Bengaluru to Hogenakkal Tour Guide: ಹೊಗೇನಕಲ್ ಫಾಲ್ಸ್‌ಗೆ ಭೇಟಿ ನೀಡಲು ಇದು ಉತ್ತಮ ಸಮಯ; ಮಾರ್ಗಗಳ ವಿವರ ತಿಳಿಯಿರಿ

Bengaluru to Hogenakkal Tour Guide: ತಮಿಳುನಾಡು ಮತ್ತು ಕರ್ನಾಟಕದ ಗಡಿಯಲ್ಲಿರುವ ಅತ್ಯದ್ಭುತ ಪ್ರವಾಸಿ ತಾಣಗಳಲ್ಲಿ ಹೊಗೇನಕಲ್ ಜಲಪಾತ ಕೂಡ ಒಂದಾಗಿದೆ. ಚಳಿಗಾಲದಲ್ಲಿ ಹೆಚ್ಚೆಚ್ಚು ಪ್ರವಾಸಿಗರು ಇಲ್ಲಿಗೆ ಭೇಟಿ ನೀಡಿ ಮನಸ್ಸಿನ ಒತ್ತಡವನ್ನು ಕಡಿಮೆ ಮಾಡಿಕೊಳ್ಳುತ್ತಾರೆ. ಅದರಲ್ಲೂ ಬೆಂಗಳೂರಿನಿಂದ ಒಂದು ದಿನದ ಪ್ರವಾಸಕ್ಕೆ ಹೇಳಿ ಮಾಡಿಸಿದ ತಾಣವಾಗಿದೆ. ಹಾಗಾದರೆ ತಲುಪುವ ಮಾರ್ಗಗಳ ವಿವರವನ್ನು ಇಲ್ಲಿ ತಿಳಿಯಿರಿ.

ದಕ್ಷಿಣ ಭಾರತದ ಅತ್ಯಂತ ಸುಂದರ ಜಲಪಾತಗಳಲ್ಲಿ ಹೊಗೆನಕಲ್‌ ಫಾಲ್ಸ್‌ ಒಂದಾಗಿದ್ದು, ಈ ಸುಂದರ ದೃಶ್ಯವನ್ನು ಸವಿಯಲು ಚಳಿಗಾಲದಲ್ಲಿ ಪ್ರವಾಸಿಗರ ದಂಡೇ ಹರಿದುಬರುತ್ತಿದೆ. ಸಾಮಾನ್ಯವಾಗಿ 'ಭಾರತದ ನಯಾಗರಾ' ಅಂತಲೇ ಕರೆಯಲ್ಪಡುವ ಈ ಜಲಪಾತವು ಪ್ರವಾಸಿಗರನ್ನು ತನ್ನತ್ತ ಕೈಬೀಸಿ ಕರೆಯುತ್ತಲೇ ಇರುತ್ತದೆ.

ಬೆಂಗಳೂರಿಗರಿಗೆ ವಾರಾಂತ್ಯದ ಪ್ರವಾಸ ಕೈಗೊಳ್ಳಲು ಇದು ಉತ್ತಮ ತಾಣವಾಗಿದೆ. ಇಲ್ಲಿಗೆ ಒಮ್ಮೆ ಭೇಟಿ ನೀಡಿದರೆ, ಮತ್ತೆ ಮತ್ತೆ ಹೋಗಬೇಕೆನಿಸುತ್ತದೆ. ಅಷ್ಟರ ಮಟ್ಟಿಗೆ ಹೊಗೇನಕಲ್ ಪ್ರವಾಸವು ಮನಸಿಗೆ ಮರೆಯಲಾಗದ ಮುದವನ್ನು ನೀಡುತ್ತದೆ.

