ಪೊಲೀಸ್‌ ದೌರ್ಜನ್ಯ : ಫೆ. 13, ರೈತರಿಂದ ಕರ್ನಾಟಕ ಬಂದ್‌

ಬೆಂಗಳೂರು : ಬೆಲೆ ಕುಸಿತ ವಿರೋಧಿಸಿ ಫೆಬ್ರವರಿ 5ರಂದು ಗುಲ್ಬರ್ಗಾ ತೊಗರಿ ಬೆಳೆಗಾರರು ಪ್ರತಿಭಟನೆ ನಡೆಸಿದ್ದು, ಆಗ ಪೊಲೀಸರು ಮನಬಂದಂತೆ ರೈತರನ್ನು ಥಳಿಸಿದ್ದು ನಿಮಗೆ ಗೊತ್ತಿರಬಹುದು. ಈ ಘಟನೆಗೆ ಕಾರಣವಾಗಿದ್ದಾರೆ ಎನ್ನಲಾದ ಅಪರ ಪೊಲೀಸ್‌ ಸೂಪರಿಂಟೆಂಡೆಂಟ್‌ ಅವರನ್ನು ಅಮಾನತ್ತುಗೊಳಿಸುವಂತೆ ಆಗ್ರಹಿಸಿ ಫೆಬ್ರವರಿ 13ರಂದು ರಾಜ್ಯಾದ್ಯಂತ ಬಂದ್‌ ನಡೆಸಲು ವಿವಿಧ ರೈತ ಸಂಘಟನೆಗಳು ತೀರ್ಮಾನಿಸಿವೆ.

ಶನಿವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡುತ್ತಿದ್ದ ಭಾರತೀಯ ವ್ಯಾಪಾರಿ ಒಕ್ಕೂಟಗಳ ಕೇಂದ್ರ (ಸಿಐಟಿಯು) ದ ಅಧ್ಯಕ್ಷ ಎಸ್‌.ಸುಬ್ಬನಾರಾಯಣ ರಾವ್‌ ಈ ವಿಷಯ ತಿಳಿಸಿದರು. ಉತ್ತರ ಕರ್ನಾಟಕದ ಗುಲ್ಬರ್ಗಾ, ರಾಯಚೂರು, ವಿಜಾಪುರ ಹಾಗೂ ಕೊಪ್ಪಳಗಳಲ್ಲಿ ಪೂರ್ಣ ಬಂದ್‌ ಆಚರಿಸಲಾಗುವುದು. ಉಳಿದ ಜಿಲ್ಲೆಗಳಲ್ಲಿ ಪ್ರತಿಭಟನಾ ಮೆರವಣಿಗೆ ನಡೆಸಲಾಗುವುದು ಎಂದರು.

ಫೆಬ್ರವರಿ 5ರಂದು ಬೆಳೆ ಕುಸಿತದಿಂದ ಹತಾಶರಾಗಿದ್ದ ಗುಲ್ಬರ್ಗಾ ರೈತರು ಪ್ರತಿಭಟನೆ ನಡೆಸುತ್ತಿದ್ದಾಗ, ಪೊಲೀಸರು ಕೆಲವರನ್ನು ಕೈಕಟ್ಟಿ ಪೊಲೀಸ್‌ ಠಾಣೆಗೆ ಕರೆದೊಯ್ದಿದ್ದಾರೆ. ಗುಲ್ಬರ್ಗಾದ ಹಾಗೂ ಇತರ ರೈತ ಮುಖಂಡರ ವಿರುದ್ಧ ದಾಖಲಿಸಿರುವ ಮೊಕದ್ದಮೆಗಳನ್ನು ವಾಪಸ್ಸು ತೆಗೆದುಕೊಳ್ಳಬೇಕು. ಪ್ರತಿ ಕ್ವಿಂಟಾಲ್‌ ತೊಗರಿಗೆ 2800 ರುಪಾಯಿ ಕನಿಷ್ಠ ಬೆಂಬಲ ಬೆಲೆ ನಿಗದಿ ಪಡಿಸಬೇಕು ಎಂಬುವು ನಮ್ಮ ಬೇಡಿಕೆಗಳು ಎಂದು ಸುಬ್ಬನಾರಾಯಣ ರಾವ್‌ ಹೇಳಿದರು.

ಸಿಐಟಿಯು ಕರೆದಿರುವ ಈ ಬಂದ್‌ಗೆ ಕರ್ನಾಟಕ ರಾಜ್ಯ ರೈತ ಸಂಘ, ಕರ್ನಾಟಕ ಪ್ರಾಂತ ರೈತ ಸಂಘ ಮತ್ತು ಕರ್ನಾಟಕ ಕೃಷಿ ಕೂಲಿದಾರರ ಸಂಘ ಬೆಂಬಲ ನೀಡಿವೆ.

(ಯುಎನ್‌ಐ)