ಮಡದಿ ಮಕ್ಕಳಿಗೆ ಭಾನುವಾರ ಮೀಸಲು -ಉಮಾ ಫರ್ಮಾನು !

ಮಡದಿ ಮಕ್ಕಳಿಗೆ ಭಾನುವಾರ ಮೀಸಲು -ಉಮಾ ಫರ್ಮಾನು !
ಮಧ್ಯಪ್ರದೇಶದ ಸಚಿವರಿಗೆ ವೇಳಾಪಟ್ಟಿ ರೂಪಿಸಿದ ಮುಖ್ಯಮಂತ್ರಿ

ಕುಟುಂಬಕ್ಕೂ ಒಂದಿಷ್ಟು ಟೈಮು ಮೀಸಲಿಡಿ. ಹಾಗಂತ ಮಧ್ಯಪ್ರದೇಶದ ಮುಖ್ಯಮಂತ್ರಿ,ಉಮಾ ಭಾರತಿ ಫರ್ಮಾನು ಹೊರಡಿಸಿದ್ದಾರೆ. ಇದು ಸಚಿವರಿಗೆ ಮಾತ್ರ ಅನ್ವಯವಾಗುವ ನೀತಿ ಸಂಹಿತೆ.

ಸಂಕ್ರಾಂತಿಯ ಶುಭಸಂಧರ್ಭದಲ್ಲಿ ಮಂತ್ರಿವರ್ಯರಿಗೆ ಒಂದು ವೇಳಾಪಟ್ಟಿಯನ್ನು ಉಮಾ ಭಾರತಿ ಘೋಷಿಸಿದ್ದಾರೆ. ಸೋಮವಾರದಿಂದ ಬುಧವಾರ ಕಛೇರಿಯಲ್ಲಿ, ಗುರುವಾರದಿಂದ ಶನಿವಾರ ತಮ್ಮ ತಮ್ಮ ಕ್ಷೇತ್ರಗಳಲ್ಲಿ ಮತ್ತು ಭಾನುವಾರ ಕುಟುಂಬದ ಜೊತೆಗಿರಬೇಕು- ಇದಿಷ್ಟು ವೇಳಾಪಟ್ಟಿಯಲ್ಲಿನ ಮುಖ್ಯಾಂಶಗಳು.

‘ಈ ವೇಳಾಪಟ್ಟಿಯ ಮೂಲ ಉದ್ದೇಶ , ಸರ್ಕಾರದ ನಿರ್ಣಯಗಳು ಜನರನ್ನು ತಲುಪಬೇಕು ಮತ್ತು ರಾಜ್ಯದ ಜನತೆಯ ಸಮಸ್ಯೆಗಳು ಬೆಳಕಿಗೆ ಬರಬೇಕು ಎಂಬುದಾಗಿದೆ’ ಎಂದು ಮುಖ್ಯಮಂತ್ರಿಗಳ ಕಾರ್ಯದರ್ಶಿ ಬಣ್ಣಿಸಿದ್ದಾರೆ.

ವೇಳಾಪಟ್ಟಿಯಂತೆ ವಾರದ ಮೊದಲ 3 ದಿನ ರಾಜ್ಯ ಸಚಿವಾಲಯದ ಕಛೇರಿಯಲ್ಲಿರುವುದು ಕಡ್ಡಾಯ. ನಂತರದ ಮೂರು ದಿನಗಳಲ್ಲಿ , ಮಂತ್ರಿಗಳು ತಮ್ಮ ತಮ್ಮ ಕ್ಷೇತ್ರಗಳಿಗೆ ಭೇಟಿ ನೀಡಬಹುದು ಇಲ್ಲವೇ ಅಧಿಕೃತ ಪ್ರವಾಸ ಕೈಗೊಳ್ಳಬೇಕು. ತುರ್ತು ಪರಿಸ್ಥಿತಿಯನ್ನು ಹೊರತುಪಡಿಸಿ,ಭಾನುವಾರ ಮಾತ್ರ ಕಟ್ಟುನಿಟ್ಟಾಗಿ ಮನೆಯವರೊಟ್ಟಿಗೇ ಇರಬೇಕು!

ಅಲ್ಲದೇ ವಾರದಲ್ಲಿ ಒಮ್ಮೆಯಾದರೂ ಮುಖ್ಯಮಂತ್ರಿಗಳ ಜೊತೆ ಭೋಜನಕೂಟದಲ್ಲಿ ಭಾಗವಹಿಸಬೇಕು. ಉಮಾಭಾರತಿ, ತಮಗೂ ವೇಳಾಪಟ್ಟಿ ಅಳವಡಿಸಿಕೊಂಡಿದ್ದು , ಸೋಮವಾರ ಸಭಾಪತಿಯವರ ಭೇಟಿ, ಮಂಗಳವಾರ ಮತ್ತು ಗುರುವಾರ ಮಾಧ್ಯಮದವರೊಡನೆ ಮಾತುಕತೆ, ಬುಧವಾರ ಸಾರ್ವಜನಿಕರೊಂದಿಗೆ ಸಮಸ್ಯೆಗಳ ಸಮಾಲೋಚನೆ, ಭಾನುವಾರ- ?

ಉಮಾಭಾರತಿ ಅವರು ಕುಮಾರಿ ಆಗಿರುವುದರಿಂದ ಅವರಿಗೆ ಕುಟುಂಬದ ನಂಟಿನ ಅಂಟು ಅಷ್ಟೇನೂ ಬಲವಾಗಿಲ್ಲ . ಆ ಕಾರಣದಿಂದಾಗಿ ಅವರಿಗೆ ವೇಳಾಪಟ್ಟಿಯ ನಿಯಮಗಳಿಂದ ಕೊಂಚ ಸಡಿಲಿಕೆ ಏನಾದರೂ ಉಂಟಾ? ತಿಳಿದುಬಂದಿಲ್ಲ .

(ಏಜನ್ಸೀಸ್‌)

ಮುಖಪುಟ / ವಾರ್ತೆಗಳು