DKD Winner: ಡ್ಯಾನ್ಸ್ ಕರ್ನಾಟಕ ಡ್ಯಾನ್ಸ್ ಗ್ರ್ಯಾಂಡ್ ಫಿನಾಲೆ: ಸಿದ್ದೇಗೌಡ-ದೀಶಲ್ ಜೋಡಿಗೆ ಒಲಿದ 'ಡಿಕೆಡಿ' ಕಿರೀಟ
Dance Karnataka Dance Finale: ಕನ್ನಡ ಕಿರುತೆರೆಯ ಅತ್ಯಂತ ದೊಡ್ಡ ಡ್ಯಾನ್ಸ್ ರಿಯಾಲಿಟಿ ಶೋ 'ಡ್ಯಾನ್ಸ್ ಕರ್ನಾಟಕ ಡ್ಯಾನ್ಸ್' ಮಹಾ ಸಮರಕ್ಕೆ ಅದ್ಧೂರಿ ತೆರೆ ಬಿದ್ದಿದೆ. ಭಾನುವಾರ ನಡೆದ ರೋಚಕ ಗ್ರ್ಯಾಂಡ್ ಫಿನಾಲೆಯಲ್ಲಿ ಸಿದ್ದೇಗೌಡ ಮತ್ತು ದೀಶಲ್ ಜೋಡಿ ಈ ಬಾರಿಯ ಚಾಂಪಿಯನ್ ಆಗಿ ಹೊರಹೊಮ್ಮಿದೆ. ಕಾರ್ಯಕ್ರಮದ ತೀರ್ಪುಗಾರರಾಗಿದ್ದ ಹ್ಯಾಟ್ರಿಕ್ ಹೀರೋ ಶಿವರಾಜ್ಕುಮಾರ್ ಅವರು ವಿಜೇತರ ಹೆಸರನ್ನು ಘೋಷಿಸಿ, ಟ್ರೋಫಿ ಹಸ್ತಾಂತರಿಸಿದರು.
ಈ ಜೋಡಿಗೆ ಆಕರ್ಷಕ ಟ್ರೋಫಿ ಮತ್ತು ಬರೋಬ್ಬರಿ 15 ಲಕ್ಷ ರೂಪಾಯಿ ನಗದು ಬಹುಮಾನವನ್ನು ಹಸ್ತಾಂತರಿಸಿದರು. ಸಿದ್ದೇಗೌಡ ಮತ್ತು ದೀಶಲ್ ತಮ್ಮ ಅದ್ಭುತ ನೃತ್ಯ ಶೈಲಿ ಹಾಗೂ ವಿಭಿನ್ನ ಪರಿಕಲ್ಪನೆಗಳ ಮೂಲಕ ಮೊದಲಿನಿಂದಲೂ ತೀರ್ಪುಗಾರರ ಮತ್ತು ಪ್ರೇಕ್ಷಕರ ಮನಗೆಲ್ಲುವಲ್ಲಿ ಯಶಸ್ವಿಯಾಗಿದ್ದರು. ಈ ಗೆಲುವಿನೊಂದಿಗೆ ಸಿದ್ದೇಗೌಡ-ದೀಶಲ್ ಜೋಡಿಗೆ ನಗದು ಬಹುಮಾನ ಹಾಗೂ ಆಕರ್ಷಕ ಟ್ರೋಫಿ ಲಭಿಸಿದೆ. ಕಾರ್ಯಕ್ರಮದ ಆರಂಭದಿಂದಲೂ ತಮ್ಮ ವಿಶಿಷ್ಟ ನೃತ್ಯ ಸಂಯೋಜನೆ ಮತ್ತು ಶಿಸ್ತಿನ ಪ್ರದರ್ಶನದ ಮೂಲಕ ಗಮನ ಸೆಳೆದಿದ್ದ ಈ ಜೋಡಿ, ಫಿನಾಲೆಯಲ್ಲೂ ತೀರ್ಪುಗಾರರಿಂದ ಮೆಚ್ಚುಗೆಯ ಮಹಾಪೂರವನ್ನೇ ಪಡೆಯಿತು.
