ತಂಗಾಳಿಯ ಕಬ್ಬನ್‌ ಆವರಣದ ಪ್ರೆಸ್‌ ಕ್ಲಬ್ಬಲ್ಲಿ ಆ್ಯಂಥ್ರಾಕ್ಸ್‌ ಗಾಳಿ !

ಬೆಂಗಳೂರು : ಪ್ರೆಸ್‌ ಕ್ಲಬ್ಬಲ್ಲಿ ಆ್ಯಂಥ್ರಾಕ್ಸಂತೆ! ಈ ಗುಲ್ಲು ಹರಡುತ್ತಲೇ ಕಬ್ಬನ್‌ ಉದ್ಯಾನದ ತಂಗಾಳಿ ನಡುವೆ ಮಾತು ಮಂಥನ ನಡೆಸುವ ಮಾಧ್ಯಮದ ಬಳಗದ ಸದಸ್ಯರ ಸಂಖ್ಯೆಯಲ್ಲಿ ಮೊಟಕಾಗಿದೆ. ಮಂಗಳವಾರ ಪ್ರೆಸ್‌ ಕ್ಲಬ್‌ ಆಫ್‌ ಬೆಂಗಳೂರಿಗೆ ಪೊಲೀಸರು ಬಂದಿದ್ದರು. ಎಂಥದೋ ಬಿಳಿಪುಡಿಯಿರುವ ಲಕೋಟೆಯಾಂದು ಅಲ್ಲಿತ್ತು !

ಎಂದಿನಂತೆ ಪತ್ರಗಳನ್ನು ವಿಂಗಡಿಸಿದ ಒಬ್ಬರ ಗಮನವನ್ನು ಹಿಡಿದಿಟ್ಟು, ಆತಂಕ ಹುಟ್ಟಿಸಿದ ಬಿಳಿಪುಡಿಯಿರುವ ಲಕೋಟೆ ನಗರದ ಫ್ರೇಜರ್‌ ಟೌನ್‌ನಿಂದ ಬಂದಿತ್ತು. ಬೆಂಗಳೂರು ಐಟಿ ಡಾಟ್‌ ಕಾಂ ಮೇಳ- 2001 ಕುರಿತ ಜಾಹಿರಾತಿನ ಝೆ- ರಾಕ್ಸ್‌ ಪ್ರತಿಯ ಜೊತೆಯಲ್ಲೇ ಅದು ಬೆರೆತಿತ್ತು. ಪೊಲೀಸರಿಗೆ ವಿಷಯ ಮುಟ್ಟಿ, ಬಂದು ಪರಿಶೀಲಿಸಿದರು. ಪೊಲೀಸ್‌ ಇನ್ಸ್‌ಪೆಕ್ಟರ್‌ ವೆಂಕಟಸ್ವಾಮಿ ಅವರ ಪ್ರಕಾರ ಲಕೋಟೆಯಲ್ಲಿನ ಪುಡಿ ಪ್ರಾಯಶಃ ಆ್ಯಂಥ್ರಾಕ್ಸ್‌ ಹರಡುವಂತಹುದಲ್ಲ. ಆದರೂ ಪರೀಕ್ಷೆಗೆ ಕಳುಹಿಸಿಕೊಡುವುದಾಗಿ ಅವರು ಹೇಳಿದರು.

ಬೆಂಗಳೂರಿಗೆ ಆ್ಯಂಥ್ರಾಕ್ಸ್‌ ಭೀತಿ ಹುಟ್ಟಿಸುವ ಪುಡಿ ಹೊತ್ತು ತಂದಿರುವ ಮೂರನೇ ಪತ್ರವಿದು. ವಿಧಾನಸೌಧದಲ್ಲಿರುವ ಮುಖ್ಯಮಂತ್ರಿಯ ಕಾರ್ಯಾಲಯಕ್ಕೂ ಪುಡಿ ಹೊತ್ತ ಪತ್ರವೊಂದು ಬಂದಿದ್ದೂ ಸೇರಿದಂತೆ ಕಳೆದ ವಾರ ಇಂಥಾ ಎರಡು ಪ್ರಕರಣಗಳು ವರದಿಯಾಗಿದ್ದವು. ಪುಡಿಗಳನ್ನು ಪರೀಕ್ಷೆಗೆ ಕಳುಹಿಸಲಾಗಿದ್ದು, ಫಲಿತಾಂಶ ಇನ್ನೂ ತಿಳಿದುಬಂದಿಲ್ಲ.

(ಪಿಟಿಐ)