಿವಾಸಪುರದ ಕಾಂಗ್ರೆಸ್‌ ಶಾಸಕರ ವಿರೋಧದಿಂದಾಗಿ ಕಾಂಗ್ರೆಸ್‌ಗೆ ಸೇರುವುದು ಸಾಧಯವಾಗಿಲ್ಲ . ತಟಸ್ಥ ಜನತಾದಳದ ಎಂ.ಸಿ.ನಾಣಯ್ಯ ಕೂಡ ಈಗ ಏಕಾಂಗಿ.

ಸೋಮಶೇಖರ್‌ ವಿಷಾದ : ಪ್ರಗತಿಪರ ಜನತಾದಳದ ನಾಯಕರು ಕಾಂಗ್ರೆಸ್‌ ಸೇರಿರುವುದಕ್ಕೆ ವಿಷಾದ ವ್ಯಕ್ತಪಡಿಸಿರುವ ಪ್ರಗತಿಪರ ಜನತಾದಳದ ಮುಖಂಡ ಬಿ.ಸೋಮಶೇಖರ್‌- ತಾವು ಈ ಘಟನೆಯಿಂದ ವಿಚಲಿತರಾಗದೆ ಪಕ್ಷ ಸಂಘಟನೆಗೆ ಒತ್ತು ನೀಡುವುದಾಗಿ ತಿಳಿಸಿದ್ದಾರೆ. ಮುಂಬರುವ ಚುನಾವಣೆಗಳಲ್ಲಿ ಮಲ್ಯ ನೇತೃತ್ವದ ಜನತಪಕ್ಷದೊಂದಿಗೆ ಸ್ಥಾನ ಹೊಂದಾಣಿಕೆ ಮಾಡಿಕೊಳ್ಳುವುದಾಗಿ ಸೋಮಶೇಖರ್‌ ತಿಳಿಸಿದ್ದಾರೆ.

(ಇನ್ಫೋ ವಾರ್ತೆ)

ಮುಖಪುಟ / ವಾರ್ತೆಗಳು