ಬೆಂಗಳೂರಿನಿಂದ ಎಷ್ಟು ದೂರ?: ಬೆಂಗಳೂರಿನಿಂದ ಸುಮಾರು 126 ಕಿಲೋ ಮೀಟರ್ ದೂರದಲ್ಲಿರುವ ಹೊಗೇನಕಲ್ ಜಲಪಾತವು ದೊಡ್ಡ ಕಲ್ಲು ಬಂಡೆಗಳ ಪ್ರದೇಶದಲ್ಲಿದೆ. ಇಲ್ಲಿ ಹರಿಯುವ ನೀರಿನ ಅದ್ಭುತವನ್ನು ಸವಿಯಲು ಪ್ರತಿವಾರವೂ ಕೂಡ ಸಾವಿರಾರು ಮಂದಿ ಪ್ರವಾಸಿಗರ ದಂಡೇ ಹರಿದುಬರುತ್ತದೆ. ಇನ್ನೂ ಈ ವೇಳೆಯಂತೂ ಮಂಜಿನ ದೃಶ್ಯದ ನಡುವೆ ಇಲ್ಲಿನ ಪ್ರಕೃತಿ ಸೊಬಗು ಮನಸಿಗೆ ಇಂಪು ನೀಡುವುದರಲ್ಲಿ ಯಾವುದೇ ಅನುಮಾನವಿಲ್ಲ.

ಕಾವೇರಿ ಕೊಳ್ಳದಲ್ಲಿ ಹೆಚ್ಚು ಮಳೆ ಸುರಿದ ಹಿನ್ನೆಲೆ ಮತ್ತು ನದಿಯ ಹೊರಹರಿವು ಹೆಚ್ಚಾಗಿರುವುದರಿಂದ ಹೊಗೆನಕಲ್ ಜಲಪಾತಕ್ಕೆ ಅಪಾರ ಪ್ರಮಾಣದ ನೀರು ಹರಿದು ಬಂದಿದ್ದು, ಕಲ್ಲು-ಬಂಡೆಗಳ ನಡುವೆ ಜಲ ವೈಯ್ಯಾರ ಸೃಷ್ಟಿಯಾಗಿದೆ. ಈ ದೃಶ್ಯ ಈಗಲೂ ಇದ್ದು, ಕುಟುಂಬ ಸಮೇತ ಪ್ರವಾಸ, ಪ್ರೇಯಸಿ ಜೊತೆ ಪ್ರವಾಸ ಅಥವಾ ಏಕಾಂಕಿ ಪ್ರವಾಸವನ್ನು ಕೈಕೊಳ್ಳಲು ಉತ್ತಮ ಸಮಯವಾಗಿದೆ.

ಈ ಭಾರೀ ಮಳೆಯಾದ ಕಾರಣ ಕಾವೇರಿ ನದಿಯ ಹೊರಹರಿವು ಹೆಚ್ಚಾಗಿರುವುದರಿಂದ ಫಾಲ್ಸ್‌ಗೆ ಹೆಚ್ಚಿನ ಪ್ರಮಾಣದಲ್ಲಿ ನೀರು ಹರಿದುಬಂದಿದ್ದು, ಕಲ್ಲು-ಬಂಡೆಗಳ ನಡುವೆ ಜಲ ವೈಯ್ಯಾರ ಸೃಷ್ಟಿಸಿತ್ತು. ಈಗಲೂ ಕೂಡ ಈ ಸುಂದರ ದೃಶ್ಯವನ್ನು ಕಾಣಬಹುದಾಗಿದೆ.

