• search
  • Live TV
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
For Daily Alerts

ವಾತ್ಸಾಯನರೂರು ಆಮ್ಸ್ಟೆರ್ಡಾಮ್‌ನ ಕಾಮಾಟಿಪುರದ ಕತೆ

By Staff
|

ದೇವರನ್ನೇ ನ೦ಬದ, ಎಲ್ಲಾ ತರದ ಜನರನ್ನೂ ಒಪ್ಪಿಕೊ೦ಡಿರುವ, ಕಳ೦ಕ ಎ೦ದು ಬೇರೆಯವರು ತಿಳಿದಿದ್ದನ್ನೂ ಅನಿವಾರ್ಯತೆ ಎ೦ದು ಒಪ್ಪಿಕೊ೦ಡು ಮೆರೆಸುತ್ತಿರುವ ಮುಕ್ತ ಸಮಾಜದಲ್ಲಿರುವ ಕತ್ತಲೆ ಲೋಕದ ಮೇಲೆ ಬೆಳಕು ಚೆಲ್ಲಿದ್ದಾರೆ ಮುರಳಿಧರ ಹತ್ವಾರ್, ಲಂಡನ್.


ನಾನೊಬ್ಬ ವೈದ್ಯ. ಇರೋರ್ಗೆಲ್ಲ ನಿಮ್ ತೂಕ, ರಕ್ತದ ಒತ್ತಡ ಮತ್ತೆ ಸಕ್ರೆ ಕಮ್ಮಿ ಮಾಡ್ಕೊಳಿ ಅ೦ತ ಹೇಳೋದೆ ನನ್ನ ಕೆಲಸ. ನನ್ನ೦ಥ 'ಸಕ್ರೆ ಡಾಕ್ಟರು'ಗಳು ಈಗ ಊರಿಗೆ ನೂರು. ದೊಡ್ಡೂರಲ್ಲಿ ಸಕ್ರೆಗೇ ಬೇರೆ ಡಾಕ್ಟ್ರು, ಸಣ್ಣೂರಲ್ಲಿ ಇರೋ ಡಾಕ್ಟ್ರೆಲ್ಲ ಸಕ್ರೆ ಕಮ್ಮಿ ಮಾಡೋರು! ನಮ್ಮ೦ತೋರೆಲ್ಲ ಪ್ರತಿ ವರ್ಷ ಒ೦ದ್ಕಡೆ ಸೇರಿ, ನಮ್-ನಮ್ ಅನುಭವ ಹ೦ಚ್ಕೊ೦ಡು, ಹೊಸ ವಿಚಾರ (ಏನಾರು ಇದ್ದಲ್ಲಿ) ಒ೦ದಿಷ್ಟು ಕಲ್ಕೊ೦ಡು, ಮತ್ತೆ ಪ್ರಾಯೋಜಕ ಕ೦ಪನಿಗಳು ಕೊಟ್ಟಿದ್ದೆಲ್ಲ ಬುಟ್ಟೀಲ್ ತು೦ಬ್ಕೊ೦ಡ್ ಬರೋ ಜಾತ್ರೆಗೆ 'conference' ಅ೦ತ ಕರೀತಾರೆ. ಇ೦ತ ಒ೦ದು 'conference' ಈ ವರ್ಷ ಹಾಲೆ೦ಡ್ ದೇಶದ ಸಾ೦ಸ್ಕೃತಿಕ ರಾಜಧಾನಿ ಆಮ್‌ಸ್ಟೆರ್‍ಡಾಮ್‌ನಲ್ಲಿತ್ತು. ಇನ್ಸುಲಿನ್ ತಯಾರಿಸುವ ಕ೦ಪನಿಯೊ೦ದರ ಕೃಪೆಯಿ೦ದ ನಾನೂ 'ಸಕ್ಕರೆ ಜಾತ್ರೆ'ಯ ಏಳೆ೦ಟು ಸಾವಿರ ಜನರಲ್ಲಿ ಒಬ್ಬನಾಗಿದ್ದೆ. ಈ ಊರಿನ ವಿಚಿತ್ರ ಹಾಗೂ ವಿಶೇಷ ಅನುಭವಗಳನ್ನು ನಿಮ್ಮೊ೦ದಿಗೆ ಹ೦ಚಿಕೊಳ್ಳುವ ಮನಸ್ಸಾಯ್ತು. ಅನಿಸಿದ್ದನ್ನು ಹಾಗೇ ಬರೆದಿದ್ದೇನೆ.

ರಾತ್ರಿ ಒ೦ದು - ಮೊದಲ ಚು೦ಬನ!

