ಇದೊಂದು ವಸ್ತು ಬಳಸಿ ಬಾತ್ರೂಮ್ ಬಕೆಟ್ನಲ್ಲಿ ಅಂಟಿಕೊಂಡಿರುವ ಗಡಸು ಕಲೆಯನ್ನು ನಿಮಿಷಗಳಲ್ಲಿ ತೆಗೆಯಬಹುದು!
ಬಕೆಟ್ ಮತ್ತು ಮಗ್ಗಳಂತಹ ಸ್ನಾನಗೃಹದ ಅಗತ್ಯ ವಸ್ತುಗಳು ಪ್ರತಿದಿನ ನೀರು, ಸೋಪು, ಶಾಂಪೂ ಮತ್ತು ಕೊಳಕಿಗೆ ಒಡ್ಡಿಕೊಳ್ಳುತ್ತವೆ. ಈ ಕಾರಣದಿಂದಾಗಿ ಬಕೆಟ್ನಲ್ಲಿ ಹಳದಿ ಕಲೆಗಳು, ಗಡಸು ನೀರಿನ ಕಲೆಗಳು ಮತ್ತು ಕೆಟ್ಟ ವಾಸನೆ ಬರಲು ಶುರುವಾಗುತ್ತದೆ. ಹೊಸ ಬಕೆಟ್ ಮತ್ತು ಮಗ್ ಕೂಡಾ ಸ್ವಲ್ಪ ಸಮಯದಲ್ಲಿಯೇ ಹಳೆಯದರಂತೆ ಕಾಣಿಸಬಹುದು. ಹೀಗಾದಾಗ ಆ ಬಕೆಟ್ ಮತ್ತು ಮಗ್ ಅನ್ನು ಮತ್ತೆ ಬಳಸಲು ಅಸಹ್ಯ ಅನ್ನಿಸಿಬಿಡುವುದುಂಟು.
ಆದರೆ, ಇದನ್ನು ಸುಲಭವಾಗಿ ಶುಚಿಗೊಳಿಸಬಹುದು ಎನ್ನುವುದು ಬಹುತೇಕರಿಗೆ ತಿಳಿದಿರುವುದಿಲ್ಲ. ಬಕೆಟ್ ಮತ್ತು ಮಗ್ಗಳನ್ನು ಕ್ಲೀನ್ ಮಾಡಲು ದುಬಾರಿ ಉತ್ನನ್ನಗಳನ್ನು ಬಳಸುವ ಅಗತ್ಯವೂ ಇರುವುದಿಲ್ಲ. ನಿಮ್ಮ ಅಡುಗೆ ಮನೆಯ ಕೆಲವು ವಸ್ತುಗಳನ್ನು ಬಳಸಿಕೊಂಡೇ ಬಕೆಟ್ ಮತ್ತು ಮಗ್ ಅನ್ನು ಹೊಸದರಂತೆ ಮಾಡಬಹುದು.
ಮೊದಲ ವಿಧಾನ:
ಪ್ಲಾಸ್ಟಿಕ್ ಬಕೆಟ್ಗಳು ಮತ್ತು ಮಗ್ಗಳನ್ನು ಸ್ವಚ್ಛಗೊಳಿಸಲು ಸುಲಭವಾದ ಮಾರ್ಗವೆಂದರೆ ಅಡಿಗೆ ಸೋಡಾ ಮತ್ತು ವಿನೆಗರ್. ಬಕೆಟ್ಗೆ ಎರಡರಿಂದ ಮೂರು ಚಮಚ ಅಡಿಗೆ ಸೋಡಾ ಸೇರಿಸಿ, ನಂತರ ಸ್ವಲ್ಪ ಪ್ರಮಾಣದ ವಿನೆಗರ್ ಸುರಿಯಿರಿ. ಈ ಫಿಜಿಂಗ್ ಕ್ರಿಯೆಯು ಕೊಳಕು ಮತ್ತು ಮೊಂಡುತನದ ಕಲೆಗಳನ್ನು ಸಡಿಲಮಾಡುತ್ತದೆ. 10 ರಿಂದ 15 ನಿಮಿಷಗಳ ಕಾಲ ಈ ಮಿಶ್ರಣವನ್ನು ಬಕೆಟ್ನಲ್ಲಿ ಹಾಗೆಯೇ ಬಿಡಿ. ನಂತರ ಬ್ರಷ್ನಿಂದ ನಿಧಾನವಾಗಿ ಸ್ಕ್ರಬ್ ಮಾಡಿ ಶುದ್ಧ ನೀರಿನಿಂದ ಚೆನ್ನಾಗಿ ತೊಳೆದರೆ ಬಕೆಟ್ ಮತ್ತೆ ಹೊಸದರಂತೆ ಫಳ ಫಳ ಹೊಳೆಯುತ್ತದೆ.
