ಪ್ರಥಮ ದರ್ಜೆ ಕ್ರಿಕೆಟ್ಟಿಗೆ ವಿಕೆಟ್‌ ಕೀಪರ್‌ ಸಾಬಾ ಕರೀಂ ವಿದಾಯ

ಕೋಲ್ಕತಾ : ಜಿಂಬಾಬ್ವೆ ಪ್ರವಾಸ ಕೈಗೊಳ್ಳುವ ಭಾರತ ತಂಡವನ್ನು ಪ್ರಕಟಿಸಿದ ಮರುದಿನವೇ, ಬಂಗಾಳ ಕ್ರಿಕೆಟ್‌ ತಂಡದ ನಾಯಕ ಹಾಗೂ ಭಾರತೀಯ ಕ್ರಿಕೆಟ್‌ ತಂಡದ ಮಾಜಿ ವಿಕೆಟ್‌ ಕೀಪರ್‌ ಸಾಬಾ ಕರೀಂ ಪ್ರಥಮ ದರ್ಜೆ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ್ದಾರೆ.

ಪ್ರಥಮ ದರ್ಜೆ ಕ್ರಿಕ್ಟೆಟಿನಿಂದ ನಿವೃತ್ತನಾಗುತ್ತಿದ್ದೇನೆ. ಕಣ್ಣಿನ ತೊಂದರೆ ತುಂಬಾ ಬಾಧೆ ಕೊಡುತ್ತಿದೆ ಎಂದು ಶುಕ್ರವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಕರೀಂ ಹೇಳಿದರು. ಕಳೆದ ಏಷ್ಯಾ ಕಪ್‌ ಕ್ರಿಕೆಟ್‌ ಸಂದರ್ಭದಲ್ಲಿ ಅವರು ಗಾಯಗೊಂಡಿದ್ದರು. ಅನಿಲ್‌ ಕುಂಬ್ಳೆ ಬೌಲಿಂಗ್‌ನಲ್ಲಿ ಚಿಮ್ಮಿ ಬಂದ ಚೆಂಡು ಕರೀಂ ಅವರ ಬಲಗಣ್ಣನ್ನು ಗಾಯಗೊಳಿಸಿತ್ತು . ಆನಂತರ ಕೆಲವು ಪಂದ್ಯಗಳನ್ನು ಆಡಿದರೂ, ಅಂತರರಾಷ್ಟ್ರೀಯ ಪಂದ್ಯದ ಒತ್ತಡಕ್ಕೆ ಒಗ್ಗಿಕೊಳ್ಳುವುದು ಕಷ್ಟಸಾಧ್ಯವಾದ್ದರಿಂದ ನಿವೃತ್ತಿ ಘೋಷಿಸುತ್ತಿರುವುದಾಗಿ ಅವರು ಹೇಳಿದರು.

35 ಸೀಮಿತ ಓವರ್‌ಗಳ ಪಂದ್ಯ ಹಾಗೂ ಒಂದು ಟೆಸ್ಟ್‌ನಲ್ಲಿ ಭಾರತ ತಂಡವನ್ನು ಪ್ರತಿನಿಧಿಸಿರುವ ಕರೀಂ, ಇನ್ನು ಮುಂದೆ ಕೋಚ್‌ ಹಾಗೂ ವೀಕ್ಷಕ ವಿವರಣೆಕಾರನಾಗಲು ಬಯಸುವುದಾಗಿ ತಿಳಿಸಿದರು. ಪ್ರಸ್ತುತ ಟಾಟಾ ಸ್ಟೀಲ್‌ ಕಂಪನಿಯಲ್ಲಿ ಅಧಿಕಾರಿಯಾಗಿ ಅವರು ಸೇವೆ ಸಲ್ಲಿಸುತ್ತಿದ್ದಾರೆ.

(ಯುಎನ್‌ಐ)