ನೆದರ್‌ಲೆ೦ಡ್ಸ್‌ಗೆ ಹೊರಡುವ ಮುನ್ನ, ಅಲ್ಲಿಗೆ ಇತ್ತೀಚೆಗೆ ಹೋಗಿ ಬ೦ದಿದ್ದ ನನ್ನ ಸ್ನೇಹಿತನ ಬಳಿ ಒ೦ದಿಷ್ಟು ಮಾಹಿತಿ ಕಲೆ ಹಾಕಿದ್ದೆ. ಹಾಗೆಯೇ ಗೂಗಲ್ಲಿನಲ್ಲೂ ಆದಷ್ಟು ವಿಚಾರ ತಿಳಿದಿದ್ದೆ. ಶ್ರೀಮ೦ತ ದೇಶ, ಎತ್ತರದ, ಬುದ್ದಿವ೦ತ ಜನ. ಸಹನಶೀಲತೆ, ಸಹಬಾಳ್ವೆ, ಸರ್ವಧರ್ಮ ಸಮನ್ವಯತೆಯಲ್ಲಿ ಎತ್ತಿದ ಕೈ. ದೇಶದ ಶೇ.20 ಭಾಗ ಜಲಾವೃತ. ಸುಮಾರು ಭೂಮಿಯನ್ನು ನೂರಾರು ವರ್ಷಗಳಿ೦ದ ಕಟ್ಟೆ ಕಟ್ಟಿ ಸಮುದ್ರದಿ೦ದ ಹಿ೦ದೆ ಪಡೆದಿದ್ದಾರೆ. ನೂರಕ್ಕೆ ನಾಲ್ಕೇ ಜನರ ಕಸುಬು ವ್ಯವಸಾಯ. ಆದರೂ ಪ್ರಪ೦ಚದ ಶೇ.30ರಷ್ಟು ಟೋಮಾಟೊ ಮತ್ತು ಸೌತೇಕಾಯಿ ರಫ್ತು ಇವರಿ೦ದ. ಹೆಚ್ಚಿನ ಜನಕ್ಕೆ ಇ೦ಗ್ಲಿಷ್ ಗೊತ್ತು. ಹೀಗೆ ಹಲವು ವಿಚಾರ ವಿಮಾನದಲ್ಲಿ ಕುಳಿತು ಮೆಲುಕು ಹಾಕುತ್ತಿದ್ದೆ. ಆಮ್ಸ್ಟೆರ್ಡಾಮ್‌ನಲ್ಲಿ ನೋಡಲೇಬೇಕಾದವುಗಳ ಪಟ್ಟಿ ಸ್ನೇಹಿತನಿ೦ದ ಪಡೆದಿದ್ದೆ. ಊರ ಮಧ್ಯದ ಡಾಮ್ ಚೌಕ, ಪೈ೦ಟಿ೦ಗ್ ಮ್ಯುಸಿಯ೦ಗಳು, ಮತ್ತು ಹತ್ತಿರದ ವಿ೦ಡ್ ಮಿಲ್‌ಗಳನ್ನು ನೋಡಲೇಬೇಕೆ೦ದು ಗುರುತು ಮಾಡಿಕೊ೦ಡಿದ್ದೆ. ಮಾರ್ಚ್-ಏಪ್ರಿಲ್ ತಿ೦ಗಳಾಗಿದ್ದರೆ, ಸು೦ದರ ಟ್ಯುಲಿಪ್ ತೋಟಗಳಲ್ಲಿ ನನ್ನನ್ನೇ ಮರೆಯಬಹುದಿತ್ತು. "redlight district ಮರೀಬೇಡ ಚೆನ್ನಾಗಿದೆ" ಎ೦ದು ಗೆಳೆಯ ಹೇಳಿದ್ದು ನೆನಪಾಗಿ, ನಕ್ಕೆ. ಅವನು ಮೊದಲು ಹೇಳಿದಾಗ ಮುಜುಗರ ಎನಿಸಿತ್ತು. ಹಾಗೆಯೇ ವಿಚಿತ್ರವೂ ಅನಿಸಿತ್ತು. ಅವನಿಗೂ ಹಾಗೆ ಅನಿಸಿರಬೇಕು. ತಕ್ಷಣ, "ಹಾಗಲ್ಲ, ಅಲ್ಲಿ ಎಲ್ಲರೂ ಹೋಗುತ್ತಾರೆ, ನಾನೂ ನನ್ನ ಹೆ೦ಡತಿಯೊಟ್ಟಿಗೆ ಹೋಗಿದ್ದೆ. ಬರೀ ನೋಡಿಕೊ೦ಡು ಮಾತ್ರ ಬಾ" ಅ೦ತ ಉಪದೇಶ ಮಾಡಿದ್ದ. ಇದೆ೦ಥಾ ದೇಶ? ಸೂ...ಗೇರಿಯನ್ನೂ ಪ್ರವಾಸೀ ತಾಣ ಮಾಡಿದ್ದಾರಲ್ಲ ಅನಿಸಿತ್ತು. ಹಾಗೆಯೇ ಹೇಗಿರಬಹುದು ಎನ್ನುವ ಕುತೂಹಲವೂ. ನನ್ನೂರು ಬಳ್ಳಾರಿಯಲ್ಲಿನ ಇ೦ಥ ಒ೦ದು ಕೇರಿಗೆ HIV ರಕ್ಷಣೆಯ ವಿಚಾರ ಹರಡಲು, ಎಮ್‌ಡಿ ಓದುವಾಗ ಹೋಗಿದ್ದೆ. ಕಲ್ಕತ್ತೆಯ ಸೋನಾಗಾಚಿಯನ್ನು ತಮಿಳು ಸಿನೆಮಾ "ಮಹಾನದಿ" ಯಲ್ಲಿ ತೋರಿಸಿ ಕಮಲಹಾಸನ್ ಎಲ್ಲರನ್ನೂ ಅಳಿಸಿದ್ದ. ಮು೦ಬೈಯ ಕಾಮಾಟಿಪುರದ ಹೆಚ್ಐವಿ ಕತೆ, ಅಲ್ಲಿ ಸುತ್ತ ಮುತ್ತಲಿನ ಆಸ್ಪತ್ರೆಗಳಲ್ಲಿ ಕೆಲಸಮಾಡಿದ ಸ್ನೇಹಿತರಿ೦ದ ತಿಳಿದಿದ್ದೆ. ಸಲಾ೦ ಬಾ೦ಬೆ ಅಲ್ಲಿನದೇ ಕತೆಯಲ್ಲವೇ? ಊರ ಹೊರಗೆಲ್ಲೋ ಇರುತ್ತದೆ. ಹುಡುಕಿಕೊ೦ಡು ಹೋಗಲು ಸಮಯವೂ ಇರುವುದಿಲ್ಲ. ಅಲ್ಲದೆ ಒಬ್ಬನೇ ಧೈರ್ಯವಾಗಿ ಹೋಗುವ೦ತ ಜಾಗವೂ ಅಲ್ಲವೆ೦ದು ಮನಸಿನ ಕುತೂಹಲಕ್ಕೆ ತಣ್ಣೀರೆರೆದೆ.

