ನನಗೇನೂ ಗೊತ್ತಿಲ್ಲ , ಎಲ್ಲವನ್ನೂ ದೇವರಿಗೆ ಬಿಟ್ಟಿದ್ದೇನೆ - ಅಜರುದ್ದೀನ್‌

ನವದೆಹಲಿ : ಮ್ಯಾಚ್‌ಫಿಕ್ಸಿಂಗ್‌ ಪ್ರಕರಣದಲ್ಲಿ ಸಿಬಿಐ ತಮ್ಮ ವಿರುದ್ಧ ಹೊರಿಸಿರುವ ಆರೋಪಗಳೆಲ್ಲಾ ಸತ್ಯಕ್ಕೆ ದೂರವಾದವು ಎಂದು ಮಾಜಿ ಕ್ರಿಕೆಟ್‌ ಆಟಗಾರ ಅಜರುದ್ದೀನ್‌ ಶುಕ್ರವಾರ ಸಂದರ್ಶನವೊಂದರಲ್ಲಿ ಹೇಳಿದ್ದಾರೆ.

ನಾನು ಯಾವತ್ತೂ ಮೋಸದಾಟದ ಬಗ್ಗೆ ಯೋಚಿಸಿಲ್ಲ . ಎಲ್ಲವೂ ನನ್ನ ವಿರುದ್ಧವಾಗಿದೆ ಎಂದು ಅಜರುದ್ದೀನ್‌ ಹೇಳಿದ್ದಾರೆ. ಸಿಬಿಐ ಮುಂದೆ ತಾವು ತಪ್ಪೊಪ್ಪಿಕೊಂಡಿರುವುದನ್ನು ನಿರಾಕರಿಸಿದ ಅವರು, ಪ್ರಶ್ನೆಯನ್ನು ಕೇಳಿದವರೇ ಉತ್ತರವನ್ನೂ ಹೇಳಿಕೊಂಡಿದ್ದಾರೆ ಎಂದರು.

ಭೂಗತ ಜಗತ್ತಿನೊಂದಿಗೆ ತಮಗಿರುವ ಸಂಬಂಧಗಳ ಬಗ್ಗೆ ಎದ್ದಿರುವ ಸುದ್ದಿಗಳ ಬಗ್ಗೆ ನನಗೆ ಏನೂ ಗೊತ್ತಿಲ್ಲ . ಮಾಫಿಯಾ ವ್ಯಕ್ತಿಗಳೊಂದಿಗೆ ತಾವಿರುವ ಫೋಟೋ ಬಗ್ಗೆಯೂ ಗೊತ್ತಿಲ್ಲ . ಆ ವ್ಯಕ್ತಿ ಯಾರೆಂಬುದಾಗಲೀ, ಫೋಟೋ ತೆಗೆದವರು ಯಾರೆನ್ನುವುದಾಗಲೀ ಗೊತ್ತಿಲ್ಲ ಎಂದು ಅವರು ಹೇಳಿದರು.

ಬುಕ್ಕಿ ಎಂ.ಕೆ. ಗುಪ್ತಾ ಅವರು ನಿಮಗೆ ಪರಿಚಯವಿದ್ದಾರೆಯೇ ಎನ್ನುವ ಪ್ರಶ್ನೆಗೂ ಅಜರ್‌ ಸ್ಪಷ್ಟವಾಗಿ ಉತ್ತರಿಸಲಿಲ್ಲ . ಎಲ್ಲವನ್ನೂ ದೇವರಿಗೆ ಬಿಟ್ಟಿದ್ದೇನೆ ಎಂದರು. ಬುಕ್ಕಿ ಗುಪ್ತಾ ಅವರನ್ನು ನನಗೆ ಪರಿಚಯಿಸಿದ್ದೇ ಅಜರುದ್ದೀನ್‌ ಎಂದು ದಕ್ಷಿಣ ಆಫ್ರಿಕಾ ತಂಡದ ಮಾಜಿ ನಾಯಕ ಹ್ಯಾನ್ಸಿ ಕ್ರೊನಿಯೆ ಆಪಾದಿಸಿದ್ದುದನ್ನು ಇಲ್ಲಿ ಸ್ಮರಿಸಬಹುದು.

(ರಾಯ್ಟರ್ಸ್‌)

ವಾರ್ತಾ ಸಂಚಯ
ಮುಖಪುಟ / ಆಟದ ಅಂಗಳ