ಸಾಂಪ್ರಾಸ್‌ ಇನ್ನೊಂದೇ ಸಲ ಕಣಕ್ಕೆ ಬರ್ತಾರೆ ; ಗುಡ್‌ಬೈ ಹೇಳೋಕೆ

ಸಾಂಪ್ರಾಸ್‌ ಇನ್ನೊಂದೇ ಸಲ ಕಣಕ್ಕೆ ಬರ್ತಾರೆ ; ಗುಡ್‌ಬೈ ಹೇಳೋಕೆ
ಟೆನಿಸ್‌ ಇತಿಹಾಸದ ಪುಟಗಳಲ್ಲಿ ದಾಖಲೆ ಬರೆದ ಸಾಂಪ್ರಾಸ್‌ ಇನ್ನು ಆಡೋದಿಲ್ಲ

ಹದಿನಾಲ್ಕು ಗ್ರ್ಯಾನ್‌ ಸ್ಲಾಮ್‌ ಸಿಂಗಲ್ಸ್‌ ಪ್ರಶಸ್ತಿಗಳ ಒಡೆಯ, ಅಮೆರಿಕಾದ ಪೀಟ್‌ ಸಾಂಪ್ರಾಸ್‌ ಇನ್ನೊಂದೇ ಒಂದು ಬಾರಿ ಟೆನಿಸ್‌ ಆಟದಂಗಳಕ್ಕೆ ಬರಲಿದ್ದಾರೆ, ತಮ್ಮ ನಿವೃತ್ತಿ ಪ್ರಕಟಿಸೋಕೆ.

2002ನೇ ಇಸವಿಯಲ್ಲಿ ಯುಎಸ್‌ ಓಪನ್‌ ಪ್ರಶಸ್ತಿ ಗೆದ್ದ ನಂತರ ಒಂದೇ ಒಂದು ಪಂದ್ಯವನ್ನೂ ಸಾಂಪ್ರಾಸ್‌ ಆಡಿಲ್ಲ.

ಬರುವ ಸೋಮವಾರ (ಆ.25) ಆರ್ಥರ್‌ ಆ್ಯಷೆ ಕ್ರೀಡಾಂಗಣದಲ್ಲಿ ಈ ವರ್ಷದ ಯೂಎಸ್‌ ಓಪನ್‌ ಟೆನಿಸ್‌ ಪಂದ್ಯಗಳು ಶುರುವಾಗೋದು ಸಾಂಪ್ರಾಸ್‌ ಬೀಳ್ಕೊಡುಗೆಯಾಟ್ಟಿಗೆ. ಕಡಿಮೆ ಮಾತಾಡುವ ಸಾಂಪ್ರಾಸ್‌ ನಿವೃತ್ತಿಯ ಸುದ್ದಿಯನ್ನು ಆತನ ಪ್ರತಿನಿಧಿಗಳು ಈ-ಮೇಲ್‌ ಮೂಲಕ ತಿಳಿಸಿದ್ದಾರೆ.

‘ಎದೆಯಲ್ಲಿ ಮಾರ್ದ್ರವತೆ ತುಂಬುವಂಥಾ ಕೆಲವೇ ಕೆಲವು ಸರ್ವಕಾಲಿಕ ಟೆನಿಸ್‌ ಆಟಗಾರರ ಪೈಕಿ ಸಾಂಪ್ರಾಸ್‌ ಕೂಡ ಒಬ್ಬ. ಒತ್ತಡದಲ್ಲಿ ಆತ ಆಡುತ್ತಿದ್ದ ಪರಿಯನ್ನು ನೋಡುವುದು ಕಣ್ಣಿಗೆ ಹಬ್ಬವಾಗಿತ್ತು ’ ಎಂದು ಈಗ 4ನೇ ಶ್ರೇಯಾಂಕದ ಆಟಗಾರನಾಗಿರುವ ಆ್ಯಂಡಿ ರಾಡಿಕ್‌ ಬಣ್ಣಿಸುತ್ತಾರೆ.

ಸಾಂಪ್ರಾಸ್‌ಗೆ ಈಗ 32ರ ಹರೆಯ. ಈವರೆಗೆ 64 ಸಿಂಗಲ್ಸ್‌ ಟೈಟಲ್‌ಗಳು ಅವರ ಬುಟ್ಟಿಯಲ್ಲಿವೆ. 1993ರಿಂದ 98ರವರೆಗೆ ಆರು ವರ್ಷಗಳ ದಾಖಲೆ ಅವಧಿಯಲ್ಲಿ ವಿಶ್ವ ರ್ಯಾಂಕಿಂಗ್‌ನಲ್ಲಿ ನಂಬರ್‌ 1 ಸ್ಥಾನದಲ್ಲಿದ್ದ ಸಾಂಪ್ರಾಸ್‌ ಏಳು ವಿಂಬಲ್ಡನ್‌, 5 ಯುಎಸ್‌ ಓಪನ್‌ ಹಾಗೂ 2 ಆಸ್ಟ್ರೇಲಿಯನ್‌ ಓಪನ್‌ ಪ್ರಶಸ್ತಿಗಳನ್ನು ಗೆದ್ದಿದ್ದಾರೆ. ಇದೂ ಕೂಡ ದಾಖಲೆ.

ಈವರೆಗೆ ಆತ ಬೆಳೆಯಲು ಕಾರಣವಾದ ಆಲ್‌ ಇಂಗ್ಲೆಂಡ್‌ ಕ್ಲಬ್‌ ಜೊತೆಗೆ ಸಾಂಪ್ರಾಸ್‌ ಸದಾ ಕಾಲ ಸಂಪರ್ಕ ಇಟ್ಟುಕೊಳ್ಳಲಿದ್ದಾರೆ. ಗುಡ್‌ ಬೈ ಸಾಂಪ್ರಾಸ್‌.

(ಏಜೆನ್ಸೀಸ್‌)

ಮುಖಪುಟ / ವಾರ್ತೆಗಳು