ಜಲಪಾತವು ಅನೇಕ ತೊರೆಗಳನ್ನು ಒಳಗೊಂಡಿದೆ. ಅಲ್ಲದೆ, ಸುತ್ತಮುತ್ತಲಿನ ಭೂದೃಶ್ಯವು ಹಚ್ಚ ಹಸಿರು ಮತ್ತು ಕಲ್ಲಿನ ರಚನೆಗಳಿಂದ ಕೂಡಿದ್ದು, ಛಾಯಾಗ್ರಹಣ ಮತ್ತು ದೋಣಿ ವಿಹಾರಕ್ಕೆ ಸೂಕ್ತವಾಗಿದೆ. ಈ ಪ್ರದೇಶವು ಸಾಂಸ್ಕೃತಿಕ ಪ್ರಾಮುಖ್ಯತೆಯಿಂದ ಕೂಡಿದೆ. ಯಾಕೆಂದರೆ, ಇದನ್ನು ಹಲವಾರು ಐತಿಹಾಸಿಕ ಗ್ರಂಥಗಳಲ್ಲಿ ಉಲ್ಲೇಖಿಸಲಾಗಿದೆ. ಕೆಲವು ಸ್ಥಳೀಯ ಸಮುದಾಯಗಳು ನದಿ ನೀರನ್ನು ಔಷಧೀಯ ಉದ್ದೇಶಗಳಿಗಾಗಿ ಬಳಸುತ್ತಾರೆ ಎನ್ನುವ ಮಾತಿದೆ.

ಬೆಂಗಳೂರಿನಿಂದ ಪ್ರವಾಸ ಬೆಳೆಸುವುದೇಗೆ?: ಬೆಂಗಳೂರಿನಿಂದ ಹೊಗೇನಕಲ್‌ಗೆ ಪ್ರವಾಸ ಬೆಳೆಸುವ ಸುಲಭ ಮಾರ್ಗಗಳ ವಿವರವನ್ನು ಇಲ್ಲಿ ನೀಡಲಾಗಿದೆ. ಹಾಗಾದರೆ ಯಾವ್ಯಾವ ವಾಹಗಳಲ್ಲಿ ಹೇಗೆ ತಲುಪಬಹುದು ಹಾಗೂ ಎಷ್ಟು ಸಮಯ ಬೇಕಾಗುತ್ತದೆ ಎನ್ನುವ ಮಾಹಿತಿಯನ್ನು ಇಲ್ಲಿ ನೀಡಲಾಗಿದೆ ತಿಳಿಯಿರಿ.

* ಕಾರಿನಲ್ಲಿ ಪ್ರಯಾಣ: ಬೆಂಗಳೂರಿನಿಂದ ಹೊಗೇನಕಲ್ ತಲುಪಲು ಅತ್ಯಂತ ಅನುಕೂಲಕರ ಮತ್ತು ಆರಾಮದಾಯಕ ಮಾರ್ಗವೆಂದರೆ ರಸ್ತೆ ಆಗಿದೆ. ಟ್ರಾಫಿಕ್ ಜಾಮ್‌ ಇದ್ದರೆ, ಪ್ರಯಾಣ ಸಮಯ ಸುಮಾರು 3.5-4 ಗಂಟೆ ಆಗುತ್ತದೆ. ಬೆಂಗಳೂರಿನಿಂದ ಚೆನ್ನೈಗೆ ಸಂಪರ್ಕಿಸುವ ರಾಷ್ಟ್ರೀಯ ಹೆದ್ದಾರಿ 44 ಮೂಲಕ ಪ್ರಯಾಣ ಬೆಳೆಸಬಹುದಾಗಿದೆ. ಪ್ರಯಾಣದ ಮಾರ್ಗದುದ್ದಕ್ಕೂ ಸಣ್ಣ ನಗರಗಳು ​​ಮತ್ತು ಹಳ್ಳಿಗಳ ಮೂಲಕ ಹಾದು ಹೋಗುತ್ತೀರಿ. ಕರ್ನಾಟಕ ಮತ್ತು ತಮಿಳುನಾಡಿನ ಗ್ರಾಮೀಣ ಜನರ ಜೀವನ ಹೇಗಿರಲಿದೆ ಅಂತಲೂ ತಿಳಿದುಕೊಳ್ಳಬಹುದಾಗಿದೆ.

