ಕಾಮಗೆರೆ: ಸೋಮವಾರ ಸಂಜೆ ನಾಗಪ್ಪ ಅಂತ್ಯಕ್ರಿಯೆ

ಬೆಂಗಳೂರು: ಮಾಜಿ ಸಚಿವ ನಾಗಪ್ಪ ಅವರ ಅಂತ್ಯಕ್ರಿಯೆ ವಿಧಿಗಳು ಅವರ ಹುಟ್ಟೂರಾದ ಕಾಮಗೆರೆಯಲ್ಲಿ ಸಕಲ ಸರಕಾರಿ ಮರ್ಯಾದೆಗಳೊಂದಿಗೆ ಸೋಮವಾರ ಸಂಜೆ ನಡೆಯಲಿವೆ.

ಶವದ ಮರಣೋತ್ತರ ಪರೀಕ್ಷೆಗಳು ಸೋಮವಾರ ಮಧ್ಯಾಹ್ನ ಚಾಮರಾಜ ನಗರದ ಜಿಲ್ಲಾ ಆಸ್ಪತ್ರೆಯಲ್ಲಿ ಮುಕ್ತಾಯವಾದ ನಂತರ ಶವವನ್ನು ಕುಟುಂಬದವರಿಗೆ ಒಪ್ಪಿಸಲಾಗುವುದು ಎಂದು ಗೃಹ ಸಚಿವ ಮಲ್ಲಿಕಾರ್ಜುನ ಖರ್ಗೆ ತಿಳಿಸಿದ್ದಾರೆ.

ಈ ನಡುವೆ ನಾಗಪ್ಪ ಅವರ ದುರಂತ ಸಾವಿನ ಹಿನ್ನೆಲೆಯಲ್ಲಿ ಕಾಮಗೆರೆ ಉದ್ರಿಕ್ತಗೊಂಡಿದೆ. ನಾಗಪ್ಪ ಅವರ ಸಾವಿನ ಬಗ್ಗೆ ಶಂಕೆ ವ್ಯಕ್ತವಾಗುತ್ತಲೇ ಸಾವಿರಾರು ಮಂದಿ ಅಭಿಮಾನಿಗಳು ಕಾಡಿಗೆ ನುಗ್ಗಿದರು. ಕಣ್ಣಿಗೆ ಬಟ್ಟೆ ಕಟ್ಟಿರುವ ಕೊಳೆತು ಹೋದ ಶವ ನಾಗಪ್ಪ ಅವರದೇ ಎಂಬುದು ಖಚಿತವಾಗುತ್ತಿದ್ದಂತೆಯೇ ರೊಚ್ಚಿಗೆದ್ದ ಅಭಿಮಾನಿಗಳು ಸರಕಾರದ ವಿರುದ್ಧ ಘೋಣೆಗಳನ್ನು ಕೂಗುತ್ತ ಗಲಾಟೆ ಆರಂಭಿಸಿದಾಗ ಪರಿಸ್ಥಿತಿ ಗಂಭೀರ ಸ್ವರೂಪಕ್ಕೆ ಹೋಯಿತು.

ಅಭಿಮಾನಿಗಳ ಗುಂಪು ಕಾಮಗೆರೆಯಲ್ಲಿ ಪೊಲೀಸರ ವಿರುದ್ಧ ಕಲ್ಲು ತೂರಾಟ ನಡೆಸಿದಾಗ ಪ್ರತಿಭಟನೆ ನಿರತ ಗುಂಪನ್ನು ಚದುರಿಸಲು ಪೊಲೀಸರು ಗಾಳಿಯಲ್ಲಿ ಗುಂಡು ಹಾರಿಸಬೇಕಾಯಿತು. ಪರಿಸ್ಥಿತಿಯನ್ನು ನಿಯಂತ್ರಣದಲ್ಲಿ ಇಡಲು ಹೆಚ್ಚಿನ ಪೊಲೀಸ್‌ ಪಡೆಗಳು ಕಾಮಗೆರೆಗೆ ಧಾವಿಸಿವೆ.

ಹನೂರಿನಲ್ಲಿಯೂ ಪ್ರತಿಭಟನಾಕಾರರು ಮೂರು ಬಸ್ಸುಗಳಿಗೆ ಬೆಂಕಿ ಹಚ್ಚಿದ್ದಾರೆ. ವಡ್ಡರ ಪಾಳ್ಯದ ಸುತ್ತ ಮುತ್ತ ನಾಲ್ಕು ಲಾರಿಗಳು , ಎರಡು ಬಸ್‌ಗಳು ಉದ್ರಿಕ್ತರ ಬೆಂಕಿಗೆ ಸುಟ್ಟಿವೆ.

ಚಾಮರಾಜ ನಗರ, ಮೈಸೂರು ಹಾಗೂ ಮಂಡ್ಯ ಜಿಲ್ಲೆಗಳಲ್ಲಿಯೂ ಪರಿಸ್ಥಿತಿ ನಿಭಾಯಿಸಲು ಹೆಚ್ಚುವರಿ ಪೊಲೀಸ್‌ ಪಡೆಗಳು ಸಜ್ಜುಗೊಂಡಿವೆ.

(ಇನ್ಫೋ ವಾರ್ತೆ)

ಮುಖಪುಟ / ವೀರಪ್ಪನ್‌ ಶಿಕಾರಿ