ಗುಲ್ಬರ್ಗಾ ವಿಮಾನ ನಿಲ್ದಾಣ ಜಾಗಕ್ಕೆ ಪ್ರಾಧಿಕಾರದ ಅನುಮೋದನೆ

ಗುಲ್ಬರ್ಗಾ: ಉದ್ದೇಶಿತ ಗುಲ್ಬರ್ಗಾ ವಿಮಾನ ನಿಲ್ದಾಣ ನಿರ್ಮಾಣಕ್ಕಾಗಿ ಶ್ರೀನಿವಾಸ ಸರದಗಿ ಗ್ರಾಮದ ಬಳಿ ಗುರುತಿಸಲಾಗಿರುವ ಹೊಸ ನಿವೇಶನಕ್ಕೆ ಭಾರತದ ರಾಷ್ಟ್ರೀಯ ವಿಮಾನ ನಿಲ್ದಾಣ ಪ್ರಾಧಿಕಾರವು ಅನುಮೋದನೆ ನೀಡಿದೆ. ಈ ವಿಷಯವನ್ನು ರಾಜ್ಯದ ಗೃಹ ಸಚಿವ ಮಲ್ಲಿಕಾರ್ಜುನ ಖರ್ಗೆ ಗುರುವಾರ ಇಲ್ಲಿ ತಿಳಿಸಿದ್ದಾರೆ.

ಈ ಹೊಸ ಜಾಗವು ಗುಲ್ಬಾರ್ಗಾ ನಗರದಿಂದ ಕೇವಲ 8 ಕಿ.ಮೀಟರ್‌ ದೂರದಲ್ಲಿದ್ದು, ವಿಮಾನ ನಿಲ್ದಾಣ ನಿರ್ಮಾಣಕ್ಕೆ ಪ್ರಶಸ್ತವಾಗಿದೆ. ಉದ್ದೇಶಿತ ವಿಮಾನ ನಿಲ್ದಾಣದಲ್ಲಿ ಸುಮಾರು 3 ಕಿ.ಮೀಟರ್‌ ಉದ್ದದ ರನ್‌ವೇ ಇದ್ದು, ಬೋಯಿಂಗ್‌, ಏರ್‌ ಬಸ್‌ ಮೊದಲಾದ ದೊಡ್ಡ ವಿಮಾನಗಳೂ ಇಲ್ಲಿ ಇಳಿಯಬಹುದಾಗಿದೆ ಎಂದು ಖರ್ಗೆ ಹೇಳಿದರು.

ಇದಕ್ಕೂ ಮುನ್ನ ಆಯ್ಕೆ ಮಾಡಲಾಗಿದ್ದ ಜಾಗವು ವಿಮಾನ ನಿಲ್ದಾಣ ನಿರ್ಮಾಣಕ್ಕೆ ಅಷ್ಟು ಸೂಕ್ತವಾಗಿರಲಿಲ್ಲವಲ್ಲದೆ, ಅಲ್ಲಿ ಚಿಕ್ಕ ವಿಮಾನಗಳು ಮಾತ್ರ ಇಳಿಯಬಹುದಾಗಿತ್ತು ಎಂದು ಖರ್ಗೆ ಹೇಳಿದರು. ಈಗ ವಿಮಾನ ನಿಲ್ದಾಣ ಪ್ರಾಧಿಕಾರದಿಂದ ದೊರತಿರುವ ಅನುಮತಿಯಿಂದಾಗಿ ನಿಲ್ದಾಣ ನಿರ್ಮಾಣ ಕಾಮಗಾರಿ ಯೋಜನೆಗೆ ಶೀಘ್ರ ಚಾಲನೆ ದೊರೆಯಲಿದೆ ಎಂದೂ ಅವರು ಹೇಳಿದರು.

ಹಿಂದೆ ಆಯ್ಕೆ ಮಾಡಲಾಗಿದ್ದ ಜಾಗವನ್ನು ಬಡಾವಣೆಯಾಗಿ ಪರಿವರ್ತಿಸಿ, ಅಭಿವೃದ್ಧಿಪಡಿಸಲು ಕರ್ನಾಟಕ ಗೃಹ ನಿರ್ಮಾಣ ಮಂಡಳಿಗೆ ಒಪ್ಪಿಸಲಾಗುವುದು. ಅದಕ್ಕೆ ಪ್ರತಿಯಾಗಿ ಗೃಹ ಮಂಡಳಿಯು ವಿಮಾನ ನಿಲ್ದಾಣಕ್ಕೆ ಹೊಸ ಜಾಗ ಖರೀದಿಗೆ ಹಣ ನೀಡುವುದು ಎಂದೂ ಖರ್ಗೆ ವಿವರಿಸಿದರು.

(ಯು.ಎನ್‌.ಐ)