* ಬಸ್‌ನಲ್ಲಿ ಪ್ರಯಾಣ: ಬೆಂಗಳೂರಿನಿಂದ ಹೊಗೇನಕಲ್‌ಗೆ ಬಸ್‌ಗಳು ಕೂಡ ಲಭ್ಯವಿವೆ. ಸಾರಿಗೆ ಹಾಗೂ ಖಾಸಗಿ ಬಸ್‌ಗಳ ವ್ಯವಸ್ಥೆ ಕೂಡ ಇವೆ. ಇನ್ನು ಬಸ್‌ನಲ್ಲಿ ಪ್ರಯಾಣ ಮಾಡಿದರೆ, ಪ್ರಯಾಣದ ಸಮಯವು ಸಾಮಾನ್ಯವಾಗಿ ಸುಮಾರು 5 ಗಂಟೆ ಆಗಲಿದೆ.

* ರೈಲಿನ ಪ್ರಯಾಣ: ಹೊಗೇನಕಲ್‌ಗೆ ನೇರ ರೈಲು ಸೇವೆ ಇಲ್ಲದಿದ್ದರೂ, ನೀವು ಬೆಂಗಳೂರಿನಿಂದ ಧರ್ಮಪುರಿಗೆ ರೈಲಿನಲ್ಲಿ ಹೋಗಬಹುದಾಗಿದೆ. ಇದು ಹತ್ತಿರದ ರೈಲು ನಿಲ್ದಾಣವಾಗಿದೆ. ಧರ್ಮಪುರಿಯಿಂದ ನೀವು ಸುಮಾರು 46 ಕಿಲೋ ಮೀಟರ್ ದೂರದಲ್ಲಿರುವ ಹೊಗೇನಕಲ್ ತಲುಪಲು ಕ್ಯಾಬ್ ಅಥವಾ ಬಸ್‌ನಲ್ಲಿ ಹೋಗಬಹುದಾಗಿದೆ.

ಒಮ್ಮೆ ನೀವು ಹೊಗೇನಕಲ್‌ಗೆ ಬಂದರೆ, ಹಲವಾರು ಚಟುವಟಿಕೆಗಳಲ್ಲಿ ಪಾಲ್ಗೊಳ್ಳಬಹುದು. ಇಲ್ಲಿನ ಪ್ರಕೃತಿ ಸೌಂದರ್ಯ ಮತ್ತು ಪ್ರಶಾಂತ ವಾತಾವರಣವು ಮನಸಿನ ಒತ್ತಡ ಕಡಿಮೆ ಮಾಡಲಿದೆ. ಇನ್ನು ಕಾವೇರಿ ನದಿಯಲ್ಲಿ ದೋಣಿ ವಿಹಾರದ ಅನುಭವವಿಲ್ಲದೆ ಹೊಗೇನಕಲ್ ಭೇಟಿ ಪೂರ್ಣಗೊಳ್ಳುವುದಿಲ್ಲ. ಆದ್ದರಿಂದ ಸ್ಥಳೀಯ ಮೀನುಗಾರರು ನಿರ್ವಹಿಸಲ್ಪಡುವ ದೋಣಿಗಳಲ್ಲಿ ವಿಹಾರ ಮಾಡಬಹುದಾಗಿದೆ.

* ಟ್ರೆಕ್ಕಿಂಗ್‌ಗೆ ಆಯ್ಕೆ: ಹೊಗೇನಕಲ್‌ನ ಭೂಪ್ರದೇಶವು ಚಾರಣಿಗರಿಗೆ ಸೂಕ್ತವಾಗಿದೆ. ಯಾವುದೇ ಟ್ರೆಕ್ಕಿಂಗ್ ಮಾರ್ಗಗಳು ಇಲ್ಲದಿದ್ದರೂ, ಪ್ರವಾಸಿಗರು ನದಿ ಮತ್ತು ಸುತ್ತಮುತ್ತಲಿನ ಬೆಟ್ಟಗಳ ಉದ್ದಕ್ಕೂ ನಡೆಯುವ ಮೂಲಕ ಇಲ್ಲಿನ ಪ್ರಕೃತಿ ಸೌಂದರ್ಯವನ್ನು ಸವಿಯಬಹುದಾಗಿದೆ. ಅಲ್ಲದೆ, ಇಲ್ಲಿ ಹಲವಾರು ಜಾತಿಯ ಪಕ್ಷಿ ಮತ್ತು ಪ್ರಾಣಿಗಳನ್ನು ಕೂಡ ಕಾಣಬಗುದಾಗಿದೆ.

