ನೊಬೆಲ್‌ ಶಾಂತಿ ಪ್ರಶಸ್ತಿಗೆ ವಾಜಪೇಯಿ ಹೆಸರು ಶಿಫಾರಸು

ನವದೆಹಲಿ : ದೆಹಲಿ ಮೂಲದ ಅಂತಾರಾಷ್ಟ್ರೀಯ ಜಾಗೃತಿ ಕೇಂದ್ರ ಪ್ರಧಾನಿ ಅಟಲ್‌ ಬಿಹಾರಿ ವಾಜಪೇಯಿ ಅವರ ಹೆಸರನ್ನು ಈ ಬಾರಿಯ ನೊಬೆಲ್‌ ಶಾಂತಿ ಪ್ರಶಸ್ತಿಗೆ ಶಿಫಾರಸು ಮಾಡಿದೆ.

ನಾರ್ವೆಯ ನೊಬೆಲ್‌ ಸಂಸ್ಥೆ ನಿರ್ದೇಶಕ ಗೇರ್‌ ಲುಂಡೆಸ್ಪಡ್‌ಗೆ ಈ ಸಂಬಂಧ ಜಾಗೃತಿ ಕೇಂದ್ರದ ಅಧ್ಯಕ್ಷ ಮಜಾಜ್‌ ಮುಂಗೇರಿ ಪತ್ರವನ್ನು ಬರೆದಿದ್ದಾರೆ. ವಾಜಪೇಯಿ ಅವರು, ಉಪಖಂಡದಲ್ಲಿ ಹಾಗೂ ದಕ್ಷಿಣ ಏಷ್ಯಾದಲ್ಲಿ ಶಾಂತಿ ಸ್ಥಾಪನೆಗಾಗಿ ಅವಿರತವಾಗಿ ಶ್ರಮಿಸುತ್ತಿದ್ದಾರೆ ಎಂದು ಅವರು ಪತ್ರದಲ್ಲಿ ತಿಳಿಸಿದ್ದಾರೆ.

ವಿಶ್ವ ಶಾಂತಿಗಾಗಿ ಶ್ರಮಿಸಿದ ಮಿಖಾಯಿಲ್‌ ಗೊರ್ಬಚೇವ್‌, ಎಫ್‌.ಡಬ್ಲ್ಯುಡಿ ಕ್ಲರ್ಕ್‌, ಯಾಸೀರ್‌ ಅರಾಫತ್‌, ನೆಲ್ಸನ್‌ ಮಂಡೇಲಾ ಅವರ ಸಾಲಿಗೆ ಸೇರುವ ವಾಜಪೇಯಿ ಅವರಿಗೆ ನೊಬೆಲ್‌ ಶಾಂತಿ ಪ್ರಶಸ್ತಿ ಕೊಡಬೇಕು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ಲಾಹೋರ್‌ ಯಾತ್ರೆ ಕೈಗೊಂಡು, ಆಗ್ರಾ ಶೃಂಗ ಸಭೆ ನಡೆಸಿದ ಪ್ರಧಾನಿ ನೊಬೆಲ್‌ ಶಾಂತಿ ಪ್ರಶಸ್ತಿಗೆ ಅರ್ಹರಾಗಿದ್ದಾರೆ ಎಂದು ಅವರು ವಾದಿಸಿದ್ದಾರೆ.

ಮುಖಪುಟ / ಇವತ್ತು... ಈ ಹೊತ್ತು...