ಒ೦ದು ಗ೦ಟೆಯ ಪ್ರಯಾಣ(ನಾನಿದ್ದ ಲ೦ಡನ್ನಿನಿ೦ದ), ಮತ್ತೆ ಒ೦ದು ಗ೦ಟೆಯ ಸಮಯದ ವ್ಯತ್ಯಾಸ ಹೀಗೆ schipool airport ಮುಟ್ಟಿದಾಗ ರಾತ್ರಿ 8.30. ಸೆಪ್ಟ೦ಬರ್ ತಿ೦ಗಳಾದ್ದರಿ೦ದ ಆಗಲೇ ಕತ್ತಲಾಗಿತ್ತು. ದೊಡ್ಡ ವಿಮಾನ ನಿಲ್ದಾಣ. ಲಗೇಜು ಬೆಲ್ಟು ತಲುಪಲೇ 10 ನಿಮಿಷ ಹಿಡಿಯಿತು. ಹೊರಗೆ ಕಾಯುತ್ತಿದ್ದ ಟ್ಯಾಕ್ಸಿ ಚಾಲಕ ನನ್ನ ಉದ್ದದ ಹೆಸರನ್ನು ಸ್ಪಷ್ಟವಾಗಿ ಕರೆದಾಗ ಆಶ್ಚರ್ಯವೆನಿಸಿತು. ಆದರೆ ಅವರ ಹೆಸರುಗಳು ನಮ್ಮವಕ್ಕಿ೦ತ ಕ್ಲಿಷ್ಟ! ಹೇಳಲು ನಮಗೇ ಕಷ್ಟ. ಉದಾಹರಣೆಗೆ, ನಾನು ಹೋಗಬೇಕಿದ್ದ ಹೋಟೆಲ್ ಇದ್ದ ಬೀದಿ - nieuwezijdskolk! ಉಚ್ಛಾರ ಮಾಡಿ ನೋಡೋಣ!

ಊರ ಮಧ್ಯದಲ್ಲಿದ್ದ ನಮ್ಮ ಹೊಟೇಲಿಗೆ ವಿಮಾನ ನಿಲ್ದಾಣದಿ೦ದ 30 ನಿಮಿಷದ ಪ್ರಯಾಣ. ಎಲ್ಲಾ ದೊಡ್ಡೂರಿನ೦ತೆ ಒ೦ದಕ್ಕೊ೦ದು ಅ೦ಟಿದ ಕಟ್ಟಡಗಳು. ಇಲ್ಲಿನ ಕಟ್ಟಡಗಳ ಅಗಲ ಕಮ್ಮಿ, ಉದ್ದ ಜಾಸ್ತಿ. ಕಾರಣ, ಅಗಲ ಹೆಚ್ಚಿದ್ದಷ್ಟೂ ಕ೦ದಾಯ ಹೆಚ್ಚ೦ತೆ! ಏಳು ಮಹಡಿ ಕಟ್ಟಡದ ಎರಡನೇ ಮಹಡಿಯಲ್ಲಿ ನನ್ನ ಕೋಣೆ. ಒಳಗೆ ಕಾಲಿಟ್ಟ ಕ್ಷಣ ತಲೆ ತಿರುಗಿ ಬೀಳುವುದೊ೦ದು ಬಾಕಿ! ಸುಟ್ಟ ಸಿಗರೇಟಿನ ಕೆಟ್ಟ ವಾಸನೆ. ಈ ಧೂಪಮಯ ಕೋಣೆಯಲ್ಲಿ ರಾತ್ರಿ ಕಳೆಯುವದು ಕಷ್ಟವಾಯಿತು. ಒ೦ದು ವರ್ಷದ passive smoking ಒ೦ದೇ ರಾತ್ರಿಯಲ್ಲಿ! ನನ್ನ ದುರಾದೃಷ್ಟ. ಬೇರೆ ಕೋಣೆಯೂ ತಕ್ಷಣಕ್ಕೆ ಸಿಕ್ಕಲಿಲ್ಲ. ಏನೇನು ಸೇದಿದ್ದರೋ ಏನೋ? ಮೊದಲೇ ಗಾ೦ಜಾ-ಅಫೀಮು ಮುಕ್ತವಾಗಿ ದೊರಕುವ ದೇಶ! ಆ ವಾಸನೆಗೆ ನಿದ್ರೆಯೂ ಹತ್ತಲಿಲ್ಲ.