ಎರಡನೇ ವಿಧಾನ:
ನಿಂಬೆ ಮತ್ತು ಉಪ್ಪು ಕೂಡಾ ನೈಸರ್ಗಿಕ ಕ್ಲೀನರ್ಗಳಾಗಿ ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸುತ್ತವೆ. ನಿಂಬೆಹಣ್ಣನ್ನು ಅರ್ಧದಷ್ಟು ಕತ್ತರಿಸಿ, ಅದರ ಮೇಲೆ ಉಪ್ಪನ್ನು ಸಿಂಪಡಿಸಿ ಕಠಿಣ ಕಲೆಗಳು ಅಂಟಿಕೊಂಡಿರುವ ಜಾಗದಲ್ಲಿ ನೇರವಾಗಿ ಉಜ್ಜಿ. ಕೆಲವು ನಿಮಿಷಗಳ ನಂತರ, ನೀರಿನಿಂದ ತೊಳೆಯಿರಿ. ನಿಂಬೆಹಣ್ಣಿನ ನೈಸರ್ಗಿಕ ಆಸಿಡ್ ಈ ಮೊಂಡು ಕಲೆಗಳನ್ನು ಸುಲಭವಾಗಿ ಒಡೆಯುತ್ತದೆ. ಬಕೆಟ್ ಮೇಲ್ಮೈ ಸ್ವಚ್ಛವಾಗಿ ಕಾಣುತ್ತದೆ.
ಮೂರನೇ ವಿಧಾನ:
ಬಕೆಟ್ನಲ್ಲಿ ಕಲೆಗಳು ಹೆಚ್ಚಾಗಿದ್ದು, ಅದನ್ನು ತೆಗೆಯಲು ಸೋಂಕುನಿವಾರಕ ಅಗತ್ಯವಿದ್ದರೆ, ತೆಳುವಾಗಿಸಿದ ಬ್ಲೀಚ್ ದ್ರಾವಣವು ಸಹಾಯ ಮಾಡುತ್ತದೆ. ಒಂದು ಬಕೆಟ್ ನೀರಿನಲ್ಲಿ ಸ್ವಲ್ಪ ಪ್ರಮಾಣದ ಬ್ಲೀಚ್ ಅಥವಾ ಸೋಂಕುನಿವಾರಕ ದ್ರವವನ್ನು ಬೆರೆಸಿ. ಬಕೆಟ್ ಮತ್ತು ಮಗ್ ಅನ್ನು 15 ರಿಂದ 20 ನಿಮಿಷಗಳ ಕಾಲ ಅದರಲ್ಲಿ ನೆನೆಸಿಡಿ. ನಂತರ ಬಕೆಟ್ ಅನ್ನು ಚೆನ್ನಾಗಿ ತೊಳೆಯಿರಿ. ಆದರೆ ನೆನಪಿರಲಿ ಬ್ಲೀಚ್ ಬಳಸುವಾಗ ಯಾವಾಗಲೂ ಹ್ಯಾಂಡ್ ಗ್ಲೌಸ್ ಧರಿಸುವುದನ್ನು ಮರೆಯಬೇಡಿ. ಮಾತ್ರವಲ್ಲ ಈ ಹೊತ್ತಿನಲ್ಲಿ ಮಕ್ಕಳು ಹತ್ತಿರ ಬರದಂತೆ ನೋಡಿಕೊಳ್ಳಿ.
