ಮಾವೋ ನಾಡಿನಲ್ಲಿ ಮೊದಲ ಬಾರಿಗೆಕರ್ನಾಟಕ ಸಂಗೀತ ಸುಧೆ !

ಬೀಜಿಂಗ್‌ : ಅಮೇರಿಕಾದಲ್ಲಿರುವ ಪ್ರಸಿದ್ಧ ಕೊಳಲು ವಾದಕ ತಂಜಾವೂರು ವಿಶ್ವನಾಥನ್‌ ಹಾಗೂ ಆತನ ಅಮೇರಿಕನ್‌ ಪತ್ನಿ ಇದೇ ಮೊದಲ ಬಾರಿಗೆ ಚೀನಾದಲ್ಲಿ ಕರ್ನಾಟಕ ಸಂಗೀತ ಕಚೇರಿ ನಡೆಸಿಕೊಟ್ಟರು. ಚೀನಾದಲ್ಲಿ ಶಾಸ್ತ್ರೀಯ ಸಂಗೀತವನ್ನು ಉತ್ತೇಜಿಸುವ ಅಂಗವಾಗಿ ಈ ಕಚೇರಿ ನಡೆಯಿತು.

ವೆಸ್ಲಿಯನ್‌ ವಿಶ್ವ ವಿದ್ಯಾಲಯದ ಸಂಗೀತ ವಿಭಾಗದಲ್ಲಿ ಸಹ ಪ್ರಾಧ್ಯಾಪಕರಾಗಿ ಸೇವೆ ಸಲ್ಲಿಸುತ್ತಿರುವ ವಿಶ್ವನಾಥನ್‌ ಅವರು ಪ್ರಸ್ತುತ, ಪ್ರತಿಷ್ಠಿತ ಸೆಂಟ್ರಲ್‌ ಕನ್ಸರ್‌ವೇಟರಿ ಆಫ್‌ ಮ್ಯೂಸಿಕ್‌ (ಸಿಸಿಎಂ) ಆಹ್ವಾನದ ಮೇರೆಗೆ ಚೀನಾದಲ್ಲಿದ್ದಾರೆ. ಷಾಂಗಾಯ್‌ ನಗರದಲ್ಲಿ ಭಾಷಣ ಹಾಗೂ ಕಚೇರಿಗಳನ್ನು ಅವರು ನಡೆಸಿಕೊಟ್ಟಿದ್ದಾರೆ ಎಂದು ಸಿಸಿಎಂನ ಪ್ರಾಧ್ಯಾಪಕ ರಿkುೕ ಮಿಂಗ್‌ ತಿಳಿಸಿದ್ದಾರೆ.

ಕೊಳಲು ನುಡಿಸಿದ ವಿಶ್ವನಾಥನ್‌ರಿಗೆ ಅವರ ಪತ್ನಿ ಜೋಸೆಫ ಕಾರ್‌ಮ್ಯಾಕ್‌ ತಮ್ಮ ತಂಪುರದೊಂದಿಗೆ ಜೊತೆಯಾದರು. ಎಥನೊ ಮ್ಯೂಸಿಕಾಲಜಿ ವಿಷಯದಲ್ಲಿ ಜೋಸೆಫ ಪಿಎಚ್‌ಡಿ ಪದವಿ ಗಳಿಸಿದ್ದಾರೆ. ವಿಶ್ವನಾಥನ್‌- ಜೋಸೆಫ ದಂಪತಿಗಳಿಗೆ ‘ಮೃದಂಗಂ ಮೈಂಡ್‌ ಥೀಸಿಸ್‌’ ಬರೆದಿರುವ ಡೇವಿಡ್‌ ನೆಲ್ಸನ್‌, ಮೃದಂಗಂ ಸಾಥ್‌ ನೀಡಿದುದು ಕಾರ್ಯಕ್ರಮದ ವಿಶೇಷ .

ವರ್ಲ್ಡ್‌ ಮ್ಯೂಸಿಕ್‌ ಸೊಸೈಟಿ ಆಫ್‌ ಚೀನಾದ ಅಧ್ಯಕ್ಷ ಚೆನ್‌ ಅವರಿಗಂತೂ ವಿಶ್ವನಾಥನ್‌ ಅವರ ಕಚೇರಿಯ ಬಗ್ಗೆ ಇನ್ನಿಲ್ಲದ ಹೆಮ್ಮೆ . ವಿಶ್ವನಾಥನ್‌ರ ಚೀನಾ ಭೇಟಿ ಕೇವಲ ಭಾರತದ ಶಾಸ್ತ್ರೀಯ ಸಂಗೀತದ ಬಗೆಗಿನ ಅರಿವನ್ನು ಹೆಚ್ಚಿಸಿರುವುದು ಮಾತ್ರವಲ್ಲದೆ, ಭಾರತದ ಸಮೃದ್ಧ ಸಂಸ್ಕೃತಿಯ ಒಳನೋಟಗಳನ್ನು ಅರಿಯಲು ಸಹಾಯಕವಾಗಿದೆ ಎಂದು ಅವರು ಬಣ್ಣಿಸಿದರು.

ಚೀನಾ ಪ್ರವಾಸದ ಬಗ್ಗೆ ವಿಶ್ವನಾಥನ್‌ ಖುಷಿಯಾಗಿದ್ದಾರೆ. ಇಲ್ಲಿನ ಆತ್ಮೀಯ ವಾತಾವರಣ- ಹೃದಯಪೂರ್ವಕ ಸ್ವಾಗತವನ್ನು ನಾನು ನಿರೀಕ್ಷಿಸಿರಲಿಲ್ಲ . ವಿದ್ಯಾರ್ಥಿಗಳು ಅನೇಕ ರೀತಿ ಪ್ರಶ್ನಿಸಿದರು. ಅವರ ಜ್ಞಾನ ನನ್ನನ್ನು ಪ್ರಭಾವಿತನನ್ನಾಗಿಸಿತು ಎಂದು ಅವರು ಹೇಳಿದರು.

(ಇನ್ಫೋ ವಾರ್ತೆ)