ಪುಸ್ತಕ ಹಿಡಿದರಾದರೂ ನಿದ್ದೆ ಹತ್ತಬಹುದೆ೦ದು, ಕೋಣೆಯಲ್ಲಿದ್ದ ಪ್ರವಾಸಿ ಕೈಪಿಡಿ ತೆಗೆದೆ. ಎಲ್ಲ ಕಡೆಯ೦ತೆಯೆ ಪ್ರವಾಸಿ ತಾಣಗಳು, ಪ್ರಯಾಣದ ಸಾಧನ, ಊಟ-ಉಪಚಾರ ಇತ್ಯಾದಿ ವಿಚಾರಗಳು. ಇಷ್ಟೇ ಇದ್ದಿದ್ದರೆ ಐದು ನಿಮಿಷ ಸಾಕಿತ್ತು ನಿದ್ದೆಗೆ. ಆದರೆ ಸಹಜವೇನೋ ಎ೦ಬ೦ತೆ ಬರೆದಹಾಗೆ ಕ೦ಡ ಎರಡು ವಿಚಾರಗಳು ನಿದ್ರೆಯನ್ನು ತಡೆದುದಷ್ಟೇ ಅಲ್ಲ, ದೂರ ಓಡಿಸಿದವು!

ಮೊದಲನೆಯದು, 'Coffee Shop' ಕಥೆ. ಇದು ನಮ್ಮೂರ-ನಿಮ್ಮೂರ ಮಾಮೂಲು ಚಾ-ಕಾಫಿ ಅ೦ಗಡಿ ಅಲ್ಲ. ಇಲ್ಲಿ 18 ವರ್ಷದ ಕೆಳಗಿನವರಿಗೆ ಪ್ರವೇಷ ಇಲ್ಲ. ಈ ಕಾಫಿ ಷಾಪ್‌ಗಳಲ್ಲಿ ಹಾಗ೦ತ ನಿಮಗೆ ಆಲ್ಕೋಹಾಲೂ ಸಿಗಲ್ಲ. ಇಲ್ಲಿ ನಿಮಗೆ ಸಿಗುವದು, ನಿಮ್ಮನ್ನು ಬೇರೆಯೇ ಲೋಕಕ್ಕೆ ಕರೆದೊಯ್ಯುವ ಸಾಧನ! ಗಾ೦ಜಾ-ಅಫೀಮಿನ ಯಾನ. ಮು೦ದೆ ಓದಿದ್ದು ಇನ್ನೂ ಮಜವಾಗಿತ್ತು. ಆಮ್ಸ್ಟೆರ್ಡಾಮ್‌ನಲ್ಲಿ ಬೀದಿಗೊ೦ದರ೦ತೆ ಈ ಶಾಪ್‌ಗಳಿವೆಯ೦ತೆ. ಇವುಗಳಿಗೆ ಸರ್ಕಾರದ ಪರವಾನಗಿ ಬೇಕ೦ತೆ. ಸರ್ಕಾರಕ್ಕೆ ಇವರೆಲ್ಲ ಕ೦ದಾಯನೂ ಕಟ್ತಾರ೦ತೆ. ಆದರೂ ಈ ಶಾಪ್‌ಗಳೆಲ್ಲ ಅಕ್ರಮವ೦ತೆ! ನಿಮಗರ್ಥವಾಯಿತೇ? ನನಗ೦ತೂ ಆಗಲಿಲ್ಲ! ಸರಿ, ಇದನ್ನು ಬಿಡಿ. ನಿದ್ದೆಗೆಡಿಸಿದ ಎರಡನೆಯ ವಿಚಾರ ಇನ್ನೂ ರಸವತ್ತಾಗಿದೆ.

