‘ವೀರಪ್ಪನ್‌ ಗೆಳೆಯ ರಾಜೂಗೌಡರ ಮೇಲೆ ಕೇಸು ಜಡಿಯಿರಿ’

ಬೆಂಗಳೂರು : ವೀರಪ್ಪನ್‌ ಜೊತೆ ಸಂಪರ್ಕ ಇಟ್ಟುಕೊಂಡಿದ್ದಾರೆ ಎನ್ನಲಾಗುತ್ತಿರುವ ಕಾರಣ ಆಹಾರ ಸಂಸ್ಕರಣಾ ಸಚಿವ ರಾಜೂಗೌಡರ ವಿರುದ್ಧ ಪ್ರಕರಣ ದಾಖಲಿಸಬೇಕೆಂದು ಸೋಮವಾರ ವಿಧಾನ ಸಭೆಯಲ್ಲಿ ಒತ್ತಾಯಿಸಲಾಯಿತು.

ವೀರಪ್ಪನ್‌ ಒತ್ತೆಯಾಳಾಗಿದ್ದಾಗ ಹತ್ಯೆಯಾದ ನಾಗಪ್ಪ ಪ್ರಕರಣದ ಚರ್ಚೆ ವೇಳೆ ಸಂಯುಕ್ತ ಜನತಾ ದಳ ನಾಯಕ ಬಿ.ಸೋಮಶೇಖರ್‌, ರಾಜೂಗೌಡರ ವಿರುದ್ಧ ಕಿಡಿ ಕಾರಿದರು. ಎರಡು ಬಾರಿ ವಿಧಾನ ಸಭೆ ಚುನಾವಣೆಯಲ್ಲಿ ರಾಜೂಗೌಡರು ಗೆಲ್ಲಲು ವೀರಪ್ಪನ್‌ ಕಾರಣವಾಗಿದ್ದಾನೆ ಅನ್ನುವ ಮಾತಿದೆ. ಸಂಧಾನಕ್ಕೆ ಇವರು ಬರಬೇಕೆಂದು ಖುದ್ದು ವೀರಪ್ಪನ್‌ ಕೇಳಿದ್ದ. ಹಿಂದೆ ಗ್ರಾನೈಟ್‌ ಮಾಲೀಕರೊಬ್ಬರ ಮಗನನ್ನು ವೀರಪ್ಪನ್‌ ಅಪಹರಿಸಿದ್ದ. ಆತನ ಬಿಡುಗಡೆಯಲ್ಲಿ ರಾಜೂಗೌಡರೇ ಪ್ರಮುಖ ಪಾತ್ರವಹಿಸಿದ್ದರು ಎಂಬ ಆರೋಪವಿದೆ. ಈ ಹಿನ್ನೆಲೆಯಲ್ಲಿ ರಾಜೂಗೌಡರ ವಿರುದ್ಧ ಕೇಸು ಜಡಿಯಬೇಕೆಂದು ಸೋಮಶೇಖರ್‌ ಸದನದಲ್ಲಿ ಆಗ್ರಹಿಸಿದರು.

ಸೋಮಶೇಖರ್‌ ಆರೋಪಕ್ಕೆ ಕೆಂಡಮಂಡಲರಾದ ರಾಜೂಗೌಡ, ಎಲ್ಲಕ್ಕೂ ಸಾಕ್ಷ್ಯ ಒದಗಿಸಿ ಎಂದು ಸವಾಲು ಹಾಕಿದರು. ಕಾಡಿಗೆ ಹೋಗಿ ವೀರಪ್ಪನ್‌ ಜೊತೆ ಮಾತಾಡಿದ್ದು ನಿಮ್ಮ ಸಂಯುಕ್ತ ಜನತಾ ದಳದವರೇ ಆದ ಪೊನ್ನಾಚಿ ಮಹದೇವ ಸ್ವಾಮಿ. ಅವರ ವಿಷಯ ಮಾತಾಡಿ ಎಂದು ಕೆಣಕಿದರು.

ಇದಕ್ಕೆ ಉತ್ತರಿಸಿದ ಸೋಮಶೇಖರ್‌, ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ ಮತ್ತು ಗೃಹಸಚಿವ ಮಲ್ಲಿಕಾರ್ಜುನ ಖರ್ಗೆ ಅವರಿಗೆ ಹೇಳಿಯೇ ಪೊನ್ನಾಚಿ ಕಾಡಿಗೆ ಹೋದದ್ದು ಎಂದರು.

ನಾಗಪ್ಪನವರ ಬಿಡುಗಡೆ ವಿಚಾರದಲ್ಲಿ ನಿದ್ದೆ ಮಾಡಿದ ಸರ್ಕಾರ, ಏನೂ ಮಾಡದಿರುವುದೇ ದೊಡ್ಡ ಕಾರ್ಯತಂತ್ರ ಎಂದು ಭಾವಿಸಿತು. ವೀರಪ್ಪನ್‌ ಒತ್ತೆಯಿಂದ ನಟ ರಾಜ್‌ಕುಮಾರ್‌ ಬಿಡುಗಡೆಯಾದ ನಂತರ ವೀರಪ್ಪನ್‌ ಹಿಡಿಯಲು ಎಸ್‌ಟಿಫ್‌ ಏನೇನೂ ಮಾಡಲಿಲ್ಲ. ಬದಲಿಗೆ ತಮಿಳು ರಾಷ್ಟ್ರೀಯ ಚಳವಳಿ ನಾಯಕ ಪಿ.ನೆಡುಮಾರನ್‌ ಮತ್ತು ನಕ್ಕೀರನ್‌ ವರದಿಗಾರ ಶಿವಸುಬ್ರಮಣ್ಯನ್‌ನನ್ನು ಬಂಧಿಸಿತು ಎಂದು ಸೋಮಶೇಖರ್‌ ಕಟಕಿಯಾಡಿದರು.

(ಪಿಟಿಐ)

ಮುಖಪುಟ / ವೀರಪ್ಪನ್‌ ಶಿಕಾರಿ