‘ನವೆಂಬರ್‌ನಲ್ಲಿ ಬೆಂಗಳೂರು ಮೆಟ್ರೋ ರೈಲು ಕಾಮಗಾರಿ ಪ್ರಾರಂಭ’

‘ನವೆಂಬರ್‌ನಲ್ಲಿ ಬೆಂಗಳೂರು ಮೆಟ್ರೋ ರೈಲು ಕಾಮಗಾರಿ ಪ್ರಾರಂಭ’
2004ರ ಹೊತ್ತಿಗೆ ಬೆಂಗಳೂರಲ್ಲಿ ಮೆಟ್ರೋ ರೈಲು ‘ಕೂ’ಗುಟ್ಟಲಿದೆ

ವಿತ್ತ ಸಚಿವಾಲಯದ ಸಮ್ಮತಿಗೆ ಕಾಯುತ್ತಿರುವ ಬೆಂಗಳೂರು ಮೆಟ್ರೋ ರೈಲು ಯೋಜನೆಯ 33 ಕಿಲೋ ಮೀಟರ್‌ ಉದ್ದದ ಕಾಮಗಾರಿ ಬರುವ ನವೆಂಬರ್‌ ಅಥವಾ ಡಿಸೆಂಬರ್‌ನಲ್ಲಿ ಶುರುವಾಗಲಿದೆ.

ಬೆಂಗಳೂರು ಮಾಸ್‌ ರ್ಯಾಪಿಡ್‌ ಟ್ರ್ಯಾನ್ಸಿಟ್‌ ಲಿಮಿಟೆಡ್‌ನ ಅಧ್ಯಕ್ಷ ಉಮೇಶ್‌ ಭಟ್‌ ಗುರುವಾರ (ಆ.28) ಸುದ್ದಿಗಾರರಿಗೆ ಈ ವಿಷಯ ತಿಳಿಸಿದರು. ನಗರಾಭಿವೃದ್ಧಿ ಸಚಿವಾಲಯ ಹಾಗೂ ಯೋಜನಾ ಆಯೋಗ ಸೇರಿದಂತೆ ಈ ಯೋಜನೆಗೆ ಪ್ರತಿಶತಃ 99ರಷ್ಟು ಒಪ್ಪಿಗೆ ಈಗಾಗಲೇ ಸಿಕ್ಕಿದೆ. ವಿತ್ತ ಸಚಿವಾಲಯ ಒಂದು ಹ್ಞೂಂ ಅನ್ನುವುದು ಬಾಕಿ ಇದೆ ಎಂದರು.

ಬೆಂಗಳೂರಿನ ಉತ್ತರ- ದಕ್ಷಿಣ, ಪೂರ್ವ- ಪಶ್ಚಿಮದ ಭಾಗಗಳನ್ನು ಸೇರಿಸುವ ಮೆಟ್ರೋ ರೈಲು ಯೋಜನೆ ಎರಡು ಕಾರಿಡಾರ್‌ಗಳದ್ದಾಗಿರುತ್ತದೆ. 2004ರ ಹೊತ್ತಿಗೆ ರೈಲು ಸಂಚಾರ ಶುರುಮಾಡುವ ಕನಸನ್ನು ಇಟ್ಟುಕೊಂಡಿರುವ ಈ ಯೋಜನೆಗೆ 4,989 ಕೋಟಿ ರುಪಾಯಿ ವ್ಯಯಿಸಲಾಗುತ್ತದೆ. ಮೆಟ್ರೋ ರೈಲು ವ್ಯವಸ್ಥೆಯ ಸಮರ್ಪಕ ಅನುಷ್ಟಾನ ಮತ್ತು ನಿರ್ವಹಣೆಗೆ 2004ನೇ ಇಸವಿಯ ಹೊತ್ತಿಗೆ ಬೆಂಗಳೂರು ಮೆಟ್ರೋ ರೈಲು ನಿಗಮವನ್ನು ಸ್ಥಾಪಿಸಲಾಗುವುದು ಎಂದು ಭಟ್‌ ಹೇಳಿದರು.

ಈ ಯೋಜನೆಗೆ ಕರ್ನಾಟಕ ಸರ್ಕಾರ 1,572 ಕೋಟಿ ಹಾಗೂ ಕೇಂದ್ರ ಸರ್ಕಾರ 1,079 ಕೋಟಿ ರುಪಾಯಿ ವಿನಿಯೋಗಿಸಲಿವೆ. ಬಾಕಿ 2,338 ಕೋಟಿ ರುಪಾಯಿಯನ್ನು ಬ್ಯಾಂಕ್‌ ಮತ್ತಿತರ ವಿತ್ತ ಸಂಸ್ಥೆಗಳಿಂದ ಎತ್ತಲಾಗುವುದು ಎಂದರು.

(ಪಿಟಿಐ)

ಮುಖಪುಟ / ವಾರ್ತೆಗಳು