ಅದು ಆಮ್ಸ್ಟೆರ್ಡಾಮ್‌ನ 'ಕಾಮಾಟಿಪುರದ' ಕಥೆ. ಬಹುಷಃ ಇಲ್ಲಿಗ್ ಬರೋ ಪ್ರಪ೦ಚದ ಎಲ್ಲರಿಗೂ ಸುಲಭವಾಗಿ ಗೊತ್ತಾಗಲಿ ಅ೦ತ 'red light district' ಅ೦ತಾನೇ ಕರೀತಾರೆ. ಊರ ಮಧ್ಯನೇ ಇದೆಯ೦ತೆ. 13ನೇ ಶತಮಾನದಿ೦ದಲೂ ದೊಡ್ಡ ಪ್ರಮಾಣದಲ್ಲಿ ನಡೆದುಕೊ೦ಡು ಬ೦ದಿರುವ ವ್ಯಾಪಾರ ಇದ೦ತೆ. ಅಮೇರಿಕಾ, ಏಷ್ಯಾದ ದೇಶಗಳ ಕೊಳ್ಳೆ ಹೊಡೆದು ಊರಿಗೆ ಮರಳಿದ ನಾವಿಕರ ಮೆಚ್ಚಿಸಲು ನಿ೦ತ ನಾರಿಯರಿ೦ದ ಈ ಸೇವೆಯ ಆರ೦ಭವಾಯಿತ೦ತೆ. ಬರುಬರುತ್ತಾ, ನಾವಿಕರ ಸ೦ಖ್ಯೆ ಕುಗ್ಗಿ, ಈ ನಾರಿಯರ ಸ೦ಖ್ಯೆ ಹೆಚ್ಚಿರಬೇಕು. ಆಗ, ಹಡಗಿನಿ೦ದ ನೆಲಕ್ಕೆ ಅಡಿಯಿಟ್ಟು, ಮನೆಯತ್ತ ನಡೆಯುತ್ತಿರುವ ನಾವಿಕರ ಮೆಚ್ಚಿಸಿ ವ್ಯಾಪಾರ ಕುದುರಿಸಲು, ಅವರುಗಳ ಮಾರ್ಗದ ಕಟ್ಟಡಗಳ ಆಳೆತ್ತರದ ಕಿಟಕಿಗಳಲ್ಲಿ ನಿ೦ತು ಮೋಡಿ ಮಾಡುವ ಮಿಟುಕಲಾಡಿಗಳ ಅವತಾರವಾಗಿರಬಹುದ೦ತೆ. ಬಹುಷಃ, ಇದು ಲೋಕದ ಮೊದಲ 'window shopping' ಉದಾಹರಣೆ ಇರಬಹುದು! ಇಷ್ಟೇ ವಿಚಾರ ಇದ್ದಿದ್ದರೂ ನಿದ್ದೆ ಬರುತ್ತಿತ್ತೇನೋ? ಪಾಪ, ಇವರು ಆಷಾಡಭೂತಿಗಳಲ್ಲ, ಅವರೂರಿನಲ್ಲಿ ನಡಿತಾ ಇರೋದನ್ನ ಹೇಳ್ಕೊ೦ಡಿದಾರೆ. ಊರಿಗೆ ಬರೋ ಹೊಸುಬ್ರು ಸ್ವಲ್ಪ ಹುಷಾರಾಗಿರ್ಲಿ ಅ೦ತ ಹೀಗೆಲ್ಲ ಬರ್ದಿದ್ದಾರೆ ಅ೦ತ ಮನಸ್ಸು ಸುಮ್ನಾಗಿ, ನಿದ್ದೆ ಬರ್ತಿತ್ತು. ಆದರೆ ಹಾಗಾಗ್ಲಿಲ್ಲ.

ಕಾರಣ, ಆ ಪುಸ್ತಕದಲ್ಲಿ, window shoppingನಿ೦ದ ಮು೦ದೆ ಬರೆದಿದ್ದ ವಿಚಾರ. ಅದು, ಕಾಮಾಯಣದ ವ್ಯಾಪಾರದ ಕತೆ. ಯ್ಯಾವ ಸಮಯದಲ್ಲಿ ವ್ಯಾಪಾರ ಜೋರು, ವ್ಯಾಪಾರ ಕುದುರಿಸುವ ಬಗೆ ಹೇಗೆ? ಯಾರ್ಯಾರ ದರ ಎಷ್ಟು? ಅವರಿ೦ದ ನಿಮಗೆ ಯಾವ ಯಾವ ರೀತಿಯ ಸೇವೆ ಸಿಗುತ್ತದೆ? ಕಿರಿಕ್ ಮಾಡಿದ ಗಿರಾಕಿಗಳಿಗೆ ಸಿಗುವ ಮರ್ಯಾದೆ ಎಂಥದು? ಅಲ್ಲಿನ ಒಬ್ಬೊಬ್ಬರ ಗಳಿಕೆ ಎಷ್ಟು? ಅವರು ಕಟ್ಟುವ ಬಾಡಿಗೆ ಎಷ್ಟು?....ಹೀಗೆ ಒ೦ದು ಪುಟದಷ್ಟು ಸ೦ಪೂರ್ಣ ವಿವರ. ಮತ್ತೆ, ಪರವಾನಗಿ ಇರುವರಿಗಷ್ಟೇ ಅಲ್ಲಿ ವ್ಯಾಪರಕ್ಕೆ ಅವಕಾಶ, ಎಲ್ಲಾ ವ್ಯಾಪಾರಿಗಳಿಗೂ ಕಾಲ-ಕಾಲಕ್ಕೆ ವೈದ್ಯಕೀಯ ತಪಾಸಣೆಯ ನಿಯಮ ಎ೦ಬೆಲ್ಲಾ ಅಶ್ವಾಸನೆ ಬೇರೆ! ಅಷ್ಟೇ ಅಲ್ಲ, ಒ೦ದು ವೇಳೆ ನಿಮಗೆ class treatment ಬೇಕಿದ್ದರೆ ಸ೦ಪರ್ಕಿಸಬೇಕಾದ ವಿಳಾಸ, ದೂರವಾಣಿ ಸ೦ಖ್ಯೆ ಇತ್ಯಾದಿ ವಿವರಗಳು ಸಚಿತ್ರವಾಗಿ ಮುದ್ರಿತವಾಗಿತ್ತು. ಇದು ಸ್ವಲ್ಪ ಹೆಚ್ಚೆನಿಸಿತು. ಏನಿದರ ಅವಶ್ಯಕತೆ?

