Viral Video: ಸಾಕು ನಾಯಿ ಹಸ್ಕಿ-ಮಾಲೀಕನ ಮೇಲೆ ಹಿಂಸಾತ್ಮಕ ಕ್ರೌರ್ಯ: ವಿಡಿಯೋ ಹಂಚಿಕೊಂಡ ಪೊಲೀಸರು

ಸಾಕು ನಾಯಿ ವಿಚಾರವಾಗಿ ಜಗಳವಾಡುವುದು, ಬೈಗುಳಗಳು ಸಾಮಾನ್ಯ. ನಂತರ ಎಂದಿನಂತೆ ವರ್ತಿಸುವವರು ಇದ್ದಾರೆ, ಮುನಿಸು ಮುಂದುವರೆಸುವವರು ಇದ್ದಾರೆ. ಆದರೆ ಇಲ್ಲೊಂದು ಪ್ರಕರಣದಲ್ಲಿ ನೆರೆಹೊರೆಯವರೇ ದೊಣ್ಣೆ, ಕಬ್ಬಿಣ ಸರಳುಗಳಿಂದ ಹಸ್ಕಿ ನಾಯಿ ಮತ್ತು ಮಾಲೀಕರ ಮೇಲೆ ಮನ ಬಂದಂತೆ ಹಲ್ಲೆ ಮಾಡಿದ್ದಾರೆ. ಈ ಘಟನೆಯ ವಿಡಿಯೋವನ್ನು ಸ್ವತಃ ಪೊಲೀಸರೇ ಹಂಚಿಕೊಂಡಿದ್ದು, ಭಾರೀ ವೈರಲ್ ಆಗುತ್ತಿದೆ.

ಹೈದರಾಬಾದ್‌ನಲ್ಲಿ ಈ ಘಟನೆ ನಡೆದಿದೆ. ಇಲ್ಲಿನ ಮಧುರಾನಗರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದ ಘಟನೆ ಇದಾಗಿದೆ. ಪ್ರಾಣಿಪ್ರಿಯರು ಸೇರಿದಂತೆ ಅನೇಕರು ಈ ವಿಡಿಯೋವನ್ನು ಹೆಚ್ಚಿನ ಪ್ರಮಾಣದಲ್ಲಿ ಶೇರ್ ಮಾಡುತ್ತಿದ್ದಾರೆ. ಈ ಘಟನೆಯು ಎಂಥವರನ್ನು ಅಚ್ಚರಿಪಡಿಸುವಂತೆ ಮಾಡುತ್ತದೆ. ಸಣ್ಣ ವಿಷಯಕ್ಕೆ ಇಷ್ಟೊಂದು ಹಿಂಸೆ ಬೇಕಾ? ಎಂದನಿಸದೇ ಇರದು.

ಹಲ್ಲೆ ಮಾಡಿದ ಐವರ ಬಂಧನ: ಆಗಿದ್ದೇನು?

ಸಾಕು ನಾಯಿ ಮತ್ತು ಅದರ ಮಾಲೀಕ ಮಧು ಎಂಬುವವರ ಮೇಲೆ ಹಲ್ಲೆ ನಡೆಸಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಎರಡು ಕಡೆಯವರು ದೂರು ನೀಡಿದ್ದಾರೆ. ಸದ್ಯ ಹಲ್ಲೆ ಮಾಡಿದ ಆರೋಪದಲ್ಲಿ ಒಟ್ಟು ಐದು ಮಂದಿಯನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ಗುರುವಾರ ಮಾಹಿತಿ ಹಂಚಿಕೊಂಡಿದ್ದಾರೆ.

ಮಧುರಾ ನಗರ ಪೊಲೀಸ್ ಠಾಣೆಯ ಠಾಣಾಧಿಕಾರಿ ಡಿ ಮಧುಸೂಧನ್ ರೆಡ್ಡಿ ಅವರ ಪ್ರಕಾರ, ನಾಯಿ ಮಾಲೀಕ ಮಧು ಮತ್ತು ಹಲ್ಲೆ ಮಾಡಿದ ಧನಂಜಯ್ ಮತ್ತು ಅವರ ನಾಲ್ಕು ಮಂದಿ ಸಹಚರರು ನೆರೆಹೊರೆಯವರು. ಈ ಧನಂಜಯನ್ ಕಡೆಯವರು ಸೇರಿ ನನ್ನ ಮೇಲೆ, ನಮ್ಮ ಹಸ್ಕಿ ನಾಯಿ ಮೇಲೆ ಹಲ್ಲೆ ಮಾಡಿದ್ದಾರೆ ಎಂದು ಮಧು ಮನೆಯವರು ದೂರು ನೀಡಿದ್ದಾರೆ. ಇದಕ್ಕೆ ಪ್ರತಿಯಾಗಿ ಧನಂಜಯ್ ಸಹ ಕೌಂಟರ್ ದೂರು ಸಹ ನೀಡಿದ್ದಾರೆ.

ವಿಡಿಯೋದಲ್ಲಿ ಏನಿದೆ?

