ಕನ್ನಡ ತಾಯಿ ಪಾದ ಪೂಜಾಕ ಹೂವ

ಎಲ್ಲಾರೂ ಅಂತಾರ ನನ್ನ ಭಾಷಾ ಭಾಳ ಅದ ಕಠಿಣಾ
ತಿಳೀವಲ್ದು ಯಾಕೊ ನನಗ ಏನ ಅದರ ಕಾರಣಾ
ಎಷ್ಟೋ ವರ್ಷಾತು ಬಿಟ್ಟ ನಾನು ಕನ್ನಡ ನೆಲಾ ಜಲಾ
ಆದರೂ ಬರ್ತಾವ್ ಕನ್ನಡ ಪದ ಮನಸ್ನ್ಯಾಗಿಂದ್ ನೋಡ್ರೆಲಾ

ವಾಯುವ್ಯದೊಳಗ ಕೂತಿದ್ದೆ ನಾನು ಎಲ್ಲಾರಿದ್ದೂ ದಿಕ್ಕಿಲ್ದಾಂಗ
ಓದ್ಕೋತಿರ್ತಿದ್ದೆ ಕನ್ನಡ ಪುಸ್ತಕ ಹಾಂಗ ಹೀಂಗ ಹ್ಯಾಂಗ
ಹಣೀ ಬರಹ ನಂದ ನೋಡ್ರಿ ಎಳ್ಕೊಂಡೊಯ್ತು ಉತ್ತರಕ್ಕ
ಅಮ್ಯಾಲ ಹಂಗ ಸೆಳಕೊಂಡು ಬಂತು ಈ ಸಮುದ್ರದಿಚ್ಚೀಕ

ನಿಂತ ಹೋಗಿತ್ತು ಯಾಕೊ ಪದಗಳು ಹುಟ್ಟುವಂಥಾ ಸೆಲಿ
ಏನ ಮಾಡಬೇಕ್ ಹೊಳೀತಿರ್ಲಿಲ್ಲ ಎಂಥಾದೀ ನಂತಲಿ
ಅಪ್ಪ ಅಮ್ಮನ ಪುಣ್ಯ ಏನೊ ಶುರು ಆತು ನೋಡ್ರಿ ಮತ್ತ
ಪದಗಳ ಮ್ಯಾಲ ಪದಾ ಬಿದ್ದು ಕವನದು ಎದ್ದು ಬಂತ

ಎಲ್ಲೇ ಹೋಗ್ಲಿ ಏನೆ ಮಾಡ್ಲಿ ಕನ್ನಡ ನನ್ನ ಜೀಂವ
ಅದಿಲ್ಲದ ಏನೂ ಅರ್ಥ ಇಲ್ಲ ನನ್ನೊಳಗಿರುವ ಭಾವ
ಕಠಿಣರ ಇರಲಿ ಸರಳರ ಇರಲಿ ಕವನ ಮಾತ್ರ ಹೊರಬರ್ಲಿ
ಕನ್ನಡ ತಾಯಿ ಪಾದ ಪೂಜಾಕ ಹೂವ ಆಕ್ಕೋತ್ ಇರಲಿ