ಈ ಅಮ್ಮಗಳು : ನಾಗೇಶ ಮೈಸೂರು ಕವನ
ಹಾಳು ಮರೆವಿಗೆ ಶಾಪ ಧಮಕಿ ಹಾಕಿ ಸುಮ್ಮನೆ
ದೇವಕೋಟಿ ರಾಕ್ಷಸ ವಾಚಾಮಗೋಚರ ದಮನೆ
ಬೇರಿನ್ನಾರಿಗೆ ಸಾಧ್ಯ ಈ ಧೈರ್ಯಕೆ ನಮ್ಮಮ್ಮನೆ!
ಮುಲಾಜಿಲ್ಲದೆ ಮುಖದ ಮೇಲ್ಹೊಡೆದಂತೆ ಮಾತೆ
ಎದ್ದು ಬಂದಂತೆ ನೇರ ರಾಮಾಯಣದಿಂದ ಸೀತೆ
ಹಗಲಿರುಳು ಕಟ್ಟಿ ನೊಗ ಮೂಗೆತ್ತಿನ ಹಾಗೆ ಜಗ
ಗಂಡ ಮನೆ ಮಕ್ಕಳ ಸುತ್ತೆ ಬುಗುರಿಯಾಡಿ ಜಾಗ!
ಕತ್ತಲಡುಗೆ ಮನೆಯ ಮಂಕು ದೀಪವೆ ಅರಮನೆ
ಹಚ್ಚಿದೊಲೆ ಬೆಂಕಿ ಬೆಳಕಲ್ಲೆ ಜಗಮಗಿಸಿತೆ ಕರುಣೆ
ದಿನರಾತ್ರಿ ಹಗಲಿರುಳು ಸುಟ್ಟು ಬೇಯಿಸುತದನೆ
ಮಾಡಿದ್ದೆ ಮಾಡಿ ಬೇಸರವಿರದೆ ರುಚಿಯಾಗಮನೆ!
ಸುತ್ತಾಡಿದ ಪ್ರಪಂಚ ನೆರೆಹೊರೆಯಲಾಡಿ ಉವಾಚ
ವಠಾರ ಬೀದಿ ಹೆಂಗಳೆಯರಾ ಒಡನಾಟವೆ ಕವಚ
ಅಗ್ರಹಾರದಾ ಸುತ್ತೆ ಮಿಕ್ಕರೆ ದೇವಸ್ಥಾನಕೆ ಹೊತ್ತೆ
ಸ್ನಾನ ಪೂಜೆ ಪುನಸ್ಕಾರ ತುಳಸಿ ಕಟ್ಟೆಗಳೆ ಸಂಪತ್ತೆ!
ಮದುವೆ ಮುಂಜಿ ನಾಮಕರಣ ರೇಷ್ಮೆ ಚಿನ್ನಾಭರಣ
ಕಾಲಾಯಾಪನೆಗಷ್ಟೂ ಅವರಿವರಾ ರಾಮಾಯಣ
ಕೆಂಚಿ ಸಿದ್ದಿ ಕರಿಯಮ್ಮನ ಹರಟೇ ಲೋಕಾಭಿರಾಮ
ನೀರಿಟ್ಟೊಲೆ ಮರೆಸಿಬಿಟ್ಟ ನೆನಪ ಬೈದೊಡುವಳಮ್ಮ!
Click it and Unblock the Notifications
Sign in with Google