ಚಾಮುಂಡಿ ಕ್ರೀಡಾಂಗಣದಲ್ಲಿ ನ.22ರಿಂದ ಮೈಸೂರು ಐಟಿ.ಕಾಂ

ಮೈಸೂರು : ಈ ಹೊತ್ತು ವಿಶ್ವ ವಿಖ್ಯಾತ ದಸರ ಮಹೋತ್ಸವಕ್ಕೆ ಸರ್ವಸಜ್ಜಾಗಿರುವ ಮೈಸೂರು ಮುಂದಿನ ತಿಂಗಳು ನಡೆಯಲಿರುವ ಐಟಿ.ಕಾಂ ಮೇಳಕ್ಕೆ ಪೂರ್ವ ಸಿದ್ಧತೆಗಳನ್ನು ನಡೆಸಿದೆ. ನವೆಂಬರ್‌ 22ರಿಂದ 25ರವರೆಗೆ ಇಲ್ಲಿನ ಚಾಮುಂಡಿ ಒಳಾಂಗಣ ಕ್ರೀಡಾಂಗಣದಲ್ಲಿ ಮೈಸೂರುಐಟಿ.ಕಾಂ ಮೇಳ ಜರುಗಲಿದೆ.

ಮುಂದಿನ ದಿನಗಳಲ್ಲಿ ಮೈಸೂರು ನಗರವನ್ನು ಕೂಡ ಮಾಹಿತಿ ತಂತ್ರಜ್ಞಾನ ನಗರಿ ಮಾಡುವ ಉದ್ದೇಶದಿಂದ ಮೈಸೂರಿನ ಕಂಪ್ಯೂಟರ್‌ ಮಾರಾಟಗಾರರ ಸಂಘ ಕಳೆದ 3 ವರ್ಷಗಳಿಂದ ಐ.ಟಿ. ಮೇಳ ಆಯೋಜಿಸುತ್ತಿದೆ. ಈ ಬಾರಿ ಪೀಸಿ ಕ್ವೆಸ್ಟ್‌ ನಿಯತ ಕಾಲಿಕದ ಸಹಯೋಗದಲ್ಲಿ 4 ದಿನಗಳ ಕಾಲ ಈ ಸಮಾವೇಶ ನಡೆಯುತ್ತಿದೆ.

ನಗರದ ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ನಾಗರಿಕ ಸ್ಪಂದನಕ್ಕೆ ಅವಕಾಶ ಕಲ್ಪಿಸುವುದು ಈ ಸಮಾವೇಶದ ಉದ್ದೇಶವಾಗಿದೆ. ಇನ್‌ಫೋಸಿಸ್‌, ಸಾಫ್ಟ್‌ವೇರ್‌ ಪ್ಯಾರಾಡಿಮ್ಸ್‌, ಎಕ್ಸೆಲ್‌, ಇಂಟೆಲ್‌, ಎಲ್‌ ಅಂಡ್‌ ಟಿ, ವಿಪ್ರೋ ಮೊದಲಾದ ಬೃಹತ್‌ ಕಂಪನಿಗಳೂ ಈ ಮೇಳದಲ್ಲಿ ಪಾಲ್ಗೊಳ್ಳುತ್ತಿವೆ.

ಈ ವಿಷಯವನ್ನು ಜಿಲ್ಲಾ ಉಸ್ತುವಾರಿ ಹಾಗೂ ಪ್ರಾಥಮಿಕ ಶಿಕ್ಷಣ ಸಚಿವ ಎಚ್‌. ವಿಶ್ವನಾಥ್‌ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ. ಈ ಸಮಾವೇಶವನ್ನು ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಉದ್ಘಾಟಿಸಲಿದ್ದಾರೆ. ಈ ಮೇಳವು ಚಾಮರಾಜನಗರ, ಕೊಡಗು, ಹಾಸನ, ಮಂಡ್ಯ, ಚಿಕ್ಕಮಗಳೂರು ಜನತೆಗೆ ವರವಾಗಿ ಪರಿಣಮಿಸಲಿದೆ ಎಂದೂ ವಿಶ್ವನಾಥ್‌ ಹೇಳಿದರು.

ಕಳೆದ 4 ವರ್ಷಗ ಅವಧಿಯಲ್ಲಿ ಮೈಸೂರಿನ ಮಾಹಿತಿ ತಂತ್ರಜ್ಞಾನ ಕಂಪನಿಗಳು ಸುಮಾರು 54.8 ಕೋಟಿ ರುಪಾಯಿ ಸಾಫ್ಟ್‌ವೇರ್‌ಗಳನ್ನು ರಫ್ತು ಮಾಡಿವೆ ಎಂದು ಈ ಸಂದರ್ಭದಲ್ಲಿ ಹಾಜರಿದ್ದ ಮೇಳದ ವ್ಯವಸ್ಥಾಪಕ ವೆಂಕಟೇಶ್‌ ತಿಳಿಸಿದರು.

(ಇನ್‌ಫೋ ವಾರ್ತೆ)

ಮುಖಪುಟ / ಕರ್ನಾಟಕ ಸಿಲಿಕಾನ್‌ ಕಣಿವೆ