ಉಡುಪಿಯ ಪ್ರಥಮ ಸಾಹಿತ್ಯ ಸಮ್ಮೇಳನಾಧ್ಯಕ್ಷರಾಗಿ ಬನ್ನಂಜೆ ಗೋವಿಂದಾಚಾರ್ಯ

ಉಡುಪಿ : ಉಡುಪಿ ಜಿಲ್ಲೆಯ ಪ್ರಥಮ ಕನ್ನಡ ಸಾಹಿತ್ಯ ಸಮ್ಮೇಳನ ಡಿಸೆಂಬರ್‌ 16 ಹಾಗೂ 17ರಂದು ನಡೆಯಲಿದ್ದು, ಸಮ್ಮೇಳನಾಧ್ಯಕ್ಷರಾಗಿ ವಿದ್ಯಾ ವಾಚಸ್ಪತಿ ಬನ್ನಂಜೆ ಗೋವಿಂದಾಚಾರ್ಯರನ್ನು ಸರ್ವಾನುಮತದಿಂದ ಆಯ್ಕೆ ಮಾಡಲಾಗಿದೆ ಎಂದು ಸಮ್ಮೇಳನದ ಸ್ವಾಗತ ಸಮಿತಿಯ ಪ್ರಕಟಣೆ ತಿಳಿಸಿದೆ.

ಕನ್ನಡ - ಸಂಸ್ಕೃತ ವಿದ್ವಾಂಸರಾಗಿರುವ ಗೋವಿಂದಾಚಾರ್ಯರು ಉತ್ತಮ ವಾಗ್ಮಿಗಳು, ಭಾಷಾಂತರಕಾರ, ಕವಿ ಮತ್ತು ಗದ್ಯ ಲೇಖಕರಾಗಿ ಪ್ರಸಿದ್ಧರು. ಮಹಾಭಾರತ ರಾಮಾಯಣ, ವೇದ ಉಪನಿಷತ್‌, ಭಾಗವತ ಮತ್ತಿತರ ಸಂಸ್ಕೃತ ಕೃತಿಗಳ ಕುರತು ಉಪನ್ಯಾಸಗಳನ್ನು ನೀಡುತ್ತಾರೆ. ಉತ್ತಮ ಪ್ರವಚನಕಾರರಾಗಿರುವ ಗೋವಿಂದಾಚಾರ್ಯರು ಉದಯವಾಣಿಯ ಮ್ಯಾಗಸೀನ್‌ ವಿಭಾಗದ ನಿವೃತ್ತ ಸಂಪಾದಕರು.

ಐವತ್ತಕ್ಕೂ ಹೆಚ್ಚು ಸ್ವರಚಿತ, ಅನುವಾದಿತ ಮತ್ತು ಸಂಪಾದಿತ ಕೃತಿಗಳನ್ನು ಬರೆದಿದ್ದಾರೆ. ಅವರು ಭಾಷಾಂತರಿಸಿದ ಕೃತಿಗಳಲ್ಲಿ ಬಾಣಭಟ್ಟನ ಕಾದಂಬರಿ, ಶೂದ್ರಕನ ಆವೆ ಮಣ್ಣಿನ ಆಟದ ಬಂಡಿ, ಭವಭೂತಿಯ ಮತ್ತೆ ರಾಮನ ಕತೆ ಪ್ರಸಿದ್ಧವಾದವು. ಉಡುಪಿ ಜಿಲ್ಲಾ ಸಾಹಿತ್ಯ ಸಮ್ಮೇಳನವನ್ನು ಧರ್ಮಸ್ಥಳ ವಿರೇಂದ್ರ ಹೆಗ್ಗಡೆ ಉದ್ಘಾಟಿಸಲಿದ್ದಾರೆ.

(ಇನ್ಫೋ ವಾರ್ತೆ)