ಜೂನ್‌ 1 ರಿಂದ ರಾಜ್ಯದ ಎಲ್ಲಾ ಶಾಲಾ ಮಕ್ಕಳಿಗೆ ಜೀವ ವಿಮೆ

ಬೆಂಗಳೂರು : 1 ರಿಂದ 10 ನೇ ತರಗತಿವರೆಗಿನ ರಾಜ್ಯದಲ್ಲಿನ ಎಲ್ಲ ಶಾಲೆಗಳ 1 ಕೋಟಿ 10 ಲಕ್ಷ ವಿದ್ಯಾರ್ಥಿಗಳಿಗೆ ಜೀವ ವಿಮೆ ಸೌಲಭ್ಯ ಕಲ್ಪಿಸುವ ವಿಶ್ವದಲ್ಲೇ ಪ್ರಥಮ ಎನ್ನಲಾದ ಐತಿಹಾಸಿಕ ಒಪ್ಪಂದಕ್ಕೆ ರಾಜ್ಯ ಶಿಕ್ಷಣ ಇಲಾಖೆ ಹಾಗೂ ಓರಿಯಂಟಲ್‌ ವಿಮಾ ಕಂಪನಿ ಶುಕ್ರವಾರ ಸಹಿ ಹಾಕಿದವು. ಜೂನ್‌1 ರಿಂದ ಶಾಲಾ ಮಕ್ಕಳ ಈ ಜೀವವಿಮಾ ಯೋಜನೆ ಜಾರಿಗೆ ಬರಲಿದೆ.

ಶಿಕ್ಷಣ ಸಚಿವ ಎಚ್‌. ವಿಶ್ವನಾಥ್‌ ಅವರ ಹಾಜರಿಯಲ್ಲಿ ನಡೆದ ಒಪ್ಪಂದದಲ್ಲಿ ಓರಿಯಂಟಲ್‌ ವಿಮಾ ಕಂಪನಿಯ ಪರವಾಗಿ ಅದರ ಮೇನೇಜರ್‌ ಸುಂದರಂ ಸಹಿ ಹಾಕಿದರು. ಸರ್ಕಾರಿ ಶಾಲೆಯ ವಿದ್ಯಾರ್ಥಿಗಳು ಮಾತ್ರವಲ್ಲದೆ, ಅನುದಾನಿತ ಹಾಗೂ ಅನುದಾನ ರಹಿತ ಶಾಲೆಗಳ ವಿದ್ಯಾರ್ಥಿಗಳಿಗೂ ಈ ವಿಮಾ ಯೋಜನೆಯ ಸೌಲಭ್ಯ ಪಡೆಯಲಿದ್ದಾರೆ ಎಂದು ಒಪ್ಪಂದದ ನಂತರ ಸುದ್ದಿಗಾರರ ಜೊತೆ ಮಾತನಾಡಿದ ವಿಶ್ವನಾಥ್‌ ತಿಳಿಸಿದರು.

ಜೀವವಿಮೆ ಪರಿಹಾರ ಹಣದ ಪೈಕಿ ಪ್ರತಿಶತ 33 ರಷ್ಟನ್ನು ರೋಟರಿ ಕ್ಲಬ್‌ ಭರಿಸಲಿದೆ. ಸುರಕ್ಷಾ ವಿಮೆ ಎನ್ನುವ ಈ ಯೋಜನೆಯಡಿ ವಿದ್ಯಾರ್ಥಿ ಆಕಸ್ಮಿಕವಾಗಿ ಮೃತನಾದರೆ, ಮೃತ ವಿದ್ಯಾರ್ಥಿಯ ಕುಟುಂಬಕ್ಕೆ 25 ಸಾವಿರ ರುಪಾಯಿ ನೀಡಲಾಗುವುದು. ವಿಮಾ ಪರಿಹಾರ ಮೊತ್ತದ ಪ್ರತಿಶತ 32 ರಷ್ಟನ್ನು ರೋಟರಿ ಕ್ಲಬ್‌ ಭರಿಸಿದರೆ, ಶೇ. 67 ರಷ್ಟನ್ನು ರಾಜ್ಯ ಸರ್ಕಾರ ಭರಿಸುವುದು. ಉಳಿದ ಶೇ. 1 ರ ಪಾಲನ್ನು ಓರಿಯಂಟಲ್‌ ವಿಮಾ ಕಂಪನಿ ಭರಿಸುತ್ತದೆ.

ಅಪಘಾತಗಳಲ್ಲಿ ಶಾಶ್ವತ ಅಂಗವಿಕಲನಾದರೆ 25 ಸಾವಿರ ರುಪಾಯಿ ಹಾಗೂ ಕೈ ಕಾಲು ಮುರಿದರೆ ಚಿಕಿತ್ಸೆಗಾಗಿ 1 ಸಾವಿರ ರು. ಪರಿಹಾರ ನೀಡಲಾಗುವುದು. ಶಾಲಾ ಮುಖ್ಯೋಪಾಧ್ಯಾಯರು ಅಥವಾ ರೋಟರಿ ಸಂಸ್ಥೆಗಳು ಈ ವಿಮಾ ಸೌಲಭ್ಯವನ್ನು ವಿದ್ಯಾರ್ಥಿಗಳಿಗೆ ಕಲ್ಪಿಸಬಹುದು.

(ಇನ್ಫೋ ವಾರ್ತೆ)