ತಣ್ಣೀರು ಬಾವಿಗೆ ಆಗಮಿಸಿದ ಬಾರ್ಜ್ ಮೌಂಟೆಡ್ ಸ್ಥಾವರ
ಮಂಗಳೂರು : ತಣ್ಣೀರು ಬಾವಿಯಲ್ಲಿ ಸ್ಥಾಪಿಸಲು ಉದ್ದೇಶಿಸಲಾಗಿರುವ ಬಾರ್ಜ್ ಮೌಂಟೆಡ್ ವಿದ್ಯುತ್ ಸ್ಥಾವರಕ್ಕೆ 220 ಮೆಗಾ ವ್ಯಾಟ್ ಸಾಮರ್ಥ್ಯದ ಸಮಗ್ರ ಸ್ಥಾವರ ಮಂಗಳೂರು ಬಂದರಿಗೆ ಆಗಮಿಸಿದೆ.
ದಕ್ಷಿಣ ಕೋರಿಯಾದ ರಾಜಧಾನಿ ಸೋಲ್ ಸಮೀಪದ ಉಲ್ಸನ್ನಿಂದ, ಕೊರಿಯಾದ ಹುಂಡೈ ಶಿಪ್ ಯಾರ್ಡ್ ಮೂಲಕ ರವಾನೆಯಾದ ಸಮಗ್ರ ಘಟಕ, ಮೂಲ ಆಧಾರದ ನೌಕೆಯಾಂದಿಗೆ ಮಂಗಳೂರು ಹಳೇ ಬಂದರನ್ನು ತಲುಪಿದೆ. ರಷ್ಯನ್ ನೌಕೆ ಟ್ರಾನ್ಶೆಲ್ಫ್ ಫೆಬ್ರವರಿ 12ರಂದು ಬಳೇ ಬಂದರಿಗೆ ಆಗಮಿಸಿದ್ದು, ಒಶನ್ ಮರ್ಕ್ಯುರಿ, ಓಶನ್ ರೋಮಿಯೋ, ಓಶನ್ ಕ್ಯೂಬಿಕ್ ಎಂಬ ಮೂರು ಟಗ್ಗಳು ಸಿಂಗಾಪುರ್ ಬಂದರಿನಿಂದ ಬಂದಿವೆ.
ಬಂದರಿಗೆ ಸಮೀಪವಿರುವ ತಣ್ಣೀರು ಬಾವಿಯಲ್ಲಿ ಈ ಬಾರ್ಜ್ (ತೇಲು ಘಟಕ) ವಿದ್ಯುತ್ ಉತ್ಪಾದನಾ ಚಟುವಟಿಕೆಯನ್ನು ಆರಂಭಿಸಲಿದೆ. 1000 ಕೋಟಿ ರೂಪಾಯಿ ವೆಚ್ಚದ ವಿದ್ಯುತ್ ಸ್ಥಾವರವನ್ನು ಹೈದರಾಬಾದ್ನ ಜಿ. ಎಂ.ಆರ್ ವಾಸವಿ ಸಂಸ್ಥೆ ನಿರ್ವಹಿಸಲಿದೆ. ಈ ವಿದ್ಯುತ್ ಸ್ಥಾವರದಿಂದ ಮೀನುಗಾರಿಕೆಗೆ ಹಾನಿಯಾಗಲಿದೆ ಎಂಬ ಆಪಾದನೆಯಿದ್ದು, ಕರಾವಳಿ ವಲಯ ನಿಯಂತ್ರಣ ಕಾಯ್ದೆಯೂ ಇಲ್ಲಿ ಅನ್ವಯವಾಗುವ ಕುರಿತು ಚರ್ಚೆ ನಡೆಯುತ್ತಿದೆ.
(ಇನ್ಫೋ ವಾರ್ತೆ)