ಅಕ್ಕ: ಕಾರ್ಯಕ್ರಮ ನಿರೂಪಕಿ ವೀಣಾ ಮೋಹನ್

ವೀಣಾ ಮೋಹನ್ ಹಾಸನವರು. ಅಲ್ಲಿ ಹುಟ್ಟಿ ಮೈಸೂರಿನಲ್ಲಿ ವಿದ್ಯಾಭ್ಯಾಸ ಮಾಡಿ ಕಳೆದ 15 ವರ್ಷಗಳಿಂದ ಎಡಿಸನ್ ನ್ಯೂ ಜೆರ್ಸಿಯಲ್ಲಿ ವಾಕ್ ಶ್ರವಣ ತಜ್ಞೆಯಾಗಿ ಕೆಲಸ ಮಾಡುತ್ತಿದ್ದಾರೆ. ಶಾಸ್ತ್ರೀಯ ಸಂಗೀತ, ಸುಗಮ ಸಂಗೀತ, ಜನಪದ, ನೃತ್ಯ, ನಾಟಕ, ಏಕಪಾತ್ರಾಭಿನಯ, ಬರವಣಿಗೆ, ಮುಂತಾದ ಕ್ಷೇತ್ರಗಳಲ್ಲಿ ಪರಿಣತಿಯನ್ನು ಪಡೆದಿದ್ದಾರೆ.

ಪ್ರತಿಷ್ಠಿತ ಗುರುಗಳಿಂದ (ಸಂಗೀತ ; ಅಹೋಬಲ ನರಸಿಂಹ ಮೂರ್ತಿ, ಆಶಾ ಜನಾರ್ಧನ್, ನೃತ್ಯ; ಬಿ.ಎಸ್. ಅಲಮೇಲು, ನಾಟಕ ; ಡಾ. ನ. ರತ್ನ, ಡಾ. ಸಿಂಧುವಳ್ಳಿ ಅನಂತ ಮೂರ್ತಿ) ತರಬೇತಿ ಪಡೆದು ಆಲ್ಬನಿ, ಬಾಸ್ಟನ್, ವಾಶಿಂಗ್ಟನ್, ನ್ಯೂ ಜೆರ್ಸಿ, ನ್ಯೂಯಾರ್ಕ್‌ಗಳಲ್ಲಿ ಹಲವಾರು ಸಾಂಸ್ಕ್ರತಿಕ ಕಾರ್ಯಕ್ರಮಗಳನ್ನು ನಡೆಸಿಕೊಟ್ಟಿರುತ್ತಾರೆ.

ಸ್ಥಳೀಯ ಹವ್ಯಾಸಿ ಕಲಾವಿದರ ತಂಡ "ತರಂಗ ಕಲಾಲಯ"ದ ಕಾರ್ಯಕ್ರಮಗಳ ನಿರ್ಮಾಪಕಿ, ನಿರ್ದೇಶಕಿಯಾಗಿ ಕೆಲಸ ಮಾಡಿದ್ದಾರೆ. ನ್ಯೂಜೆರ್ಸಿಯ ಭರತನಾಟ್ಯ ಅರಂಗೇಟ್ರಂನ ಬೆಸ್ಟ್ ಎಂಸಿ ಎಂಬ ಪ್ರಸಿದ್ಧಿ ಪಡೆದು ಅಮೆರಿಕ ಕನ್ನಡ ವಲಯಗಳಲ್ಲಿ ಚಿರಪರಿಚಿತರಾಗಿದ್ದಾರೆ. ಯಕ್ಷಗಾನ ಶಂಭು ಹೆಗ್ಗಡೆಯವರೊಡನೆ ಇವರು ನಡೆಸಿದ ಸಂದರ್ಶನ ಕಾರ್ಯಕ್ರಮ ಸ್ಥಳೀಯ ಟೀವಿಯಲ್ಲಿ ಬಿತ್ತರಗೊಂಡಿದ್ದು ಹೆಮ್ಮೆಯ ವಿಷಯ.

ಸ್ವಗೃಹದಲ್ಲಿ ತಮ್ಮ ಪತಿ ಕಡಬ ಮೋಹನ್ ರೊಡಗೂಡಿ ಭಾರತದಿಂದ ಬಂದಂತಹ ಹಲವಾರು ಪ್ರಖ್ಯಾತ ಕಲಾವಿದರುಗಳ ಕಾರ್ಯಕ್ರಮಗಳನ್ನು ಏರ್ಪಡಿಸಿ ಕಲಾಪೋಷಕರಾಗಿಯೂ ಸೇವೆ ಸಲ್ಲಿಸುತ್ತಿದ್ದಾರೆ. ಅಲ್ಲದೆ ಇಲ್ಲಿಯ ನೂರಾರು ಕಾರ್ಯಕ್ರಮಗಳಿಗೆ ಕನ್ನಡ/ಆಂಗ್ಲ ಭಾಷೆಗಳಲ್ಲಿ ಜನರ ಮೆಚ್ಚಿನ ನಿರೂಪಕಿಯಾಗಿ ಕಾರ್ಯನಿರ್ವಹಿಸಿ ಈಗ ಪ್ರಸ್ತುವ 6ನೇ ಅಕ್ಕ ವಿಶ್ವ ಕನ್ನಡ ಸಮೇಳನಕ್ಕೆ "ಎಂಸಿ ಚೇರ್" ಆಗಿ ಕೆಲಸ ನಿರ್ವಹಿಸುವ ಜವಾಬ್ದಾರಿಯನ್ನು ಹೊತ್ತಿದ್ದಾರೆ.

ಅಕ್ಕ: ಕಾರ್ಯಕ್ರಮ ನಿರೂಪಕಿ ಅನುಪಮಾ »