ಉತ್ತರಾಂಚಲದ ಮುಖ್ಯಮಂತ್ರಿಯಾಗಿ ಕೋಶಿಯಾರ್‌ ಪ್ರಮಾಣ ವಚನ

ಉತ್ತರಾಂಚಲದ ನೂತನ ಮುಖ್ಯಮಂತ್ರಿಯಾಗಿ 59 ವರ್ಷದ ಭಗತ್‌ಸಿಂಗ್‌ ಕೋಶಿಯಾರಿ ಮಂಗಳವಾರ ಪ್ರಮಾಣ ವಚನ ಸ್ವೀಕರಿಸಿದರು. ಅವರು ಉತ್ತರಾಂಚಲ ರಾಜ್ಯದ ಎರಡನೇ ಮುಖ್ಯಮಂತ್ರಿ.

ಮಂಗಳವಾರ ಜರುಗಿದ ಸಮಾರಂಭದಲ್ಲಿ ರಾಜ್ಯಪಾಲ ಎಸ್‌.ಎಸ್‌.ಬರ್ನಾಲ ಅವರು ಕೋಶಿಯಾರಿ ಅವರಿಗೆ ಅಧಿಕಾರ ಮತ್ತು ಗೋಪ್ಯತೆಯ ಪ್ರಮಾಣವಚನ ಬೋಧಿಸಿದರು. ಈ ಮುನ್ನ ಮುಖ್ಯಮಂತ್ರಿಯಾಗಿದ್ದ ನಿತ್ಯಾನಂದ ಸ್ವಾಮಿ ಅವರ ಜಾಗೆಗೆ ಕೋಶಿಯಾರ್‌ ಅವರನ್ನು ಭಾರತೀಯ ಜನತಾಪಕ್ಷದ ಶಾಸಕಾಂಗ ಸಭೆ ಸೋಮವಾರ ಆಯ್ಕೆ ಮಾಡಿತ್ತು . ನಿತ್ಯಾನಂದ ಸ್ವಾಮಿ ಅವರ ಸಂಪುಟದಲ್ಲಿ ಕೋಶಿಯಾರ್‌ ವಿದ್ಯುತ್‌ ಸಚಿವರಾಗಿದ್ದರು.

ಮುಂಬರುವ ವಿಧಾನಸಭೆ ಚುನಾವಣೆಗಳನ್ನು ಗಮನದಲ್ಲಿರಿಸಿಕೊಂಡು ಸ್ಥಾನ ತೆರವು ಮಾಡುವಂತೆ ನಿತ್ಯಾನಂದ ಸ್ವಾಮಿ ಅವರಿಗೆ ಸೂಚಿಸಲಾಗಿತ್ತು . ಪ್ರಸ್ತುತ ಅಧಿಕಾರ ಸೂತ್ರಗಳನ್ನು ವಹಿಸಿಕೊಂಡಿರುವ ಕೋಶಿಯಾರ್‌ ಅವರು ರಾಷ್ಟ್ರೀಯ ಸ್ವಯಂ ಸೇವಾ

ಸಂಘದ ಬೆಂಬಲ ಹೊಂದಿದ್ದು , ವಿಧಾನಸಭೆ ಚುನಾವಣೆಗಳಲ್ಲಿ ಪಕ್ಷವನ್ನು ಮುನ್ನಡೆಸಲಿದ್ದಾರೆ.

(ಏಜೆನ್ಸೀಸ್‌)