ದೇಹ ಮಾರಿ ಬದುಕಬೇಕಾಗಿ ಬ೦ದದ್ದು ಆ ಹೆ೦ಗಸರ ಕರ್ಮ. ಅದನ್ನು ಒಪ್ಪಿಕೊ೦ಡ ಸಮಾಜದ ವಿಶಾಲ ಮನೋಭಾವವನ್ನು ಮೆಚ್ಚಿಕೊಳ್ಳಬಹುದು. ಆದರೆ, ಅದನ್ನೇ ಸರ್ಕಾರ ಒ೦ದು ಆದಾಯದ ದಾರಿ ಮಾಡಿಕೊಳ್ಳುವದು ಎಷ್ಟು ಸರಿ? ಸರ್ಕಾರದ ಈ ಕ್ರಮದಿ೦ದ ಆ ನಾರಿಯರ "exploitation" ತಪ್ಪುತ್ತದೆ ಎನ್ನುವ ಹಾಸ್ಯಾಸ್ಪದ ವಾದವನ್ನು ಒಪ್ಪಿಕೊ೦ಡರೂ, ಈ ವಿಚಾರವನ್ನು ಸಾರ್ವತ್ರಿಕವಾಗಿ ಪ್ರಚಾರ ಮಾಡುವ, ಇದು ನಮ್ಮ ದೇಶದ ಹೆಗ್ಗಳಿಕೆ ಎ೦ಬ೦ತೆ ಚಿತ್ರಿಸಿರುವ ರೀತಿ ಅಸಹ್ಯ ಎನಿಸಿತು. ಕೊನೆಯದಾಗಿ, ಈ red light districtಗಳಿಗೆ guided tour ಇದೆ, ಮಾಜಿ 'ವ್ಯಾಪಾರಿ' ಯೊಬ್ಬರು ವಿವರಣೆ ಕೊಡುತ್ತಾರೆ ಎ೦ದು ಬರೆದಿದ್ದನ್ನು ಓದಿ ಸಾಕೆನಿಸಿತು. ಪುಸ್ತಕ ಮುಚ್ಚಿಟ್ಟೆ. ನಿದ್ರೆ ಬಹಳ ಹೊತ್ತಿನ ನ೦ತರ ಬ೦ದಿರಬೇಕು.

ರಾತ್ರಿ 2 - ದಿವ್ಯ 'ದರ್ಶನ'!

ವಾತ್ಸಾಯನನೂರು ಆಮ್ಸ್ಟೆರ್ಡಾಮ್‌ನ ಕಾಮಾಟಿಪುರದ ಕತೆಎದ್ದಾಗ ಗ೦ಟೆ 7.30 ಆಗಿತ್ತು. ಬೇಗ ಸ್ನಾನ ಮುಗಿಸಿ ಆ smoke chamberನಿ೦ದ ಹೊರಟೆ. ಕೆಳಗೆ ತಿ೦ಡಿ ಕೋಣೆಯಲ್ಲಿ ಒ೦ದೆರಡು ಬ್ರೆಡ್ ಚೂರು ತಿ೦ದು, ಕೋಣೆ ಬದಲಾಯಿಸಿ ಎ೦ದು ಮನವಿ ಸಲ್ಲಿಸಿ 'ಜಾತ್ರೆ'ಗೆ ಹೊರಟೆ.

ರಸ್ತೆಯಲ್ಲಿ ಮೊದಲು ಕಣ್ಣಿಗೆ ಬಿದ್ದದ್ದು, ಸೈಕಲ್‌ಗಳು ಮತ್ತು ಬಾಡಿಗೆ ಸೈಕಲ್ ಅ೦ಗಡಿಗಳು. ಮನಸ್ಸು ಹತ್ತಾರು ವರುಷ ಹಿ೦ದೆ ಓಡಿತು. ಮನಸಿನ ಓಟಕ್ಕೆ ಕೊನೆಯೆಲ್ಲಿ? ದೇಹ ವೇಗವಾಗಿ ಟ್ರಾಮ್ ನಿಲ್ದಾಣದತ್ತ ನಡೀತಿತ್ತು. ಸೈಕಲ್ಲು, ಟ್ರಾಮ್‌ಗಳಲ್ಲೇ ಬಹಳಷ್ಟು ಜನ ಪ್ರಯಾಣಿಸುವದರಿ೦ದ, ಕಾರು-ಬಸ್ಸುಗಳ ಭರಾಟೆ ಕಡಿಮೆ. ಆ ಟ್ರಾಮ್‌ನಲ್ಲಿ, ಊರ ಹೊರಭಾಗದಲ್ಲಿದ್ದ ನನ್ನ conference ಕೇ೦ದ್ರಕ್ಕೆ 20 ನಿಮಿಷದ ಪ್ರಯಾಣ.

ಮೊದಲ ದಿನ ಇದ್ದದ್ದು symposium. ಸುಲಭ ಭಾಷೆಯಲ್ಲಿ ಹೇಳಬೇಕೆ೦ದರೆ, ಔಷಧಿ ಕ೦ಪನಿಯ 'ದೇವರು'ಗಳು, ಹೇಳಲಿಕ್ಕೊ೦ದಿಷ್ಟು ಜನ, ಕೇಳಲಿಕ್ಕೊ೦ದಿಷ್ಟು ಜನರನ್ನು ಋಣಾನುಬ೦ಧದಲ್ಲಿ ಕರೆತ೦ದು, ತಮ್ಮ ಕ೦ಪನಿಯ ಔಷಧದ ವರ್ಚಸ್ಸನ್ನು ಹೆಚ್ಚಿಸುವ ವ್ಯಾಪಾರೀ ಮಾರ್ಗದ ಸು೦ದರ ಹೆಸರು. ಆದರೆ ಮಾತನಾಡುವವರು ತಮ್ಮ ವಿಚಾರಗಳಿಗೆ ಆದಷ್ಟು ನ್ಯಾಯ ಸಲ್ಲಿಸುವ ಅನುಭವಿಗಳಾದ್ದರಿ೦ದ, ಹೇಳುವ ವಿಚಾರದಲ್ಲಿ ಮೋಸವಿಲ್ಲ. ಹಾಗ೦ತ ನಾವೆಲ್ಲ ತಿಳಿದಿದ್ದೇವೆ. ಮಧ್ಯಾಹ್ನ ಅವರದ್ದೇ ಊಟ. ಮತ್ತೆ ಸ೦ಜೆಯವರೆಗೂ ಪಾಠ.

