ಸಂಸ್ಕರಿಸಿದ ಭಾರತೀಯ ಆಹಾರಕ್ಕೆ ಆಸ್ಟ್ರೇಲಿಯಾದಲ್ಲಿ ಭಾರಿ ಬೇಡಿಕೆ

ಕೊಲ್ಕತ್ತಾ : ಸಂಸ್ಕರಿಸಲಾದ ಭಾರತೀಯ ಆಹಾರ ಉತ್ಪನ್ನಗಳಿಗೆ ಆಸ್ಟ್ರೇಲಿಯಾದಲ್ಲಿ ಭಾರಿ ಬೇಡಿಕೆ ಇದೆ. ದಿನದಿಂದ ದಿನಕ್ಕೆ ಈ ಬೇಡಿಕೆ ಹೆಚ್ಚುತ್ತಲೇ ಇದೆ. ಸಂದರ್ಭದ ಲಾಭ ಪಡೆದು ಭಾರತೀಯ ಸಂಸ್ಕರಿತ ಆಹಾರ ತಯಾರಕರು ರಫ್ತು ಪ್ರಮಾಣ ಹೆಚ್ಚಿಸಿದರೆ, ಉಭಯ ದೇಶಗಳ ವ್ಯಾಪಾರ ವರ್ಧನೆ ಆಗಲಿದೆ ಎಂದು ಆಸ್ಟ್ರೇಲಿಯಾದ ಹಿರಿಯ ವ್ಯಾಪಾರ ಕಮಿಷನರ್‌ ರಿಚರ್ಡ್‌ ಕೊವಾಕ್‌ ಇಲ್ಲಿ ತಿಳಿಸಿದ್ದಾರೆ.

ಆಸ್ಟ್ರೇಲಿಯಾದ ಎಲ್ಲ ಪ್ರದೇಶದ ಅಂಗಡಿಗಳಲ್ಲೂ ಸಂಸ್ಕರಿಸಲಾದ ಭಾರತೀಯ ಆಹಾರ ಪದಾರ್ಥಗಳಿಗೆ ಹೆಚ್ಚಿನ ಬೇಡಿಕೆ ಇದೆ. ಅದಕ್ಕೆ ಉತ್ತಮ ಸ್ಥಾನವೂ ಇದೆ. ಭಾರತದ ಆಹಾರ ಉದ್ದಿಮೆ ಈ ಬೇಡಿಕೆಯ ಸಂಪೂರ್ಣ ಲಾಭ ಪಡೆದರೆ, ವಹಿವಾಟು ದುಪ್ಪಟ್ಟು, ಮೂರ್ಪಟ್ಟು ಆಗಲಿದೆ ಎಂದು ಹೇಳಿದರು.

ಆಸ್ಟ್ರೇಲಿಯಾದಲ್ಲಿ ಕೇವಲ ಆಹಾರ ಪದಾರ್ಥಗಳಿಗಷ್ಟೇ ಅಲ್ಲ, ಭಾರತದ ಸಿದ್ಧ ಉಡುಪು ಹಾಗೂ ಕುಸುರಿ ಕೆಲಸದ ಲೋಹದ ಉತ್ಪನ್ನಗಳಿಗೂ ಬಂಬಾಟ್‌ ಬೇಡಿಕೆ ಇದೆ. 2000 ಸಾಲಿನಲ್ಲಿ ಭಾರತ - ಆಸ್ಟ್ರೇಲಿಯಾ ನಡುವಣ ವ್ಯಾಪಾರದ ಪ್ರಮಾಣದ ಒಟ್ಟು ಮೌಲ್ಯ 2.5 ಶತಕೋಟಿ ಡಾಲರ್‌ ಆಗಿತ್ತು. ಅದರಲ್ಲಿ ಆಸ್ಟ್ರೇಲಿಯಾದಿಂದ ಭಾರತಕ್ಕೆ ರಫ್ತಾದ ವಸ್ತುವಿನ ಮೌಲ್ಯ 1.8 ಶತಕೋಟಿ, ಉಳಿದ 700 ದಶಲಕ್ಷ ಡಾಲರ್‌ ಮೊತ್ತದ ವಸ್ತು, ಸೇವೆ ಭಾರತದಿಂದ ಆಸ್ಟ್ರೇಲಿಯಾಕ್ಕೆ ರಫ್ತಾಗಿದೆ ಎಂದು ಅವರು ವಿವರಿಸಿದರು.