ಅರೆರೆರೆ.. ತುಂತುರು

ಮಳೆಗಾಲ ಬಂದಿದೆ. ಜೊತೆಗೆ ಅದರ ಸಿಹಿಕಹಿ ಪರಿಣಾಮಗಳ ಚುರುಮುರಿ ವರದಿಗಳೂ ಬಂದಿವೆ. ಯಥಾವತ್‌ ಉತ್ತರ ಕರ್ನಾಟಕ ಮತ್ತು ಕರಾವಳಿ ನಡುವೆ ಪಕ್ಷಪಾತದ ಧೋರಣೆಯಾಂದಿಗೆ ಬಂದವನ ಹರಾಕಿರಿಗಳ ಕತೆಯಿದು.

ಬಂದ ಮಳೆಯಲ್ಲಿ ಚೆನ್ನಾಗಿ ನೆಂದು ತೊಯ್ಯುವ ಭಾಗ್ಯ ಸಿಕ್ಕಿದ್ದು, ಹಾಸನ, ಕೊಡಗು, ಜೋಗ ಮತ್ತು ಕಾರ್ಗಲ್‌ಗಳಿಗೆ. ಹಾಸನದಲ್ಲಿ ಹೇಮಾವತಿ ತುಂಬಿದ್ದಾಳೆ. ಹೊಲ ಗದ್ದೆಗಳಲ್ಲಿ ಈಗ ಬಿರುಕಿಲ್ಲ.

ರಾಯಚೂರಿನ ಕೆಲವು ತಾಲ್ಲೂಕುಗಳಿಗೆ ಮಳೆಯ ಪಸೆ ತಲುಪಿದ ಸುದ್ದಿ ಬಿಟ್ಟರೆ, ಉತ್ತರ ಕರ್ನಾಟಕದೊಂದಿಗೆ ಮಳೆ ಹೆಚ್ಚೂ ಕಮ್ಮಿ ಟೂ ಬಿಟ್ಟ ಹಾಗಿದೆ. ಇದಕ್ಕೊಪ್ಪುವಂತೆ ಹವಾಮಾನ ಇಲಾಖೆ, ಉತ್ತರ ಕರ್ನಾಟಕಕ್ಕೆ ಈ ಬಾರಿ ಕಡಿಮೆ ಮಳೆ ಬೀಳಬಹುದು ಎಂದಿದ್ದು, ಬೆದರಿದವರ ಮೇಲೆ ಹಾವೆಸೆದಿದೆ.

ಆತಿಥ್ಯ ಸ್ವೀಕರಿಸಿದ್ದು ದಕ್ಷಿಣ ಕನ್ನಡದಲ್ಲಿ
ಏಪ್ರಿಲ್‌ ಕೊನೆಯಿಂದಲೇ ಲೆಕ್ಕಾಚಾರದ ಮೇಲೆ ಮಳೆಗಾಲ ಬಂತೆಂದು- ಜಾತ್ರೆ ಉತ್ಸವಗಳ ಖತಂಗೊಳಿಸುವ, ಯಕ್ಷಗಾನದ ಗಂಟು ಮೂಟೆ ಕಟ್ಟಿಡುವ, ಹೆಂಚು ಛಾವಣಿಯ ರಿಪೇರಿ ಕಾರ್ಯದಲ್ಲಿ ಕಳೆದು ಹೋಗುವ ಕರಾವಳಿಯವರಿಗೆ ಮಳೆ ಆಗಲೇ ಹಳತಾಗಿದೆ. 1220.6 ಮಿಮೀ ಮಳೆ ಬಿದ್ದ ವರದಿಯಾಗಿದ್ದರೂ ಕಳೆದ ವರ್ಷಕ್ಕೆ ಹೋಲಿಸಿದರೆ ಇದು ಕಮ್ಮಿಯಂತೆ.

ಮಂಗಳೂರು ಮಹಾನಗರದಲ್ಲಿ 256.6 ಮಿಮೀ, ಬಂಟ್ವಾಳದಲ್ಲಿ 286.8 ಮಿಮೀ, ಪುತ್ತೂರಿನಲ್ಲಿ 249.5 ಮಿಮೀ ಬಂದ ಮಳೆ ಇನ್ನೂ ಸುಸ್ತಾಗಿಲ್ಲ.

ಉಡುಪಿಯಲ್ಲಿ ಮಳೆಯ ಪರಾಕ್ರಮ ಸುಮಾರು 15 ರಿಂದ 20 ಮನೆಗಳ ಸೂರು ಕುಸಿವಂತೆ ಮಾಡಿದೆ. ಹೆಜಮಾಡಿ ಬಳಿಯ ಕೊಕ್ರಣಿ ಕುದ್ರುವಿನಲ್ಲಿ ಮನೆಯ ಜಂಕ್ತಿಗಳು ಕುಸಿದಿವೆ. ಉಡುಪಿಯ ಜಿಲ್ಲಾಧಿಕಾರಿ ಗೌರವ ಗುಪ್ತಾ ಮಾನ್‌ಸೂನ್‌ ತರುವ ತೊಂದರೆಗಳಿಂದ ಪಾರಾಗಲು ಮುನ್ನೆಚ್ಚರಿಕೆ ಕ್ರಮಗಳನ್ನು ತೆಗೆದುಕೊಳ್ಳಲು ಅಧಿಕಾರಿಗಳಿಗೆ ಆಜ್ಞಾಪಿಸಿದ್ದಾರೆ. ನೆರೆ, ಮಳೆ, ಸಿಡಿಲಿನಿಂದ ಹಾನಿಯಾದ ಮನೆ, ಮೀನುಗಾರಿಕಾ ಬಂದರು, ದೋಣಿಗಳ ವಿವರ ಗುಪ್ತಾರ ಟೇಬಲ್ಲು ತಲುಪಿದೆ.

ಕೊಡಗಿನಲ್ಲಿ ಸೋನೆ