ಏಕರೂಪ ಕೀಲಿಮಣೆ : ತಂತ್ರಾಂಶ ಅಭಿವೃದ್ಧಿಗೆ ಸರ್ಕಾರದ ಗಡುವು

ಕರ್ನಾಟಕ ಸರ್ಕಾರ

ಸಂಖ್ಯೆ ಮಾತಂನಿ 002 ಕ.ಸಾ.ಅ /1557/2000-01 ಮಾಹಿತಿ ತಂತ್ರಜ್ಞಾನ ನಿರ್ದೇಶನಾಲಯ, ಬಹುಮಹಡಿ ಕಟ್ಟಡ, ಡಾ. ಬಿ.ಆರ್‌. ಅಂಬೇಡ್ಕರ್‌ ವೀಧಿ, ಬೆಂಗಳೂರು- 560001

ದಿನಾಂಕ 05-01- 2001

ಸರ್ಕಾರದ ಮಾನ್ಯತೆ ಪಡೆದಿರುವ ಎಲ್ಲಾ ಕನ್ನಡ ತಂತ್ರಾಂಶ ತಯಾರಿಕಾ ಮಾರಾಟಗಾರ ಸಂಸ್ಥೆಯ ಮುಖ್ಯಸ್ಥರುಗಳಿಗೆ.

ಮಾನ್ಯರೇ,

ವಿಷಯ : ಕನ್ನಡ ಲಿಪಿ ತಂತ್ರಾಂಶಗಳ ಶಿಷ್ಟತೆ ಮತ್ತು ಏಕರೂಪತೆ - ಈ ಬಗ್ಗೆ

ಕಂಪ್ಯೂಟರ್‌ಗಳಲ್ಲಿ ಕನ್ನಡವನ್ನು ವ್ಯಾಪಕವಾಗಿ ಮತ್ತು ಸಮರ್ಥವಾಗಿ ಬಳಸಲು ಅನುಕೂಲವಾಗುವಂತೆ ಕನ್ನಡ ಲಿಪಿ ತಂತ್ರಾಂಶಗಳಲ್ಲಿ ಏಕರೂಪತೆ ತರುವ ಉದ್ದೇಶದಿಂದ ಏಕರೂಪ ಕೀಲಿಮಣೆ ವಿನ್ಯಾಸ ಮತ್ತು ಕನ್ನಡ ಲಿಪಿಗೆ ಬೇಕಾದ ಶಿಷ್ಟ ಮತ್ತು ಏಕರೂಪ ಅಕ್ಷರಭಾಗಗಳು ಹಾಗೂ ತಂತ್ರಾಂಶಗಳಲ್ಲಿ ಏಕಭಾಷಾ ಆಕರರೂಪಗಳಿಗೆ ಬಳಸಬೇಕಾದ ಸಂಕೇತಗಳನ್ನು ನಿಗದಿಪಡಿಸಿ ಉಲ್ಲೇಖದಲ್ಲಿನ ಅಧಿಸೂಚನೆ ಮತ್ತು ಆದೇಶಗಳನ್ನು ಹೊರಡಿಸಲಾಗಿದೆ. ಇವುಗಳನ್ನು ನಿಗದಿಪಡಿಸುವ ಮೊದಲು ತಂತ್ರಾಂಶ ತಯಾರಕರಾದ ತಮ್ಮ ಸಲಹೆ, ಅಭಿಪ್ರಾಯಗಳನ್ನೂ ಪಡೆಯಲಾಗಿತ್ತೆಂಬುದು ವಾಸ್ತವ ಸಂಗತಿ.

ಸರ್ಕಾರವು ನಿಗದಿಪಡಿಸಿರುವ ಏಕರೂಪ ಕೀಲಿಮಣೆ ವಿನ್ಯಾಸ ಮತ್ತು ಅಕ್ಷರ ಭಾಗಗಳನ್ನು ತಂತ್ರಾಂಶ ತಯಾರಕರು ಅವರ ತಂತ್ರಾಂಶಗಳಲ್ಲಿ ಕಡ್ಡಾಯವಾಗಿ ಒದಗಿಸಬೇಕೆಂದು ಸಹ ಆದೇಶಿಸಲಾಗಿದೆ. ಉಲ್ಲೇಖದಲ್ಲಿನ ಅಧಿಸೂಚನೆಯಲ್ಲಿ ನಿಗದಿಪಡಿಸಿರುವ ಏಕರೂಪ ಕೀಲಿಮಣೆ ವಿನ್ಯಾಸ ಮತ್ತು ದಿನಾಂಕ 01-11-2000 ದ ಆದೇಶದಲ್ಲಿನ ಸೂಚನೆಗನುಸಾರ ತಂತ್ರಾಂಶ ಅಭಿವೃದ್ಧಿಪಡಿಸಲು ದಿನಾಂಕ 15-02-2001 ರವರೆಗೆ ಗಡುವು ನೀಡಲಾಗಿದೆ. ಅಷ್ಟರೊಳಗೆ ತಂತ್ರಾಂಶ ತಯಾರಕರು ಮಾರಾಟಗಾರರು, ಸದರಿ ಶಿಷ್ಟತೆ ಮತ್ತು ಸೂಚನೆಗಳನುಸಾರ, ಅಭಿವೃದ್ಧಿಪಡಿಸಲಾದ ತಂತ್ರಾಂಶ ಒದಗಿಸಲು ವಿಫಲರಾದಲ್ಲಿ ಅವರ ಸಂಸ್ಥೆಯನ್ನು ಸರ್ಕಾರದ ಮಾನ್ಯತೆ ಪಡೆದ ಅಧಿಕೃತ ತಂತ್ರಾಂಶ ತಯಾರಕರ ಪಟ್ಟಿಯಿಂದ ತೆಗೆದುಹಾಕಲಾಗುವುದೆಂದು ಈ ಮೂಲಕ ತಿಳಿಸಲಾಗಿದೆ.

ಈಗಾಗಲೇ ತಮಗೆ ಕಳುಹಿಸಿರುವ ಉಲ್ಲೇಖ (2) ರಲ್ಲಿನ ಸರ್ಕಾರಿ ಆದೇಶದ ಪ್ರತಿಯಾಂದನ್ನು ಮತ್ತೊಮ್ಮೆ ಮಾಹಿತಿಗಾಗಿ ಮತ್ತು ಅಗತ್ಯ ಕ್ರಮಕ್ಕಾಗಿ ಕಳುಹಿಸಲಾಗಿದೆ.

ತಮ್ಮ ವಿಶ್ವಾಸಿ.

ನಿರ್ದೇಶಕರು

ಮುಖಪುಟ / ಇವತ್ತು... ಈ ಹೊತ್ತು...