ರನ್ನರ್ ಅಪ್ ಆಗಿ ಎರಡು ಜೋಡಿ
ಫಿನಾಲೆ ವೇದಿಕೆಯಲ್ಲಿ ಕೇವಲ ವಿಜೇತರು ಮಾತ್ರವಲ್ಲದೆ, ಕಠಿಣ ಪೈಪೋಟಿ ನೀಡಿದ ಇತರ ಜೋಡಿಗಳಿಗೂ ದೊಡ್ಡ ಮೊತ್ತದ ಬಹುಮಾನ ಲಭಿಸಿದೆ. ಪೂಜಾ ಮತ್ತು ಅನೂಪ್ ಜೋಡಿಯು ತಮ್ಮ ಅಮೋಘ ನೃತ್ಯದ ಮೂಲಕ ಮೊದಲ ರನ್ನರ್ ಅಪ್ ಸ್ಥಾನವನ್ನು ಅಲಂಕರಿಸಿ 5 ಲಕ್ಷ ರೂಪಾಯಿ ನಗದು ಬಹುಮಾನವನ್ನು ತಮ್ಮದಾಗಿಸಿಕೊಂಡರು. ಇನ್ನು ಹರ್ಷ ಮತ್ತು ನಂದು ಜೋಡಿಯು ಅತ್ಯುತ್ತಮ ಪ್ರದರ್ಶನ ನೀಡಿ ರನ್ನರ್ ಅಪ್ ಆಗಿ ಹೊರಹೊಮ್ಮಿತು ಹಾಗೂ ಇವರಿಗೆ 8 ಲಕ್ಷ ರೂಪಾಯಿ ನಗದು ಬಹುಮಾನ ನೀಡಲಾಯಿತು. ವೇದಿಕೆಯ ಮೇಲಿದ್ದ ಗಣ್ಯರು ಮತ್ತು ತೀರ್ಪುಗಾರರು ಈ ಎಲ್ಲಾ ಜೋಡಿಗಳ ಶ್ರಮವನ್ನು ಮುಕ್ತಕಂಠದಿಂದ ಶ್ಲಾಘಿಸಿದರು.
ಈ ಬಾರಿಯ ಸೀಸನ್ ಅನ್ನು ಹ್ಯಾಟ್ರಿಕ್ ಹೀರೋ ಶಿವರಾಜ್ಕುಮಾರ್, ವಿಜಯ ರಾಘವೇಂದ್ರ ಮತ್ತು ರಚಿತಾ ರಾಮ್ ಅವರು ತೀರ್ಪುಗಾರರಾಗಿ ಮುನ್ನಡೆಸಿದ್ದರು. ವಿಜೇತ ಜೋಡಿಯಾದ ಸಿದ್ದೇಗೌಡ ಮತ್ತು ದೀಶಲ್ ಮಾತನಾಡುತ್ತಾ, ಈ ವೇದಿಕೆಯು ತಮಗೆ ಹೊಸ ಗುರುತು ನೀಡಿದೆ ಮತ್ತು ಪ್ರೇಕ್ಷಕರ ಪ್ರೀತಿಯೇ ಈ ಗೆಲುವಿಗೆ ಮುಖ್ಯ ಕಾರಣ ಎಂದು ಭಾವುಕರಾಗಿ ನುಡಿದರು. ಅದ್ಧೂರಿ ಸೆಟ್ಗಳು, ರಂಗುರಂಗಿನ ಬೆಳಕು ಮತ್ತು ಅದ್ಭುತ ನೃತ್ಯಗಳ ನಡುವೆ ಈ ಬಾರಿಯ ಡ್ಯಾನ್ಸ್ ಕರ್ನಾಟಕ ಡ್ಯಾನ್ಸ್ ಪ್ರೇಕ್ಷಕರಿಗೆ ಭರಪೂರ ಮನರಂಜನೆ ನೀಡಿ ಯಶಸ್ವಿಯಾಗಿ ಮುಕ್ತಾಯಗೊಂಡಿತು.