ಹೊಗೇನಕಲ್‌ನಲ್ಲಿ ಬಿಸಿನೀರಿನ ಬುಗ್ಗೆಗಳನ್ನು ಕಾಣಬಹುದಾಗಿದ್ದು, ಇದು ಔಷಧಿ ಗುಣಗಳನ್ನು ಹೊಂದಿದೆ ಎಂದು ನಂಬಲಾಗಿದೆ. ಬೆಚ್ಚಗಿನ ನೀರಿನಲ್ಲಿ ಸ್ನಾನ ಮಾಡಿದರೆ, ಸ್ನಾಯು ನೋವುಗಳನ್ನು ನಿವಾರಿಸುತ್ತದೆ ಮತ್ತು ದೇಹವನ್ನು ಆರೋಗ್ಯವಾಗಿಡಲಿದೆ ಎಂದು ಹೇಳಲಾಗುತ್ತದೆ. ಆದ್ದರಿಂದ ಪ್ರವಾಸಿಗರು ಇಲ್ಲಿನ ನೀರಿನಲ್ಲಿ ಮಿಂದೆದ್ದೇ ಹೋಗುತ್ತಾರೆ.

ಹೊಗೇನಕಲ್ ಸುತ್ತಮುತ್ತಲಿನ ಪ್ರದೇಶದಲ್ಲಿ ತಮಿಳುನಾಡಿನ ಗ್ರಾಮೀಣ ಜೀವನದ ದೃಶ್ಯವನ್ನು ಕಾಣಬಹುದಾಗಿದೆ. ನೀವು ಇಲ್ಲಿನ ಸ್ಥಳೀಯರೊಂದಿಗೆ ಸಂವಹನ ನಡೆಸಬಹುದು, ಕೈಯಿಂದ ಮಾಡಿದ ಕರಕುಶಲ ವಸ್ತುಗಳನ್ನು ಖರೀದಿಸಬಹುದು ಮತ್ತು ಪ್ರಾದೇಶಿಕ ಪಾಕ ಪದ್ಧತಿಯನ್ನು ಆನಂದಿಸಬಹುದು. ವಿಶೇಷವಾಗಿ ಇಲ್ಲಿನ ಸ್ಥಳೀಯ ಮೀನು ಊಟವನ್ನು ಸವಿಯಬಹುದಾಗಿದೆ.

ಪ್ರವಾಸಿಗರ ಗಮನಿಸಬೇಕಾದ ಪ್ರಮುಖಾಂಶಗಳು

* ಜಲಪಾತದ ಸುತ್ತಲಿನ ಪ್ರದೇಶದಲ್ಲಿ ಹೆಚ್ಚು ಜಾರಿಕೆ ಇರಲಿದೆ. ಆದ್ದರಿಂದ ಪ್ರವಾಸಿಗರು ಮುಂಜಾಗ್ರತೆಯಿಂದ ಉತ್ತಮ ಶೂಗಳನ್ನು ಧರಿಸುವುದು ಸೂಕ್ತವಾಗಿದೆ.

* ಅದರಲ್ಲೂ ನೀವು ಟ್ರೆಕ್ಕಿಂಗ್ ಮಾಡಲು ಬಯಸಿದರೆ ಈ ಶೂಗಳು ತುಂಬಾ ಸಹಾಯಕವಾಗಲಿವೆ.

* ಬೋಟಿಂಗ್ ಮಾಡುವಾಗ ಯಾವಾಗಲೂ ಸುರಕ್ಷತಾ ಮಾರ್ಗಸೂಚಿಗಳನ್ನು ಅನುಸರಿಸಿ ಮತ್ತು ಜಲಪಾತದ ಹತ್ತಿರ ಹೋಗಬೇಡಿ.

English summary

Bengaluru to Hogenakkal Falls travel Guide: Know Route, Timings, vehicles and major Places details,