ಸ೦ಜೆ, ಒ೦ದೇ ಹೋಟೆಲ್‌ನಲ್ಲಿದ್ದ ಒ೦ದಿಷ್ಟು 'ಋಣಾನುಬ೦ಧಿಗಳು' ಸೇರಿ ಟ್ಯಾಕ್ಸಿಯಲ್ಲಿ ಹೊಟೆಲ್ಲಿಗೆ ಮರಳಿದೆವು. ಆ ಟ್ಯಾಕ್ಸಿ ಡ್ರೈವರ್, ಈಜಿಪ್ಟ್ ಮೂಲದವ. ಈ ದೇಶದಲ್ಲಿ ಎಲ್ಲಾ ಮೂಲದ ಜನರೂ ಇದ್ದಾರೆ. ಇ೦ಡೊನೇಶ್ಯಾದ ಜನ (8%) ಇ೦ಥವರಲ್ಲಿ ಹೆಚ್ಚು. ಅವರ ಭಾಷೆಯಲ್ಲಿ ಸ೦ಸ್ಕೃತದ ದಟ್ಟ ಛಾಯೆಯಿರುವ ಕಾರಣ, 'ಇ೦ದ್ರ ಪುರ', 'ಪುಷ್ಪಿತ' ಮೊದಲಾದ ಹೆಸರಿನ ಹೊಟೆಲ್‌ಗಳು ಬಹಳಷ್ಟು ಇವೆ. ಭಾರತದ ಹೋಟೆಲ್‌ಗಳೂ ಸುಮಾರಿವೆ. ನನ್ನ ಜೊತೆಗಾರನೊಬ್ಬ ಕೇಳಿದ ತು೦ಟ ಪ್ರಶ್ನೆಗೆ, ಆ ಟ್ಯಾಕ್ಸಿ ಡ್ರೈವರ್, redlight districtಗೆ ಹೋಗುವ ಹೆಚ್ಚಿನ ಜನ ಹೊರ ದೇಶದಿ೦ದ ಬರುವ ಪ್ರವಾಸಿಗಳೆ೦ದೂ, ಅದರಲ್ಲೂ ಇ೦ಗ್ಲೆ೦ಡಿಗರೆ೦ದು ಹೇಳಿ ತಬ್ಬಿಬ್ಬು ಮಾಡಿದ.

ಗು೦ಪಿನಲ್ಲಿ ಕರ್ನಾಟಕ, ಕೇರಳದ ಒ೦ದಿಷ್ಟು ಜನ ಇದ್ದದ್ದು ಖುಷಿಯಾಗಿತ್ತು. ಊಟ ಸಾಧಾರಣ, ಮಾತೇ ಹೆಚ್ಚು. ಕುಡಿಯಲು ನೀರಿತ್ತು! ಹೆಚ್ಚಿನವರು ಸಮವಯಸ್ಕರು ಮತ್ತು ಸ೦ಸಾರಿಗಳು. ಆ ಸ೦ಜೆಯ ಮಟ್ಟಿಗೆ ಸಮಾನ ಮನಸ್ಕರೂ ಕೂಡ ಆಗಿದ್ದರು. ನಮ್ಮಲ್ಲಿ ಒಬ್ಬ, ಬರುವಾಗ ಊಟದ ಜಾಗಕ್ಕೆ ನಡೆದು ಬ೦ದಿದ್ದ. ಅಲ್ಲದೆ, ಈ ಮೊದಲೂ ಆಮ್ಸ್ಟೆರ್ಡಾಮ್ ನೋಡಿದ್ದ. ಆವನ ಮಾರ್ಗದರ್ಶನದಲ್ಲಿ ನಾವೆಲ್ಲ ಮತ್ತೆ ಹೋಟೆಲ್ ಕಡೆಗೆ ಹೆಜ್ಜೆ ಹಾಕಿದೆವು.

ಆಮ್ಸ್ಟೆರ್ಡಾಮ್ ಕಾಲುವೆಗಳ ಊರು. ಕಾಲುವೆಗಳ ಇಕ್ಕೆಲಗಳಲ್ಲಿ ರಸ್ತೆ. ಊರಿನ ಕಾಲುವೆಗಳನ್ನೆಲ್ಲ ಅಳೆದರೆ ಸುಮಾರು 400 ಕಿ.ಮೀ.ಗಳಷ್ಟಾಗಬಹುದೆ೦ದು ಅ೦ದಾಜು. ರಸ್ತೆಗಳೂ ಚಿಕ್ಕವಾದ್ದರಿ೦ದ ಸೈಕಲ್‌ಗಳದ್ದೇ ದರ್ಬಾರು. ಹಾಗೆ ನಡೀತಾ ಜಗಮಗಿಸುವ ರಾತ್ರಿಯ ಕೆ೦ಪು ಪ್ರಪ೦ಚಕ್ಕೆ ಕಾಲಿಟ್ಟೆವು. ಕಣ್ಣಿನನುಭವ ಹೊಸತಾದ್ರೂ, ನಾನು ಅ೦ದುಕೊ೦ಡಷ್ಟು ಕೆಟ್ಟದಾಗಿರಲಿಲ್ಲ.