ವಿಜೇತರಿಗೆ ಸ್ಪೆಷಲ್ ಅಪ್ಪು ಟ್ರೋಫಿ
ಜೀ ಕನ್ನಡದ ಜನಪ್ರಿಯ ನೃತ್ಯ ರಿಯಾಲಿಟಿ ಶೋ 'ಡ್ಯಾನ್ಸ್ ಕರ್ನಾಟಕ ಡ್ಯಾನ್ಸ್' ಈ ಬಾರಿ ಅತ್ಯಂತ ಭಾವನಾತ್ಮಕ ಮತ್ತು ಸ್ಮರಣೀಯ ಕ್ಷಣಗಳಿಗೆ ಸಾಕ್ಷಿಯಾಯಿತು. ಈ ಸೀಸನ್ನ ವಿಜೇತರಾದ ಸಿದ್ದೇಗೌಡ ಮತ್ತು ದೀಶಲ್ ಜೋಡಿಗೆ ಕರ್ನಾಟಕ ರತ್ನ, ದಿವಂಗತ ನಟ ಪುನೀತ್ ರಾಜ್ಕುಮಾರ್ ಅವರ ಸ್ಮರಣಾರ್ಥವಾಗಿ ನೀಡಲಾಗುವ ವಿಶೇಷ 'ಅಪ್ಪು ಟ್ರೋಫಿ'ಯನ್ನು ಹಸ್ತಾಂತರಿಸಲಾಯಿತು.
ಅಪ್ಪು ಹೆಸರಿನ ಟ್ರೋಫಿ ಸ್ವೀಕರಿಸಿದ ಸಿದ್ದೇಗೌಡ ಈ ಕ್ಷಣವನ್ನು ಅತ್ಯಂತ ಭಾವುಕವಾಗಿ ಸ್ಮರಿಸಿದರು. "ಕೊನೆಗೂ ಈ ಟ್ರೋಫಿ ನಮ್ಮ ಕೈಸೇರಿದೆ. ನಿಜ ಹೇಳಬೇಕೆಂದರೆ ಈ ಕಪ್ ನಮಗೆ ಸಿಗುತ್ತದೆ ಎಂದು ನಾವು ಅಂದುಕೊಂಡಿರಲಿಲ್ಲ. ಆದರೆ ಈ ಯಶಸ್ಸಿನ ಹಿಂದೆ ನಮ್ಮ ಕಠಿಣ ಪರಿಶ್ರಮವಿದೆ. ನಮಗೆ ಬೆಂಬಲ ನೀಡಿ, ವೋಟ್ ಮಾಡಿದ ಪ್ರತಿಯೊಬ್ಬರಿಗೂ ನಾವು ಚಿರಋಣಿ" ಎಂದು ಅವರು ಸಂತಸ ಹಂಚಿಕೊಂಡರು.
ಕಾರ್ಯಕ್ರಮದ ಆರಂಭದಿಂದಲೂ ಪ್ರತಿ ಹಂತದಲ್ಲೂ ವೈವಿಧ್ಯಮಯ ನೃತ್ಯಗಳ ಮೂಲಕ ಅಚ್ಚರಿ ಮೂಡಿಸುತ್ತಿದ್ದ ಈ ಜೋಡಿ, ಫಿನಾಲೆಯಲ್ಲೂ ತಮ್ಮ ಶ್ರೇಷ್ಠ ಪ್ರದರ್ಶನ ನೀಡಿತು. ಅಪ್ಪು ಅವರ ಹೆಸರಿನ ಟ್ರೋಫಿಯನ್ನು ಗೆಲ್ಲುವುದು ಪ್ರತಿಯೊಬ್ಬ ಕಲಾವಿದನ ಕನಸಾಗಿದ್ದು, ಆ ಕನಸನ್ನು ಸಿದ್ದೇಗೌಡ ಮತ್ತು ದೀಶಲ್ ನನಸು ಮಾಡಿಕೊಂಡಿದ್ದಾರೆ.
Click it and Unblock the Notifications
Sign in with Google