ನಾಲ್ಕನೇ ವಿಧಾನ:
ನಿಯಮಿತವಾಗಿ ಬಕೆಟ್ ಮತ್ತು ಮಗ್ ಅನ್ನು ಕ್ಲೀನ್ ಮಾಡುತ್ತಿರಬೇಕು ಎಂದಾದರೆ ಬಕೆಟ್ ಮತ್ತು ಮಗ್ಗಳನ್ನು ಬೆಚ್ಚಗಿನ ನೀರು ಮತ್ತು ಸ್ವಲ್ಪ ಪಾತ್ರೆ ತೊಳೆಯುವ ದ್ರವದಿಂದ ತೊಳೆಯಿರಿ. ಇದು ಸೋಪಿನ ಅವಶೇಷಗಳು, ಮತ್ತು ನಿತ್ಯ ಬಕೆಟ್ನಲ್ಲಿ ಸಂಗ್ರಹವಾಗುವ ಕೊಳಕು ತೆಗೆಯಲು ಸಹಾಯ ಮಾಡುತ್ತದೆ. ಹೀಗೆ ಮಾಡಿದರೆ ಬಕೆಟ್ನಲ್ಲಿ ಕಲೆಗಳು ಅಂಟಿಕೊಳ್ಳುವುದಿಲ್ಲ.ವಾರಕ್ಕೊಮ್ಮೆ ಬಕೆಟ್ ಮತ್ತು ಮಗ ತೊಳೆಯುತ್ತಾ ಬಂದರೆ ಮೊಂಡುತನದ ಕಲೆಗಳು ರೂಪುಗೊಳ್ಳುವುದನ್ನು ತಡೆಯಬಹುದು.
ಸರಳ ಅಭ್ಯಾಸ:
ಕೆಲವು ಸರಳ ಅಭ್ಯಾಸಗಳು ಸ್ನಾನಗೃಹದ ಬಕೆಟ್ಗಳು ಮತ್ತು ಮಗ್ಗಳನ್ನು ಹೆಚ್ಚು ಕಾಲ ಸ್ವಚ್ಛವಾಗಿಡಲು ಸಹಾಯ ಮಾಡುತ್ತದೆ. ಸ್ನಾನದ ನಂತರ ಬಕೆಟ್ನಲ್ಲಿರುವ ನೀರನ್ನು ಖಾಲಿ ಮಾಡಿ. ಬ್ಯಾಕ್ಟೀರಿಯಾ ಮತ್ತು ವಾಸನೆಯನ್ನು ಕಡಿಮೆ ಮಾಡಲು ಆಗಾಗ ಅವುಗಳನ್ನು ಸೂರ್ಯನ ಬೆಳಕಿನಲ್ಲಿ ಬಿಡಿ. ಬಕೆಟ್ಗಳನ್ನು ನೇರವಾಗಿ ನೆಲದ ಮೇಲೆ ಇಡುವ ಬದಲು ಸ್ಟ್ಯಾಂಡ್ನಲ್ಲಿ ಇಡುವುದರಿಂದ ಕೊಳಕು ಕೆಳಗೆ ಸಂಗ್ರಹವಾಗುವುದನ್ನು ತಡೆಯಬಹುದು.
ಹೀಗೂ ಮಾಡಬಹುದು:
ಉತ್ತಮ ಫಲಿತಾಂಶಗಳಿಗಾಗಿ, ನಿಮ್ಮ ಬಕೆಟ್ಗಳು ಮತ್ತು ಮಗ್ಗಳನ್ನು ತಿಂಗಳಿಗೊಮ್ಮೆ ವಿನೆಗರ್ ಅಥವಾ ಅಡಿಗೆ ಸೋಡಾ ಬಳಸಿ ಡೀಪ್ ಕ್ಲೀನ್ ಮಾಡಿ. ನಿಯಮಿತ ಶುಚಿಗೊಳಿಸುವಿಕೆಯು ಅವುಗಳನ್ನು ಹೊಸದರಂತೆ ಕಾಣುವಂತೆ ಮಾಡುತ್ತದೆ. ಮಾತ್ರವಲ್ಲದೆ ನೈರ್ಮಲ್ಯವನ್ನು ಸುಧಾರಿಸುತ್ತದೆ. ಕೆಲವು ಸರಳ ಮನೆಯ ಹ್ಯಾಕ್ಗಳೊಂದಿಗೆ, ನಿತ್ಯ ಬಳಕೆಯ ವಸ್ತುಗಳನ್ನು ತಾಜಾ, ಸ್ವಚ್ಛ ಮತ್ತು ದೀರ್ಘಕಾಲ ಬಾಳಿಕೆ ಬರುವಂತೆ ಇರಿಸಬಹುದು.
(ಬರಹ: ರಂಜಿತಾ ಆರ್.ಕೆ.)
Click it and Unblock the Notifications
Sign in with Google