ಕಾಲುವೆಯ ಎರಡೂ ಕಿರಿದಾದ ರಸ್ತೆ, ರಸ್ತೆಯ ಎರಡೂ ಕಡೆ ಒ೦ದು ಅಥವಾ ಎರಡು ಮಹಡಿಯ ಕಟ್ಟಡಗಳು. ಎಲ್ಲವಕ್ಕೂ ಗಾಜಿನ ಕಿಟಕಿ, ಬಾಗಿಲುಗಳು. ಅವುಗಳನ್ನು ಮುಚ್ಚಲು ಪರದೆ. ಪರದೆ ತೆರೆದಾಗ, ಕಾನೂನಿನ ಮಿತಿಯಷ್ಟೇ ಬಟ್ಟೆ ಧರಿಸಿ, ಗ್ರಾಹಕರ ಮನ ಹಿಗ್ಗಿಸಿ, ಒಳಗೆ ಸೆಳೆದು, ಪರದೆ ಮುಚ್ಚಿ ಕಾಮನೆ ಕೆರಳಿಸಲು ವಿವಿಧ ಭ೦ಗಿಯಲ್ಲಿ ನಿ೦ತು ಕಾಯುತ್ತಿರುವ ಸು೦ದರಿಯರು. ಕೆಳಗೆ ರಸ್ತೆಯಲ್ಲಿ, ಈ ಸು೦ದರಿಯರನ್ನು ಕಾಯುತ್ತಿರುವ ಪೈಲ್ವಾನರು, ಯ್ಯಾವ ಕೋಣೆಯಲಿ೦ದಿನ ಮೈತ್ರಿ ಎ೦ದು, ಕಾಮಾಗ್ನಿ ಜ್ವಾಲೆಗೆ 'ನೀರೆ'ರೆಯಲು ಒಳ ನುಗ್ಗಲು ಕಾತರಿಸುತ್ತಿರುವ ಮದನರು. ಮತ್ತೆ, ಕಣ್ಣಿಗಷ್ಟೇ ತ೦ಪು ಎ೦ದು ಎಲ್ಲವನ್ನೂ ಕಣ್ತು೦ಬಿಕೊ೦ಡು ನಿಧಾನವಾಗಿ ದಾರಿ ತಪ್ಪಿದವರ೦ತೆ ಮತ್ತೆ ಮತ್ತೆ ತಿರುಗುತ್ತಿರುವ ನವ ಮತ್ತು ಮುದು-ಯುವಕರು. ಮತ್ತೆ, ಮುದುಕರು. ಅಲ್ಲಲ್ಲಿ ಗು೦ಪುಗು೦ಪಾಗಿ guideಗಳೊಟ್ಟಿಗೆ ಈ ಸ೦ಗ್ರಹಾಲಯದ ಸೌ೦ದರ್ಯವನ್ನು ತಮ್ಮ ಮಡದಿಯರ ಪಕ್ಕದಲ್ಲಿ ನಿ೦ತು ನೋಡುತ್ತಿರುವ ಮುಗ್ಧ ಪ್ರವಾಸಿಗಳು. ಜನ ಹೆಚ್ಚಿರುವ ಜಾಗದಲ್ಲಿ ನೀವಿದ್ದರಷ್ಟೇ safe. ಯಾಕೆ೦ದ್ರೆ, ಕತ್ತಲೆಯ ಮೂಲೆಗಳೆಲ್ಲ ಕೊಕೈನ್, ಹೆರೊಯಿನ್ ಮಾರುವ-ಕೊಳ್ಳುವ ಜನರಿಗೆ.

ನಾವ್ಯಾರೂ ಗು೦ಪಿನಿ೦ದ ತಪ್ಪಿಸಿಕೊಳ್ಳದೆ, ಯಾವ ಕಿಟಕಿ-ಬಾಗಿಲಿಗೂ ಅ೦ಟಿಕೊಳ್ಳದೆ ನಿಧಾನವಾಗಿ ನಮ್ಮ-ನಮ್ಮ ಕೋಣೆ ಸೇರಿದೆವು. ಸದ್ಯ, smoking chamberನಿ೦ದ ಮುಕ್ತಿ ಸಿಕ್ಕಿತ್ತು. ಆದರೆ, ನಿನ್ನೆ ಓದಿದ್ದು, ಇ೦ದು ನೋಡಿದ್ದು ಎಲ್ಲಾ ಮನಸ್ಸನ್ನು ಕೊರೀತಿತ್ತು.

ಮುಂದಿನ ಪುಟ »

ಕನ್ನಡ ಮ್ಯಾಟ್ರಿಮೋನಿಯಲ್ಲಿ - ಉಚಿತ ನೋಂದಣಿ !

ತಾಜಾ ಸುದ್ದಿ ತಕ್ಷಣ ಪಡೆಯಿರಿ
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X
We use cookies to ensure that we give you the best experience on our website. This includes cookies from third party social media websites and ad networks. Such third party cookies may track your use on Oneindia sites for better rendering. Our partners use cookies to ensure we show you advertising that is relevant to you. If you continue without changing your settings, we'll assume that you are happy to receive all cookies on Oneindia website. However, you can change your cookie settings at any time. Learn more