ಮಧು ಎಂದಿನಂತೆ ಬುಧವಾರ ರಾತ್ರಿ ನಾಯಿಯನ್ನು ಮನೆ ಬಳಿ ರಸ್ತೆಯಲ್ಲಿ ಓಡಾಡಿಸುತ್ತಿದ್ದರು. ಒಂದು ಕೈಯಲ್ಲಿ ಮೊಬೈಲ್ ಮತ್ತೊಂದು ಕೈಯಲ್ಲಿ ಬೆಲ್ಟ್‌ನಿಂದ ನಾಯಿಯನ್ನು ಹಿಡಿದುಕೊಂಡಿದ್ದರು. ಈ ವೇಳೆ ಅವರ ಪಕ್ಕದಲ್ಲಿಯೇ ತೆರಳಿದ ಧನಂಜಯ್ ಅವರು ಮಳೆ ತಮ್ಮ ಸಹಚರರ ಜತೆ ದೊಣ್ಣೆ, ಕಬ್ಬಿಣದ ಸರಳು ಸಮೇತ ಮಧು ಬಳಿ ಬಂದು ಹಲ್ಲೆ ನಡೆಸಿದ್ದಾರೆ.

ನಾಯಿಗೆ ಥಳಿಸುತ್ತಿದ್ದಂತೆ ಅದು ಹೆದರಿ ಪಕ್ಕಕ್ಕೆ ಸರಿದಿದೆ. ಕೂಡಲೇ ಎಲ್ಲರೂ ಮಧು ಮೇಲೆ ಎರಗಿದ್ದಾರೆ. ಕೈ ಕಾಲು, ದೇಹಕ್ಕೆ ಮನಬಂದಂತೆ ಎಲ್ಲ ಸೇರಿ ಕೆಡವಿ ಹೊಡೆದಿದ್ದಾರೆ. ಹಿಂಸಾತ್ಮಕವಾಗಿ ಹಲ್ಲೆ ಮಾಡಿರುವುದು, ವಿಕೋಪದ ಕ್ರೌರ್ಯ ಇದಾಗಿದೆ. ಈ ವೇಳೆ ಬಿಡಿಸಿಕೊಳ್ಳಲು ಬಂದ ಮಧು ತಾಯಿ ಮತ್ತು ಸಹೋದರಿಗೂ ಒಂದಷ್ಟು ಗಾಯಗಳಾಗಿವೆ. ಇದು ವಿಡಿಯೋದಲ್ಲಿ ಸೆರೆಯಾಗಿದೆ. ವಿಡಿಯೋ ನೋಡಿದವರಿಗೆ ಇದು ನಾಯಿಗಾಗಿ ಜಗಳ ಅಲ್ಲ ಎನ್ನಿಸುತ್ತದೆ. ಯಾವುದೋ ಧ್ವೇಷಕ್ಕಾಗಿ ಮಾಡಿ ಹಲ್ಲೆ ಎಂದು ಶಂಕೆ ವ್ಯಕ್ತವಾಗುತ್ತದೆ.

ವೈಯಕ್ತಿಕ ಕಾರಣಕ್ಕೆ ಹಲ್ಲೆಯ ಅನುಮಾನ

ಸದ್ಯ ಹಲ್ಲೆ ಮಾಡಿದ ಐವರ ಮೇಲೆ ಸೆಕ್ಷನ್ 147, 148, 307 ಆರ್/ಡಬ್ಲ್ಯು 34 ಐಪಿಸಿ ಮತ್ತು ಪ್ರಾಣಿಗಳ ಮೇಲಿನ ಕ್ರೌರ್ಯ ತಡೆ ಕಾಯ್ದೆಯ ಸೆಕ್ಷನ್ 11(1) ಅಡಿಯಲ್ಲಿ ಪ್ರಕರಣ ದಾಖಲಾಗಿದೆ. ಸದ್ಯ ದಾಳಿ ಮಾಡಿದ ಎಲ್ಲ ಐವರು ಪೊಲೀಸ್ ಬಂಧನದಲ್ಲಿದ್ದಾರೆ.

ಮಧು ಹಾಗೂ ಧನುಂಜಯ್ ಕುಟುಂಬಗಳ ನಡುವೆ ಇದೇ 8ರಂದು ಜಗಳ ನಡೆದಿತ್ತು. ಮಧು ಅವರ ಕುಟುಂಬದವರು ತಮ್ಮ ಹಲಸಿನ ನಾಯಿಯೊಂದಿಗೆ ಅಂಚೆ ಮತ ಚಲಾಯಿಸಲು ತೆರಳುತ್ತಿದ್ದಾಗ ಸಂಘರ್ಷದ ಘಟನೆ ನಡೆದಿದೆ. ಇದು ವೈಯಕ್ತಿಕ ಕಾರಣಗಳಿಗೆ ನಡೆದ ಹಲ್ಲೆಯ ಘಟನೆ ಎಂದು ಪೊಲೀಸರು ಅನುಮಾನ ವ್ಯಕ್ತಪಡಿಸಿದ್ದಾರೆ.

English summary

Shocking Video Viral of Neighbors attacked on Pet Husky and Owner in Hyderabad Madhura Nagar