ಪಟ್ಟು ಬಿಡದ ಕಾಂಗ್ರೆಸ್‌ : ಸುಗಮ ಸಂಸತ್‌ ಕಲಾಪದ ಕನಸು ಭಗ್ನ ?

ನವದೆಹಲಿ : ತೆಹಲ್ಕಾ ಹಗರಣಕ್ಕೆ ಸಂಬಂಧಿಸಿದಂತೆ ಎನ್‌.ಡಿ.ಎ. ನೇತೃತ್ವದ ಕೇಂದ್ರ ಸರಕಾರದ ರಾಜೀನಾಮೆಗೆ ಹಠ ಹಿಡಿದು, ಬಜೆಟ್‌ ಅಧಿವೇಶನದ ಕಲಾಪಕ್ಕೆ ಅಡ್ಡಿಯುಂಟು ಮಾಡಿದ್ದ ಪ್ರತಿಪಕ್ಷಗಳು ತಮ್ಮ ಪಟ್ಟನ್ನು ಸಡಿಲಿಸಿ, ಮಂಗಳವಾರದಿಂದ ಕಲಾಪ ಸುಗಮವಾಗಿ ನಡೆಯಲು ಅವಕಾಶ ನೀಡುತ್ತವೆ ಎನ್ನುವ ಸುದ್ದಿಯ ಹಿಂದೆಯೇ ಕಾಂಗ್ರೆಸ್‌ನಿಂದ ಪ್ರತಿಕೂಲ ಹೇಳಿಕೆ ಬಂದಿದೆ.

ಕೇಂದ್ರ ಸರಕಾರ ರಾಜೀನಾಮೆ ನೀಡುವ ತನಕ ಸಂಸತ್‌ ಕಲಾಪಕ್ಕೆ ತಮ್ಮ ಪಕ್ಷ ಅಡ್ಡಿ ಪಡಿಸಿಯೇ ಪಡಿಸುತ್ತದೆ ಎಂದು ಸೋಮವಾರ ಕಾಂಗ್ರೆಸ್‌ ಪಕ್ಷದ ವಕ್ತಾರ ಎಸ್‌. ಜಯಪಾಲ ರೆಡ್ಡಿ ತಿಳಿಸಿದ್ದಾರೆ. ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡುತ್ತಾ ಅವರು ತೆಹಲ್ಕಾ ಆರೋಪಿಗಳಿಗೆ ಶಿಕ್ಷೆ ಆಗುವ ತನಕ ತಮ್ಮ ಈ ಹೋರಾಟ ಮುಂದುವರಿಯಲಿದೆ ಎಂದರು.

ತಮ್ಮ ಪಕ್ಷ ಸುಗಮವಾಗಿ ಸಂಸತ್‌ ಕಾಲಾಪಗಳು ನಡೆಯಬೇಕು ಎಂಬುದನ್ನೇ ಬಯಸುತ್ತದೆ. ಆದರೆ, ತೆಹಲ್ಕಾ ಹಗರಣಕ್ಕೆ ಸಂಬಂಧಿಸಿದಂತೆ ಸರಕಾರ ನಿಷ್ಪಕ್ಷಪಾತವಾಗಿ ವರ್ತಿಸುತ್ತಿಲ್ಲ. ಈ ಹಗರಣದಲ್ಲಿ ಕೇಂದ್ರ ಸರಕಾರದ ನಿಜವಾದ ಬಣ್ಣ ಬಯಲಾಗಿದೆ ಎಂದರು. ಸೋಮವಾರ ಸೋನಿಯಾಗಾಂಧಿ ಅವರ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ಈ ತೀರ್ಮಾನ ಕೈಗೊಳ್ಳಲಾಯಿತು ಎಂದೂ ಅವರು ತಿಳಿಸಿದರು.

ತೆಹಲ್ಕಾ ಹಗರಣವನ್ನು ಮುಚ್ಚಿಕೊಳ್ಳಲು ತಮ್ಮ ಪಕ್ಷದ ಅಧ್ಯಕ್ಷೆ ಸೋನಿಯಾಗಾಂಧಿ ಅವರನ್ನು ಗುರಿಯಾಗಿಟ್ಟುಕೊಂಡಿರುವ ಭಾರತೀಯ ಜನತಾಪಕ್ಷದ ಧೋರಣೆಯನ್ನು ರೆಡ್ಡಿ ಖಂಡಿಸಿದರು.

(ಇನ್‌ಫೋ ಪ್ರತಿನಿಧಿಯಿಂದ)

ಮುಖಪುಟ / ಇವತ್ತು... ಈ ಹೊತ್ತು...